| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១៥៥. សព្ពចម្មបដិក្ខេបោ
155. Sabbacammapaṭikkhepo
២៥៥. តេន ខោ បន សមយេន ឆព្ពគ្គិយា ភិក្ខូ – ភគវតា ឧច្ចាសយនមហាសយនានិ បដិក្ខិត្តានីតិ – មហាចម្មានិ ធារេន្តិ, សីហចម្មំ ព្យគ្ឃចម្មំ ទីបិចម្មំ។ តានិ មញ្ចប្បមាណេនបិ ឆិន្នានិ ហោន្តិ, បីឋប្បមាណេនបិ ឆិន្នានិ ហោន្តិ, អន្តោបិ មញ្ចេ បញ្ញត្តានិ ហោន្តិ, ពហិបិ មញ្ចេ បញ្ញត្តានិ ហោន្តិ, អន្តោបិ បីឋេ បញ្ញត្តានិ ហោន្តិ, ពហិបិ បីឋេ បញ្ញត្តានិ ហោន្តិ។ មនុស្សា វិហារចារិកំ អាហិណ្ឌន្តា បស្សិត្វា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ គិហី កាមភោគិនោ’’តិ។ ភគវតោ ឯតមត្ថំ អារោចេសុំ។ ន, ភិក្ខវេ, មហាចម្មានិ ធារេតព្ពានិ, សីហចម្មំ ព្យគ្ឃចម្មំ ទីបិចម្មំ។ យោ ធារេយ្យ, អាបត្តិ ទុក្កដស្សាតិ។
255. Tena kho pana samayena chabbaggiyā bhikkhū – bhagavatā uccāsayanamahāsayanāni paṭikkhittānīti – mahācammāni dhārenti, sīhacammaṃ byagghacammaṃ dīpicammaṃ. Tāni mañcappamāṇenapi chinnāni honti, pīṭhappamāṇenapi chinnāni honti, antopi mañce paññattāni honti, bahipi mañce paññattāni honti, antopi pīṭhe paññattāni honti, bahipi pīṭhe paññattāni honti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘seyyathāpi gihī kāmabhogino’’ti. Bhagavato etamatthaṃ ārocesuṃ. Na, bhikkhave, mahācammāni dhāretabbāni, sīhacammaṃ byagghacammaṃ dīpicammaṃ. Yo dhāreyya, āpatti dukkaṭassāti.
តេន ខោ បន សមយេន ឆព្ពគ្គិយា ភិក្ខូ – ភគវតា មហាចម្មានិ បដិក្ខិត្តានីតិ – គោចម្មានិ ធារេន្តិ។ តានិ មញ្ចប្បមាណេនបិ ឆិន្នានិ ហោន្តិ, បីឋប្បមាណេនបិ ឆិន្នានិ ហោន្តិ, អន្តោបិ មញ្ចេ បញ្ញត្តានិ ហោន្តិ, ពហិបិ មញ្ចេ បញ្ញត្តានិ ហោន្តិ, អន្តោបិ បីឋេ បញ្ញត្តានិ ហោន្តិ, ពហិបិ បីឋេ បញ្ញត្តានិ ហោន្តិ។ អញ្ញតរោបិ បាបភិក្ខុ អញ្ញតរស្ស បាបុបាសកស្ស កុលូបកោ ហោតិ។ អថ ខោ សោ បាបភិក្ខុ បុព្ពណ្ហសមយំ និវាសេត្វា បត្តចីវរមាទាយ យេន តស្ស បាបុបាសកស្ស និវេសនំ តេនុបសង្កមិ, ឧបសង្កមិត្វា បញ្ញត្តេ អាសនេ និសីទិ។ អថ ខោ សោ បាបុបាសកោ យេន សោ បាបភិក្ខុ តេនុបសង្កមិ, ឧបសង្កមិត្វា តំ បាបភិក្ខុំ អភិវាទេត្វា ឯកមន្តំ និសីទិ។ តេន ខោ បន សមយេន តស្ស បាបុបាសកស្ស វច្ឆកោ ហោតិ តរុណកោ អភិរូបោ ទស្សនីយោ បាសាទិកោ ចិត្រោ, សេយ្យថាបិ ទីបិច្ឆាបោ។ អថ ខោ សោ បាបភិក្ខុ តំ វច្ឆកំ សក្កច្ចំ ឧបនិជ្ឈាយតិ។ អថ ខោ សោ បាបុបាសកោ តំ បាបភិក្ខុំ ឯតទវោច – ‘‘កិស្ស, ភន្តេ, អយ្យោ ឥមំ វច្ឆកំ សក្កច្ចំ ឧបនិជ្ឈាយតី’’តិ? ‘‘អត្ថោ មេ, អាវុសោ, ឥមស្ស វច្ឆកស្ស ចម្មេនា’’តិ។ អថ ខោ សោ បាបុបាសកោ តំ វច្ឆកំ វធិត្វា ចម្មំ វិធុនិត្វា តស្ស បាបភិក្ខុនោ បាទាសិ។ អថ ខោ សោ បាបភិក្ខុ តំ ចម្មំ សង្ឃាដិយា បដិច្ឆាទេត្វា អគមាសិ។ អថ ខោ សា គាវី វច្ឆគិទ្ធិនី តំ បាបភិក្ខុំ បិដ្ឋិតោ បិដ្ឋិតោ អនុពន្ធិ។ ភិក្ខូ ឯវមាហំសុ – ‘‘កិស្ស ត្យាយំ, អាវុសោ, គាវី បិដ្ឋិតោ បិដ្ឋិតោ អនុពន្ធី’’តិ? ‘‘អហម្បិ ខោ, អាវុសោ, ន ជានាមិ កេន 1 ម្យាយំ គាវី បិដ្ឋិតោ បិដ្ឋិតោ អនុពន្ធី’’តិ។ តេន ខោ បន សមយេន តស្ស បាបភិក្ខុនោ សង្ឃាដិ លោហិតេន មក្ខិតា ហោតិ។ ភិក្ខូ ឯវមាហំសុ – ‘‘អយំ បន តេ, អាវុសោ, សង្ឃាដិ កិំ កតា’’តិ? អថ ខោ សោ បាបភិក្ខុ ភិក្ខូនំ ឯតមត្ថំ អារោចេសិ។ ‘‘កិំ បន ត្វំ, អាវុសោ, បាណាតិបាតេ សមាទបេសី’’តិ? ‘‘ឯវមាវុសោ’’តិ។ យេ តេ ភិក្ខូ អប្បិច្ឆា តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ភិក្ខុ បាណាតិបាតេ សមាទបេស្សតិ, ននុ ភគវតា អនេកបរិយាយេន បាណាតិបាតោ គរហិតោ, បាណាតិបាតា វេរមណី បសត្ថា’’តិ។ អថ ខោ តេ ភិក្ខូ ភគវតោ ឯតមត្ថំ អារោចេសុំ។
Tena kho pana samayena chabbaggiyā bhikkhū – bhagavatā mahācammāni paṭikkhittānīti – gocammāni dhārenti. Tāni mañcappamāṇenapi chinnāni honti, pīṭhappamāṇenapi chinnāni honti, antopi mañce paññattāni honti, bahipi mañce paññattāni honti, antopi pīṭhe paññattāni honti, bahipi pīṭhe paññattāni honti. Aññataropi pāpabhikkhu aññatarassa pāpupāsakassa kulūpako hoti. Atha kho so pāpabhikkhu pubbaṇhasamayaṃ nivāsetvā pattacīvaramādāya yena tassa pāpupāsakassa nivesanaṃ tenupasaṅkami, upasaṅkamitvā paññatte āsane nisīdi. Atha kho so pāpupāsako yena so pāpabhikkhu tenupasaṅkami, upasaṅkamitvā taṃ pāpabhikkhuṃ abhivādetvā ekamantaṃ nisīdi. Tena kho pana samayena tassa pāpupāsakassa vacchako hoti taruṇako abhirūpo dassanīyo pāsādiko citro, seyyathāpi dīpicchāpo. Atha kho so pāpabhikkhu taṃ vacchakaṃ sakkaccaṃ upanijjhāyati. Atha kho so pāpupāsako taṃ pāpabhikkhuṃ etadavoca – ‘‘kissa, bhante, ayyo imaṃ vacchakaṃ sakkaccaṃ upanijjhāyatī’’ti? ‘‘Attho me, āvuso, imassa vacchakassa cammenā’’ti. Atha kho so pāpupāsako taṃ vacchakaṃ vadhitvā cammaṃ vidhunitvā tassa pāpabhikkhuno pādāsi. Atha kho so pāpabhikkhu taṃ cammaṃ saṅghāṭiyā paṭicchādetvā agamāsi. Atha kho sā gāvī vacchagiddhinī taṃ pāpabhikkhuṃ piṭṭhito piṭṭhito anubandhi. Bhikkhū evamāhaṃsu – ‘‘kissa tyāyaṃ, āvuso, gāvī piṭṭhito piṭṭhito anubandhī’’ti? ‘‘Ahampi kho, āvuso, na jānāmi kena 2 myāyaṃ gāvī piṭṭhito piṭṭhito anubandhī’’ti. Tena kho pana samayena tassa pāpabhikkhuno saṅghāṭi lohitena makkhitā hoti. Bhikkhū evamāhaṃsu – ‘‘ayaṃ pana te, āvuso, saṅghāṭi kiṃ katā’’ti? Atha kho so pāpabhikkhu bhikkhūnaṃ etamatthaṃ ārocesi. ‘‘Kiṃ pana tvaṃ, āvuso, pāṇātipāte samādapesī’’ti? ‘‘Evamāvuso’’ti. Ye te bhikkhū appicchā te ujjhāyanti khiyyanti vipācenti – ‘‘kathañhi nāma bhikkhu pāṇātipāte samādapessati, nanu bhagavatā anekapariyāyena pāṇātipāto garahito, pāṇātipātā veramaṇī pasatthā’’ti. Atha kho te bhikkhū bhagavato etamatthaṃ ārocesuṃ.
អថ ខោ ភគវា ឯតស្មិំ និទានេ ឯតស្មិំ បករណេ ភិក្ខុសង្ឃំ សន្និបាតាបេត្វា តំ បាបភិក្ខុំ បដិបុច្ឆិ – ‘‘សច្ចំ កិរ ត្វំ, ភិក្ខុ, បាណាតិបាតេ សមាទបេសី’’តិ? សច្ចំ ភគវាតិ…បេ.… កថញ្ហិ នាម ត្វំ, មោឃបុរិស, បាណាតិបាតេ សមាទបេស្សសិ, ននុ មយា, មោឃបុរិស, អនេកបរិយាយេន បាណាតិបាតោ គរហិតោ, បាណាតិបាតា វេរមណី បសត្ថា។ នេតំ, មោឃបុរិស, អប្បសន្នានំ វា បសាទាយ…បេ.… វិគរហិត្វា ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, បាណាតិបាតេ សមាទបេតព្ពំ។ យោ សមាទបេយ្យ, យថាធម្មោ ការេតព្ពោ។ ន, ភិក្ខវេ, គោចម្មំ ធារេតព្ពំ។ យោ ធារេយ្យ, អាបត្តិ ទុក្កដស្ស។ ន ច, ភិក្ខវេ, កិញ្ចិ ចម្មំ ធារេតព្ពំ។ យោ ធារេយ្យ, អាបត្តិ ទុក្កដស្សា’’តិ។
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā taṃ pāpabhikkhuṃ paṭipucchi – ‘‘saccaṃ kira tvaṃ, bhikkhu, pāṇātipāte samādapesī’’ti? Saccaṃ bhagavāti…pe… kathañhi nāma tvaṃ, moghapurisa, pāṇātipāte samādapessasi, nanu mayā, moghapurisa, anekapariyāyena pāṇātipāto garahito, pāṇātipātā veramaṇī pasatthā. Netaṃ, moghapurisa, appasannānaṃ vā pasādāya…pe… vigarahitvā dhammiṃ kathaṃ katvā bhikkhū āmantesi – ‘‘na, bhikkhave, pāṇātipāte samādapetabbaṃ. Yo samādapeyya, yathādhammo kāretabbo. Na, bhikkhave, gocammaṃ dhāretabbaṃ. Yo dhāreyya, āpatti dukkaṭassa. Na ca, bhikkhave, kiñci cammaṃ dhāretabbaṃ. Yo dhāreyya, āpatti dukkaṭassā’’ti.
សព្ពចម្មបដិក្ខេបោ និដ្ឋិតោ។
Sabbacammapaṭikkhepo niṭṭhito.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / សព្ពចម្មបដិក្ខេបាទិកថា • Sabbacammapaṭikkhepādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / សព្ពចម្មបដិក្ខេបាទិកថាវណ្ណនា • Sabbacammapaṭikkhepādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១៥៥. សព្ពចម្មបដិក្ខេបាទិកថា • 155. Sabbacammapaṭikkhepādikathā
