Ramarahasya Upanishad

॥ śrīrāmarahasyopaniṣat ॥

kaivalyaśrīsvarūpeṇa rājamānaṃ maho'vyayam ।
pratiyogivinirmuktaṃ śrīrāmapadamāśraye ॥
oṃ bhadraṃ karṇebhiḥ śruṇuyāma devāḥ । bhadraṃ paśyemākṣabhiryajatrāḥ ।
sthirairaṅgaistuṣṭuvām̐sastanūbhiḥ । vyaśema devahitaṃ yadāyuḥ ॥

svasti na indro vṛddhaśravāḥ । svasti naḥ pūṣā viśvavedāḥ ।
svasti nastārkṣyo ariṣṭanemiḥ । svasti no bṛhaspatirdadhātu ॥

oṃ śāntiḥ śāntiḥ śāntiḥ ॥

oṃ rahasyaṃ ramatapataṃ vāsudevaṃ ca mudgalam ।
śāṇḍilyaṃ paiṅgalaṃ bhikṣuṃ mahacchārīrakaṃ śikhā ॥ 1॥

sanakādyā yogivaryā anye ca ṛṣayastathā ।
prahlādādyā viṣṇubhaktā hanūmantamathābruvan ॥ 2॥

vāyuputra mahābāho kiṃtattvaṃ brahmavādinām ।
purāṇeṣvaṣṭādaśasu smṛtiṣvaṣṭādaśasvapi ॥ 3॥

caturvedeṣu śāstreṣu vidyāsvādhyātmike'pi ca ।
sarveṣu vidyādāneṣu vighnasūryeśaśaktiṣu ।
eteṣu madhye kiṃ tattvaṃ kathaya tvaṃ mahābala ॥ 4॥

hanūmānhovāca ॥

bho yogīndrāścaiva ṛṣayo viṣṇubhaktāstathaiva ca ।
śruṇudhvaṃ māmakīṃ vācaṃ bhavabandhavināśinīm ॥ 5॥

eteṣu caiva sarveṣu tattvaṃ ca brahma tārakam ।
rāma eva paraṃ brahma tattvaṃ śrīrāmo brahma tārakam ॥ 6॥

vāyuptreṇoktāste yogīndrā ṛṣayo viṣṇubhaktā
hanūmantaṃ papracchuḥ rāmasyāṅgāni no brūhīti ।
hanūmānhovāca । vāyuputraṃ vighneśaṃ vāṇīṃ durgāṃ
kṣetrapālakaṃ sūryaṃ candraṃ nārāyaṇaṃ nārasiṃhaṃ
vāyudevaṃ vārāhaṃ tatsarvāntsamātrāntsītaṃ lakṣmaṇaṃ
śatrughnaṃ bharataṃ vibhīṣaṇaṃ sugrīvamaṅgadaṃ
jāmbavantaṃ praṇavametāni rāmasyāṅgāni jānīthāḥ ।
tānyaṅgāni vinā rāmo vighnakaro bhavati ।
punarvāyuputreṇoktāste hanūmantaṃ papracchuḥ ।
āñjaneya mahābala viprāṇāṃ gṛhasthānāṃ praṇavādhikāraḥ
kathaṃ syāditi । sa hovāca śrīrāma evovāceti । yeṣāmeva
ṣaḍakṣarādhikāro vartate teṣāṃ praṇavādhikāraḥ syānnānyeṣām ।
kevalamakārokāramakārārdhamātrāsahitaṃ praṇavamūhya
yo rāmamantraṃ japati tasya śubhakaro'haṃ syām । tasya
praṇavasthākārasyokārasya makarāsyārdhamātrāyāśca
ṛṣiśchando devatā tattadvarṇāvarṇāvasthānaṃ
svaravedāgniguṇānuccāryānvahaṃ praṇavamantraddviguṇaṃ
japtvā paścādrāmamantraṃ yo japet sa rāmo bhavatīti
rāmeṇoktāstasmādrāmāṅgaṃ praṇavaḥ kathita iti ॥

vibhīṣaṇa uvāca ॥

siṃhāsane samāsīnaṃ rāmaṃ paulastyasūdanam ।
praṇamya daṇḍavadbhūmau paulastyo vākyamabravīt । । 7॥

raghunātha mahābāho kevalaṃ kathitaṃ tvayā ।
aṅgānāṃ sulabhaṃ caiva kathanīyaṃ ca saulabham ॥ 8॥

śrīrāma uvāca । atha pañca daṇḍakāni pitṛghno
mātṛghno brahmaghno guruhananaḥ koṭiyatighno'nekakṛtapāpo
yo mama ṣaṇṇavatikoṭināmāni japati sa tebhyaḥ pāpebhyaḥ
pramucyate । svayameva saccidānandasvarūpo bhavenna kim ।
punaruvāca vibhīṣaṇaḥ । tatrāpya śakto'yaṃ kiṃ karoti ।
sa hovācemam । kaikaseya puraścaraṇavidhāvaśakto
yo mama mahopaniṣadaṃ mama gītāṃ mannāmasahasraṃ
madviśvarūpaṃ mamāṣṭottaraśataṃ rāmaśatābhidhānaṃ
nāradoktastavarājaṃ hanūmatproktaṃ mantrarājātmakastavaṃ
sītāstavaṃ ca rāmaṣaḍakṣarītyādibhirmantrairyo māṃ
nityaṃ stauti tatsadṛśo bhavenna kiṃ bhavenna kim ॥

iti rāmarahasyopaniṣadi prathamo'dhyāyaḥ ॥ 1॥

sanakādyā munayo hanūmantaṃ papracchuḥ ।
āñjaneya mahābala tārakabrahmaṇo rāmacandrasya
mantragrāmaṃ no brūhīti ।
hanūmānhovāca ।
vahnisthaṃ śayanaṃ viṣṇorardhacandravibhūṣitam ।
ekākṣaro manuḥ prokto mantrarājaḥ suradrumaḥ ॥ 1॥

brahmā muniḥ syādgāyatraṃ chando rāmasya devatā ।
dīrghārdhenduyujāṅgāni kuryādvahnyātmano manoḥ ॥ 2॥

bījaśaktyādi bījena iṣṭārthe viniyojayet ।
sarayūtīramandāravedikāpaṅkajāsane ॥ 3॥

śyāmaṃ virāsanāsīnaṃ jñānamudropaśobhitam ।
vāmorunyastataddhastaṃ sītālakṣmaṇasaṃyutam ॥ 4॥

avekṣamāṇamātmānamātmanyamitatejasam ।
śuddhasphaṭikasaṃkāśaṃ kevalaṃ mokṣakāṅkṣayā ॥ 5॥

cintayanparamātmānaṃ bhānulakṣaṃ japenmanum ।
vahnirnārāyaṇo nāḍyo jāṭharaḥ kevalo'pi ca ॥ 6॥

dvyakṣaro mantrarājo'yaṃ sarvābhīṣṭapradastataḥ ।
ekākṣaroktamṛṣyādi syādādyena ṣaḍaṅgakam ॥ 7॥

tāramāyāramānaṅgavāksvabījaiśca ṣaḍvidhaḥ ।
tryakṣaro mantrarājaḥ syātsarvābhīṣṭaphalapradaḥ ॥ 8॥

dvyakṣaraścandrabhadrānto dvividhaścaturakṣaraḥ ।
ṛṣyādi pūrvavajjñeyametayośca vicakṣaṇaiḥ ॥ 9॥

sapratiṣṭhau ramau vāyau hṛtpañcārṇo manurmataḥ ।
viśvāmitraṛṣiḥ proktaḥ paṅktiśchando'sya devatā ॥10॥

rāmabhadro bījaśaktiḥ prathamārṇamiti kramāt ।
bhrūmadhye hṛdi nābhyūrvoḥ pādayorvinyasenmanum ॥ 11॥

ṣaḍaṅgaṃ pūrvavadvidyānmantrārṇairmanunāstrakam ।
madhye vanaṃ kalpatarormūle puṣpalatāsane ॥ 12॥

lakṣmaṇena praguṇitamakṣṇaḥ koṇena sāyakam ।
avekṣamāṇaṃ jānakyā kṛtavyajanamīśvaram ॥ 13॥

jaṭābhāralasacchīrṣaṃ śyāmaṃ munigaṇāvṛtam ।
lakṣmaṇena dhṛtacchatramathavā puṣpakopari ॥ 14॥

daśāsyamathanaṃ śāntaṃ sasugrīvavibhīṣaṇam ।
evaṃ labdhvā jayārthī tu varṇalakṣaṃ japenmanum ॥ 15॥

svakāmaśaktivāglakṣmīstavādyāḥ pañcavarṇakāḥ ।
ṣaḍakṣaraḥ ṣaḍvidhaḥ syāccaturvargaphalapradaḥ ॥ 16॥

pañcāśanmātṛkāmantravarṇapratyekapūrvakam ।
lakṣmīvāṅmanmathādiśca tārādiḥ syādanekadhā ॥ 17॥

śrīmāyāmanmathaikaika bījādyantargato manuḥ ।
caturvarṇaḥ sa eva syātṣaḍvarṇo vāñchitapradaḥ ॥ 18॥

svāhānto huṃphaḍanto vā natyanto vā bhavedayam ।
aṣṭāviṃśatyuttaraśatabhedaḥ ṣaḍvarṇa īritaḥ ॥ 19॥

brahmā saṃmohanaḥ śaktirdakṣiṇāmūrtireva ca ।
agastyaśca śivaḥ proktā munayo'kramādime ॥ 20॥

chando gāyatrasaṃjñaṃ ca śrīrāmaścaiva devatā ।
athavā kāmabījāderviśvāmitro munirmanoḥ ॥ 21॥

chando devyādigāyatrī rāmabhadro'sya devatā ।
bījaśaktī yathāpūrvaṃ ṣaḍvarṇānvinyasetkramāt ॥ 22॥

brahmarandhre bhruvormadhye hṛnnābhyūruṣu pādayoḥ ।
bījaiḥ ṣaḍdīrghayuktairvā mantrārṇaivā ṣaḍaṅgakam ॥ 23॥

kālābhodharakāntikāntamaniśaṃ vīrāsanādhyāsitaṃ
mudrāṃ jñānamayīṃ dadhānamaparaṃ hastāṃbujaṃ jānuni ।
sītāṃ pārśvagatāṃ saroruhakarāṃ vidyunnibhāṃ rāghavaṃ
paśyantaṃ mukuṭāṅgadādivividhākalpojjvalāṅgaṃ bhaje ॥ 24॥

śrīrāmaścandrabhadrānto ṅento natiyuto dvidhā ।
saptākṣaro mantrarājaḥ sarvakāmaphalapradaḥ ॥ 25॥

tārādisahitaḥ so'pi dvividho'ṣṭākṣaro mataḥ ।
tāraṃ rāmaścaturthyataḥ kroḍāstraṃ vahnitalpagā ॥ 26॥

aṣṭārṇo'yaṃ paro mantro ṛṣyādiḥ syātṣaḍarṇavat ।
punaraṣṭākṣarasyātha rāma eva ṛṣiḥ smṛtaḥ ॥ 27॥

gāyatraṃ chanda ityasya devatā rāma eva ca ।
tāraṃ śrībījayugmaṃ ca bījaśaktyādayo matāḥ ॥ 28॥

ṣaḍaṅgaṃ ca tataḥ kuryānmantrārṇaireva buddhimān ।
tāraṃ śrībījayugmaṃ ca rāmāya nama uccaret ॥ 29॥

glauṃmoṃ bījaṃ vadenmāyāṃ hṛdrāmāya punaśca tām ।
śivomārāmamantro'yaṃ vasvarṇastu vasupradaḥ ॥ 30॥

ṛṣiḥ sadāśivaḥ prokto gāyatraṃ chanda ucyate ।
śivomārāmacandro'tra devatā parikīrtitaḥ ॥ 31॥

dīrghayā māyayāṅgāni tārapañcārṇayuktayā ।
rāmaṃ trinetraṃ somārdhadhāriṇaṃ śūlinaṃ param ।
bhasmoddhūlitasarvāṅgaṃ kapardinamupāsmahe ॥ 32॥

rāmābhirāmāṃ saundaryasīmāṃ somāvataṃsikām ।
pāśāṅkuśadhanurbāṇadharāṃ dhyāyettrilocanām ॥ 33॥

dhyāyannevaṃ varṇalakṣaṃ japatarpaṇatatparaḥ ।
bilvapatraiḥ phalaiḥ puṣpaistilājyaiḥ paṅkajairhunet ॥ 34॥

svayamāyānti nidhayaḥ siddhayaśca surepsitāḥ ।
punaraṣṭākṣarasyātha brahmagāyatra rāghavāḥ ॥ 35॥

ṛṣyādayastu vijñeyāḥ śrībījaṃ mama śaktikam ।
tatprītyai viniyogaśca mantrārṇairaṅgakalpanā ॥ 36॥

keyūrāṅgadakaṅkaṇairmaṇigatairvidyotamānaṃ sadā
rāmaṃ pārvaṇacandrakoṭisadṛśacchatreṇa vai rājitam ।
hemastambhasahasraṣoḍaśayute madhye mahāmaṇḍape
deveśaṃ bharatādibhiḥ parivṛtaṃ rāmaṃ bhaje śyāmalam ॥ 37॥

kiṃ mantrairbahubhirvinaśvaraphalairāyāsasādhyairvṛtā
kiṃcillobhavitānamātraviphalaiḥ saṃsāraduḥkhāvahaiḥ ।
ekaḥ sannapi sarvamantraphalado lobhādidoṣojjhitaḥ
śrīrāmaḥ śaraṇaṃ mameti satataṃ mantro'yamaṣṭākṣaraḥ ॥ 38॥

evamaṣṭākṣaraḥ samyak saptadhā parikīrtitaḥ ।
rāmasaptākṣaro mantra ādyante tārasaṃyutaḥ ॥ 39॥

navārṇo mantrarājaḥ syāccheṣaṃ ṣaḍvarṇavannyaset ।
jānakīvallabhaṃ ṅentaṃ vahnerjāyāhumādikam ॥ 40॥

daśākṣaro'yaṃ mantraḥ syātsarvābhīṣṭaphalapradaḥ ।
daśākṣarasya mantrasya vasiṣṭho'sya ṛṣirvirāṭ ॥ 41॥

chando'sya devatā rāmaḥ sītāpāṇiparigrahaḥ ।
ādyo bījaṃ dviṭhaḥ śaktiḥ kāmenāṅgakriyā matā ॥ 42॥

śirolalāṭabhrūmadhye tālukarṇeṣu hṛdyapi ।
nābhūrujānupādeṣu daśārṇānvinyasenmanoḥ ॥ 43॥

ayodhyānagare ratnacitre sauvarṇamaṇḍape ।
mandārapuṣpairābaddhavitāne toraṇāñcite ॥ 44॥

siṃhāsane samāsīnaṃ puṣpakopari rāghavam ।
rakṣobhirharibhirdevairdivyayānagataiḥ śubhaiḥ ॥ 45॥

saṃstūyamānaṃ munibhiḥ prahvaiśca parisevitam ।
sītālaṅkṛtavāmāṅgaṃ lakṣmaṇenopasevitam ॥46॥

śyāmaṃ prasannavadanaṃ sarvābharaṇabhūṣitam ।
dhyāyannevaṃ japenmantraṃ varṇalakṣamananyadhīḥ ॥ 47॥

rāmaṃ ṅentaṃ dhanuṣpāṇaye'ntaḥ syādvahnisundarī ।
daśākṣaro'yaṃ mantraḥ syānmunirbrahmā virāṭ smṛtaḥ ॥ 48॥

chandastu devatā prokto rāmo rākṣasamardanaḥ ।
śeṣaṃ tu pūrvavatkuryāccāpabāṇadharaṃ smaret ॥ 49॥

tāramāyāramānaṅgavāksvabījaiśca ṣaḍvidhaḥ ।
daśārṇo mantrarājaḥ syādrudravarṇātmako manuḥ ॥ 50॥

śeṣaṃ ṣaḍarṇavajjñeyaṃ nyāsadhyānādikaṃ budhaiḥ ।
dvādaśākṣaramantrasya śrīrāma ṛṣirucyate ॥ 51॥

jagatī chanda ityuktaṃ śrīrāmo devatā mataḥ ।
praṇavo bījamityuktaḥ klīṃ śaktirhrīṃ ca kīlakam ॥ 52॥

mantreṇāṅgāni vinyasya śiṣṭaṃ pūrvavadācaret ।
tāraṃ māyāṃ samuccārya bharatāgraja ityapi ॥ 53॥

rāmaṃ klīṃ vahnijāyāntaṃ mantroyaṃ dvādaśākṣaraḥ ।
oṃ hṛdbhagavate rāmacandrabhadrau ca ṅeyutau ॥ 54॥

arkārṇo dvividho'pyasya ṛṣidhyānādipūrvavat ।
chandastu jagatī caiva mantrārṇairaṅgakalpanā ॥ 55॥

śrīrāmeti padaṃ coktvā jayarāma tataḥ param ।
jayadvayaṃ vadetprājño rāmeti manurājakaḥ ॥ 56॥

trayodaśārṇa ṛṣyādi pūrvavatsarvakāmadaḥ ।
padadvayadvirāvṛtteraṅgaṃ dhyānaṃ daśārṇavat ॥ 57॥

tārādisahitaḥ so'pi sa caturdaśavarṇakaḥ ।
trayodaśārṇamuccārya paścādrāmeti yojayet ॥ 58॥

sa vai pañcadaśārṇastu japatāṃ kalpabhūruhaḥ ।
namaśca sītāpataye rāmāyeti hanadvayam ॥ 59॥

tatastu kavacāstrāntaḥ ṣoḍaśākṣara īritaḥ ।
tasyāgastyaṛṣiśchando bṛhatī devatā ca saḥ ॥ 60॥

rāṃ bījaṃ śaktirastraṃ ca kīlakaṃ humitīritam ।
dvipañcatricaturvarṇaiḥ sarvairaṅgaṃ nyasetkramāt ॥ 61॥

tārādisahitaḥ so'pi mantraḥ saptadaśākṣaraḥ ।
tāraṃ namo bhagavate rāṃ ṅentaṃ mahā tataḥ ॥ 62॥

puruṣāya padaṃ paścāddhṛdanto'ṣṭadaśākṣaraḥ ।
viśvāmitro muniśchando gāyatraṃ devatā ca saḥ ॥ 63॥

kāmādisahitaḥ so'pi mantra ekonaviṃśakaḥ ।
tāraṃ nāmo bhagavate rāmāyeti padaṃ vadet ॥ 64॥

sarvaśabdaṃ samuccārya saubhāgyaṃ dehi me vadet ।
vahnijāyāṃ tathoccārya mantro viṃśārṇako mataḥ ॥ 65॥

tāraṃ namo bhagavate rāmāya sakalaṃ vadet ।
āpannivāraṇāyeti vahnijāyāṃ tato vadet ॥ 66॥

ekaviṃśārṇako mantraḥ sarvābhīṣṭaphalapradaḥ ।
tāraṃ ramā svabījaṃ ca tato dāśarathāya ca ॥ 67॥

tataḥ sītāvallabhāya sarvābhīṣṭapadaṃ vadet ।
tato dāya hṛdanto'yaṃ mantro dvāviṃśadakṣaraḥ ॥ 68॥

tāraṃ namo bhagavate vīrarāmāya saṃvadet ।
kala śatrūn hana dvandvaṃ vahnijāyāṃ tato vadet ॥ 69॥

trayoviṃśākṣaromantraḥ sarvaśatrunibarhaṇaḥ ।
viśvāmitro muniḥ prokto gāyatrīchanda ucyate ॥ 70॥

devatā vīrarāmo'sau bījādyāḥ pūrvavanmatāḥ ।
mūlamantravibhāgena nyāsānkṛtvā vicakṣaṇaḥ ॥ 71॥

śaraṃ dhanuṣi sandhāya tiṣṭhantaṃ rāvaṇonmukham ।
vajrapāṇiṃ rathārūḍhaṃ rāmaṃ dhyātvā japenmanum ॥ 72॥

tāraṃ namo bhagavate śrīrāmāya padaṃ vadet ।
tārakabrahmaṇe coktvā māṃ tāraya padaṃ vadet ॥ 73॥

namastārātmako mantraścaturviṃśatimantrakaḥ ।
bījādikaṃ yathā pūrvaṃ sarvaṃ kuryātṣaḍarṇavat ॥ 74॥

kāmastāro natiścaiva tato bhagavatepadam ।
rāmacandrāya coccārya sakaleti padaṃ vadet ॥ 75॥

janavaśyakarāyeti svāhā kāmātmako manuḥ ।
sarvavaśyakaro mantraḥ pañcaviṃśativarṇakaḥ ॥ 76॥

ādau tāreṇa saṃyukto mantraḥ ṣaḍviṃśadakṣaraḥ ।
ante'pi tārasaṃyuktaḥ saptaviṃśativarṇakaḥ ॥ 77॥

tāraṃ namo bhagavate rakṣoghnaviśadāya ca ।
sarvavighnāntsamuccārya nivāraya padadvayam ॥ 78॥

svāhānto mantrarājo'yamaṣṭāviṃśativarṇakaḥ ।
ante tāreṇa saṃyukta ekonatriṃśadakṣaraḥ ॥ 79॥

ādau svabījasaṃyuktastriṃśadvarṇātmako manuḥ ।
ante'pi tena saṃyukta ekatriṃśātmakaḥ smṛtaḥ ॥ 80॥

rāmabhadra maheśvāsa raghuvīra nṛpottama ।
bho daśāsyāntakāsmākaṃ śriyaṃ dāpaya dehi me ॥ 81॥

ānuṣṭubha ṛṣī rāmaśchando'nuṣṭupsa devatā ।
rāṃ bījamasya yaṃ śaktiriṣṭārthe viniyojayet ॥ 82॥

pādaṃ hṛdi ca vinyasya pādaṃ śirasi vinyaset ।
śikhāyāṃ pañcabhirnyasya trivarṇaiḥ kavacaṃ nyaset ॥ 83॥

netrayoḥ pañcavarṇaiśca dāpayetyastramucyate ।
cāpabāṇadharaṃ śyāmaṃ sasugrīvabibhīṣaṇam ॥ 84॥

hatvā rāvaṇamāyāntaṃ kṛtatrailokyarakṣaṇam ।
rāmacandraṃ hṛdi dhyātvā daśalakṣaṃ japenmanum ॥ 85॥

vadeddāśarathāyeti vidmaheti padaṃ tataḥ ।
sītāpadaṃ samuddhṛtya vallabhāya tato vadet ॥ 86॥

dhīmahīti vadettanno rāmaścāpi pracodayāt
tārādireṣā gāyatrī muktimeva prayacchati ॥ 87॥

māyādirapi vaiduṣṭyaṃ rāmādiśca śriyaḥpadam ।
madanenāpi saṃyuktaḥ sa mohayati medinīm ॥ 88॥

pañca trīṇi ṣaḍarṇaiśca trīṇi catvāri varṇakaiḥ ।
catvāri ca caturvarṇairaṅganyāsaṃ prakalpayet ॥ 89॥

bījadhyānādikaṃ sarvaṃ kuryātṣaḍvarṇavatkramāt ।
tāraṃ namo bhagavate caturthyā raghunandanam ॥ 90॥

rakṣoghnaviśadaṃ tadvanmadhureti vadettataḥ ।
prasannavadanaṃ ṅentaṃ vadedamitatejase ॥ 91॥

balarāmau caturthyantau viṣṇuṃ ṅentaṃ natistataḥ ।
prokto mālāmanuḥ saptacatvāriṃśadbhirakṣaraiḥ ॥ 92॥

ṛṣiśchando devatādi brahmānuṣṭubharāghavāḥ ।
saptartusaptadaśa ṣaḍrudrasaṃkhyaiḥ ṣaḍaṅgakam ॥ 93॥

dhyānaṃ daśākṣaraṃ proktaṃ lakṣamekaṃ japenmanum ।
śriyaṃ sītāṃ caturthyantāṃ svāhānto'yaṃ ṣaḍakṣaraḥ ॥ 94॥

janako'sya ṛṣiśchando gāyatrī devatā manoḥ ।
sītā bhagavatī proktā śrīṃ bījaṃ natiśaktikam ॥ 95॥

kīlaṃ sītā caturthyantamiṣṭārthe viniyojayet ।
dīrghasvarayutādyena ṣaḍaṅgāni prakalpayet ॥ 96॥

svarṇābhāmambujakarāṃ rāmālokanatatparām ।
dhyāyetṣaṭkoṇamadhyastharāmāṅkopari śobhitām ॥ 97॥

lakāraṃ tu samuddhṛtya lakṣmaṇāya namontakaḥ ।
agastyaṛṣirasyātha gāyatraṃ chanda ucyate ॥ 98॥

lakṣmaṇo devatā prokto laṃ bījaṃ śaktirasya hi ।
namastu viniyogo hi puruṣārtha catuṣṭaye ॥ 99॥

dīrghabhājā svabījena ṣaḍaṅgāni prakalpayet ।
dvibhujaṃ svarṇaruciratanuṃ padmanibhekṣaṇam ॥ 100॥

dhanurbāṇadharaṃ devaṃ rāmārādhanatatparam ।
bhakāraṃ tu samuddhṛtya bharatāya namontakaḥ ॥ 101॥

agastyaṛṣirasyātha śeṣaṃ pūrvavadācaret ।
bharataṃ śyāmalaṃ śāntaṃ rāmasevāparāyaṇam ॥ 102॥

dhanurbāṇadharaṃ vīraṃ kaikeyītanayaṃ bhaje ।
śaṃ bījaṃ tu samuddhṛtya śatrughnāya namontakaḥ ।
ṛṣyādayo yathāpūrvaṃ viniyogo'rinigrahe ॥ 103॥

dvibhujaṃ svarṇavarṇābhaṃ rāmasevāparāyaṇam ।
lavaṇāsurahantāraṃ sumitrātanayaṃ bhaje ॥ 104॥

hṛṃ hanumāṃścaturthyantaṃ hṛdanto mantrarājakaḥ ।
rāmacandra ṛṣiḥ prokto yojayetpūrvavatkramāt ॥ 105॥

dvibhujaṃ svarṇavarṇābhaṃ rāmasevāparāyaṇam ।
mauñjīkaupīnasahitaṃ māṃ dhyāyedrāmasevakam ॥ iti॥ 106॥

iti rāmarahasyopaniṣadi dvitīyo'dhyāyaḥ ॥ 2॥

sanakādyā munayo hanūmantaṃ papracchuḥ ।
āñjaneya mahābala pūrvoktamantrāṇāṃ
pūjāpīṭhamanubrūhīti । hanumān hovāca ।
ādau ṣaṭkoṇam । tanmadhye rāmabījaṃ saśrīkam ।
tadadhobhāge dvitīyāntaṃ sādhyam । bījordhvabhāge
ṣaṣṭhyantaṃ sādhakam । pārśve dṛṣṭibīje tatparito
jīvaprāṇaśaktivaśyabījāni । tatsarvaṃ sanmukhonmukhābhyāṃ
praṇavābhyāṃ veṣṭanam । agnīśāsuravāyavyapuraḥpṛṣṭheṣu
ṣaṭkoṇeṣu dīrghabhāñji । hṛdayādimantrāḥ krameṇa ।
rāṃ rīṃ rūṃ raiṃ rauṃ raḥ iti dīrghabhāji tadyuktahṛdayādyastrāntam ।
ṣaṭkoṇapārśve ramāmāyābīje । koṇāgre vārāhaṃ humiti ।
tadbījāntarāle kāmabījam । parito vāgbhavam । tato vṛttatrayaṃ
sāṣṭapatram । teṣu daleṣu svarānaṣṭavargānpratidalaṃ
mālāmanuvarṇaṣaṭkam । ante pañcākṣaram ।
taddalakapoleṣvaṣṭavarṇān । punaraṣṭadalapadmam ।
teṣu daleṣu nārāyaṇāṣṭākṣaro mantraḥ । taddalakapoleṣu
śrībījam । tato vṛttam । tato dvādaśadalam । teṣu daleṣu
vāsudevadvādaśākṣaro mantraḥ । taddalakapoleṣvādikṣāntān ।
tato vṛttam । tataḥ ṣoḍaśadalam । teṣu daleṣu huṃ phaṭ
natisahitarāmadvādaśākṣaram । taddalakapoleṣu māyābījam ।
sarvatra pratikapolaṃ dvirāvṛttyā hraṃ sraṃ bhraṃ braṃ bhramaṃ śruṃ
jram । tato vṛttam । tato dvātriṃśaddalapadmam । teṣu daleṣu
nṛsiṃhamantrarājānuṣṭubhamanraḥ । taddalakapoleśvaṣṭava-
svekādaśarudradvādaśādityamantrāḥ praṇavādinamontā-
ścaturthyantāḥ krameṇa । tadbahirvaṣaṭkāraṃ paritaḥ । tato
rekhātrayayuktaṃ bhūpuram । dvādaśadikṣu rāśyādibhūṣitam ।
aṣṭanāgairadhiṣṭhitam । caturdikṣu nārasiṃhabījam ।
vidikṣu vārāhabījam । etatsarvātmakaṃ yantraṃ sarvakāmapradaṃ
mokṣapradaṃ ca । ekākṣarādinavākṣarāntānāmetadyantraṃ
bhavati । taddaśāvaraṇātmakaṃ bhavati । ṣaṭkoṇamadhye
sāṅgaṃ rāghavaṃ yajet । ṣaṭkoṇeṣvaṅgaiḥ
prathamā vṛtiḥ । aṣṭadalamūle ātmādyāvaraṇam ।
tadagre vāsudevādyāvaraṇam । dvitīyāṣṭadalamūle
ghṛṣṭādyāvaraṇam । tadagre hanūmadādyāvaraṇam ।
dvādaśadaleṣu vasiṣṭhādyāvaraṇam । ṣoḍaśadaleśu
nīlādyāvaraṇam । dvātriṃśaddaleṣu dhruvādyāvaraṇam ।
bhūpurāntarindrādyāvaraṇam । tadbahirvajrādyāvaraṇam ।
evamabhyarcya manuṃ japet ॥

atha daśākṣarādidvātriṃśadakṣarāntānāṃ mantrāṇāṃ
pūjāpīṭhamucyate । ādau ṣaṭkoṇam । tanmadhye svabījam ।
tanmadhye sādhyanāmāni । evaṃ kāmabījaveṣṭanam । taṃ
śiṣṭena navārṇena veṣṭanam । ṣaṭkoṇeṣu
ṣaḍaṅgānyagnīśāsuravāyavyapūrvapṛṣṭheṣu ।
tatkapoleṣu śrīmāye । koṇāgre krodham । tato vṛttam ।
tato'ṣṭadalam । teṣu daleṣu ṣaṭsaṃkhyayā
mālāmanuvarṇān । taddalakapoleṣu ṣoḍaśa svarāḥ ।
tato vṛttam । tatparita ādikṣāntam । tadbahirbhūpuram
sāṣṭaśūlāgram । dikṣu vidikṣu nārasiṃhavārāhe ।
etanmahāyantram । ādhāraśaktyādivaiṣṇavapīṭham ।
aṅgaiḥ prathamā vṛtiḥ । madhye rāmam । vāmabhāge
sītām । tatpurataḥ śārṅgaṃ śaraṃ ca । aṣṭadalamūle
hanumadādidvitīyāvaraṇam । ghṛṣṭyāditṛtīyāvaraṇam ।
indrādibhiścaturthī । vajrādibhiḥ pañcamī । etadyantrārādhana-
pūrvakaṃ daśākṣarādimantraṃ japet । ॥

iti rāmarahasyopaniṣadi tṛtīyo'dhyāyaḥ ॥ 3॥

sanakādyā munayo hanūmantaṃ papracchuḥ ।
śrīrāmamantrāṇāṃ puraścaraṇavidhimanubrūhīti ।
hanūmānhovāca ।
nityaṃ triṣavaṇasnāyī payomūlaphalādibhuk ।
athavā pāyasāhāro haviṣyānnāda eva vā ॥ 1॥

ṣaḍsaiśca parityaktaḥ svāśramoktavidhiṃ caran ।
vanitādiṣu vākkarmamanobhirniḥspṛhaḥ śuciḥ ॥ 2॥

bhūmiśāyī brahmacārī niṣkāmo gurubhaktimān ।
snānapūjājapadhyānahomatarpaṇatatparaḥ ॥ 3॥

gurūpadiṣṭamārgeṇa dhyāyanrāmamananyadhīḥ ।
sūryendugurudīpādigobrāhmaṇasamīpataḥ ॥ 4॥

śrīrāmasannidhau maunī mantrārthamanucintayan ।
vyāghracarmāsane sthitvā svastikādyāsanakramāt ॥ 5॥

tulasīpārijātaśrīvṛkṣamūlādikasthale ।
padmākṣatulasīkāṣṭharudrākṣakṛtamālayā ॥ 6॥

mātṛkāmālayā mantrī manasaiva manuṃ japet ।
abhyarcya vaiṣṇave pīṭhe japedakṣaralakṣakam ॥ 7॥

tarpayettaddaśāṃśena pāyasāttaddaśāṃśataḥ ।
juhuyādgoghṛtenaiva bhojayettaddaśāṃśataḥ ॥ 8॥

tataḥ puṣpāñjaliṃ mūlamantreṇa vidhivaccaret ।
tataḥ siddhamanurbhūtvā jīvanmukto bhavenmuniḥ ॥ 9॥

aṇimādirbhajatyenaṃ yūnaṃ varavadhūriva ।
aihikeṣu ca kāryeṣu mahāpatsu ca sarvadā ॥ 10॥

naiva yojyo rāmamantraḥ kevalaṃ mokṣasādhakaḥ ।
aihike samanuprāpte māṃ smaredrāmasevakam ॥ 11॥

yo rāmaṃ saṃsmarennityaṃ bhaktyā manuparāyaṇaḥ ।
tasyāhamiṣṭasaṃsiddhyai dīkṣito'smi munīśvarāḥ ॥ 12॥

vāñchitārthaṃ pradāsyāmi bhaktānāṃ rāghavasya tu ।
sarvathā jāgarūko'smi rāmakāryadhurandharaḥ ॥ 13॥

iti rāmarahasyopaniṣadi caturtho'dhyāyaḥ ॥ 4॥

sanakādyā munayo hanūmantaṃ papracchuḥ ।
śrīrāmamantrārthamanubrūhīti । hanūmānhovāca ।
sarveṣu rāmamantreṣu mantrarājaḥ ṣaḍakṣaraḥ ।
ekadhāya dvidhā tredhā caturdhā pañcadhā tathā ॥ 1॥

ṣaṭsaptadhāṣṭadhā caiva bahudhāyaṃ vyavasthitaḥ ।
ṣaḍakṣarasya māhātmyaṃ śivo jānāti tattvataḥ ॥ 2॥

śrīrāmamantrarājasya samyagartho'yamucyate ।
nārāyaṇāṣṭākṣare ca śivapañcākṣare tathā ।
sārthakārṇadvayaṃ rāmo ramante yatra yoginaḥ ।
rakāro vahnivacanaḥ prakāśaḥ paryavasyati ॥ 3॥

saccidānandarūpo'sya paramātmārtha ucyate ।
vyañjanaṃ niṣkalaṃ brahma prāṇo māyeti ca svaraḥ ॥ 4॥

vyañjanaiḥ svarasaṃyogaṃ viddhi tatprāṇayojanam ।
repho jyotirmaye tasmātkṛtamākarayojanam ॥ 5॥

makāro'bhyudayārthatvātsa māyeti ca kīrtyate ।
so'yaṃ bījaṃ svakaṃ yasmātsamāyaṃ brahma cocyate ॥ 6॥

sabinduḥ so'pi puruṣaḥ śivasūryendurūpavān ।
jyotistasya śikhā rūpaṃ nādaḥ saprakṛtirmataḥ ॥ 7॥

prakṛtiḥ puruṣaścobhau samāyādbrahmaṇaḥ smṛtau ।
bindunādātmakaṃ bījaṃ vahnisomakalātmakam ॥ 8॥

agnīṣomātmakaṃ rūpaṃ rāmabīje pratiṣṭhitam ।
yathaiva vaṭabījasthaḥ prākṛtaśca mahādrumaḥ ॥ 9॥

tathaiva rāmabījasthaṃ jagadetaccarācaram ।
bījoktamubhayārthatvaṃ rāmanāmani dṛśyate ॥ 10॥

bījaṃ māyāvinirmuktaṃ paraṃ brahmeti kīrtyate ।
muktidaṃ sādhakānāṃ ca makāro muktido mataḥ ॥ 11॥

mārūpatvādato rāmo bhuktimuktiphalapradaḥ ।
ādyo ra tatpadārthaḥ syānmakarastvaṃpadārthavān ॥ 12॥

tayoḥ saṃyojanamasītyarthe tattvavido viduḥ ।
namastvamartho vijñeyo rāmastatpadamucyate ॥ 13॥

asītyarthe caturthī syādevaṃ mantreṣu yojayet ।
tattvamasyādivākyaṃ tu kevalaṃ muktidaṃ yataḥ ॥ 14॥

bhuktimuktipradaṃ caitattasmādapyatiricyate ।
manuṣveteṣu sarveṣāmadhikāro'sti dehinām ॥ 15॥

mumukṣūṇāṃ viraktānāṃ tathā cāśramavāsinām ।
praṇavatvātsadā dhyeyo yatīnāṃ ca viśeṣataḥ ।
rāmamantrārthavijñānī jīvanmukto na saṃśayaḥ ॥ 16॥

ya imāmupaniṣadamadhīte so'gnipūto bhavati ।
sa vāyupūto bhavati । surāpānātpūto bhavati ।
svarṇasteyātpūto bhavati । brahmahatyāpūto bhavati ।
sa rāmamantrāṇāṃ kṛtapuraścaraṇo rāmacandro bhavati ।
tadetadṛcābhyuktam ।
sadā rāmo'hamasmīti tattvataḥ pravadanti ye ।
na te saṃsāriṇo nūnaṃ rāma eva na saṃśayaḥ ॥ oṃ satyamityupaniṣat ॥

oṃ bhadraṃ karṇebhiḥ śruṇuyāma devā bhadraṃ paśyemākṣabhiryajatrāḥ ।
sthirairaṅgaistuṣṭuvām̐sastanūbhirvyaśema devahitaṃ yadāyuḥ ॥

oṃ śāntiḥ śāntiḥ śāntiḥ ॥

iti śrīrāmarahasyopaniṣatsamāptā ॥