| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. បុប្ផច្ឆទនិយត្ថេរអបទានវណ្ណនា
4. Pupphacchadaniyattheraapadānavaṇṇanā
សុនន្ទោ នាម នាមេនាតិអាទិកំ អាយស្មតោ បុប្ផច្ឆទនិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ អនេកេសុ ភវេសុ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ ព្រាហ្មណកុលេ និព្ពត្តោ វិញ្ញុតំ បត្វា សកសិប្បេសុ និប្ផត្តិំ បត្តោ មហាភោគោ មហាយសោ ទានាភិរតោ អហោសិ។ ឯកទិវសំ សោ ‘‘សកលជម្ពុទីបេ ឥមេ យាចកា នាម ‘អហំ ទានំ ន លទ្ធោស្មី’តិ វត្តុំ មា លភន្តូ’’តិ មហាទានំ សជ្ជេសិ។ តទា បទុមុត្តរោ ភគវា សបរិវារោ អាកាសេន គច្ឆតិ។ ព្រាហ្មណោ តំ ទិស្វា បសន្នចិត្តោ សកសិស្សេ បក្កោសាបេត្វា បុប្ផានិ អាហរាបេត្វា អាកាសេ ឧក្ខិបិត្វា បូជេសិ។ តានិ សកលនគរំ ឆាទេត្វា សត្ត ទិវសានិ អដ្ឋំសុ។
Sunando nāma nāmenātiādikaṃ āyasmato pupphacchadaniyattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā sakasippesu nipphattiṃ patto mahābhogo mahāyaso dānābhirato ahosi. Ekadivasaṃ so ‘‘sakalajambudīpe ime yācakā nāma ‘ahaṃ dānaṃ na laddhosmī’ti vattuṃ mā labhantū’’ti mahādānaṃ sajjesi. Tadā padumuttaro bhagavā saparivāro ākāsena gacchati. Brāhmaṇo taṃ disvā pasannacitto sakasisse pakkosāpetvā pupphāni āharāpetvā ākāse ukkhipitvā pūjesi. Tāni sakalanagaraṃ chādetvā satta divasāni aṭṭhaṃsu.
២៦. សោ តេន បុញ្ញកម្មេន ទេវមនុស្សេសុ សុខំ អនុភវិត្វា ឥមស្មិំ ពុទ្ធុប្បាទេ សាវត្ថិយំ ឯកស្មិំ កុលគេហេ និព្ពត្តោ សទ្ធាជាតោ បព្ពជិត្វា ខុរគ្គេយេវ អរហត្តំ បត្វា អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ សុនន្ទោ នាម នាមេនាតិអាទិមាហ។ តំ ហេដ្ឋា វុត្តនយត្តា សុវិញ្ញេយ្យមេវាតិ។
26. So tena puññakammena devamanussesu sukhaṃ anubhavitvā imasmiṃ buddhuppāde sāvatthiyaṃ ekasmiṃ kulagehe nibbatto saddhājāto pabbajitvā khuraggeyeva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento sunando nāma nāmenātiādimāha. Taṃ heṭṭhā vuttanayattā suviññeyyamevāti.
បុប្ផច្ឆទនិយត្ថេរអបទានវណ្ណនា សមត្តា។
Pupphacchadaniyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. បុប្ផច្ឆទនិយត្ថេរអបទានំ • 4. Pupphacchadaniyattheraapadānaṃ
