| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. សាលបុប្ផទាយកត្ថេរអបទានវណ្ណនា
9. Sālapupphadāyakattheraapadānavaṇṇanā
មិគរាជា តទា អាសិន្តិអាទិកំ អាយស្មតោ សាលបុប្ផទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ កតកុសលសញ្ចយោ កេនចិ កម្មច្ឆិទ្ទេន ហិមវន្តេ សីហយោនិយំ និព្ពត្តោ អនេកសីហបរិវារោ វិហាសិ។ តទា សិខី ភគវា តស្សានុកម្បាយ ហិមវន្តំ អគមាសិ។ សីហោ តំ ឧបគតំ ទិស្វា បសន្នមានសោ សាខាភង្គេន សកណ្ណិកសាលបុប្ផំ គហេត្វា បូជេសិ។ ភគវា តស្ស អនុមោទនំ អកាសិ។
Migarājātadā āsintiādikaṃ āyasmato sālapupphadāyakattherassa apadānaṃ. Ayampi purimabuddhesu katādhikāro tattha tattha bhave katakusalasañcayo kenaci kammacchiddena himavante sīhayoniyaṃ nibbatto anekasīhaparivāro vihāsi. Tadā sikhī bhagavā tassānukampāya himavantaṃ agamāsi. Sīho taṃ upagataṃ disvā pasannamānaso sākhābhaṅgena sakaṇṇikasālapupphaṃ gahetvā pūjesi. Bhagavā tassa anumodanaṃ akāsi.
៦០. សោ តេន បុញ្ញេន ទេវមនុស្សេសុ សំសរន្តោ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិញ្ញុតំ បត្វា សត្ថរិ បសន្នោ បព្ពជិត្វា អរហត្តំ បត្តោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ មិគរាជា តទា អាសិន្តិអាទិមាហ។ តត្ថ មរណំ គច្ឆន្តីតិ មិគា, អថ វា ឃាសំ មគ្គន្តិ គវេសន្តីតិ មិគា, មិគានំ រាជា មិគរាជា។ សកលចតុប្បទានំ រាជភាវេ សតិបិ គាថាពន្ធសុខត្ថំ មិគេ អាទិំ កត្វា មិគរាជាតិ វុត្តំ។ យទា ភគវន្តំ ទិស្វា សបុប្ផំ សាលសាខំ ភញ្ជិត្វា បូជេសិំ, តទា អហំ មិគរាជា អហោសិន្តិ អត្ថោ។
60. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthari pasanno pabbajitvā arahattaṃ patto attano pubbakammaṃ saritvā somanassajāto pubbacaritāpadānaṃ pakāsento migarājā tadā āsintiādimāha. Tattha maraṇaṃ gacchantīti migā, atha vā ghāsaṃ magganti gavesantīti migā, migānaṃ rājā migarājā. Sakalacatuppadānaṃ rājabhāve satipi gāthābandhasukhatthaṃ mige ādiṃ katvā migarājāti vuttaṃ. Yadā bhagavantaṃ disvā sapupphaṃ sālasākhaṃ bhañjitvā pūjesiṃ, tadā ahaṃ migarājā ahosinti attho.
៦២. សកោសំ បុប្ផមាហរិន្តិ សកណ្ណិកំ សាលបុប្ផំ អាហរិំ បូជេសិន្តិ អត្ថោ។ សេសំ ឧត្តានត្ថមេវាតិ។
62.Sakosaṃ pupphamāharinti sakaṇṇikaṃ sālapupphaṃ āhariṃ pūjesinti attho. Sesaṃ uttānatthamevāti.
សាលបុប្ផទាយកត្ថេរអបទានវណ្ណនា សមត្តា។
Sālapupphadāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. សាលបុប្ផទាយកត្ថេរអបទានំ • 9. Sālapupphadāyakattheraapadānaṃ
