| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៥. រហោសញ្ញកត្ថេរអបទានវណ្ណនា
5. Rahosaññakattheraapadānavaṇṇanā
ហិមវន្តស្សាវិទូរេតិអាទិកំ អាយស្មតោ រហោសញ្ញកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ ឯកស្មិំ ពុទ្ធសុញ្ញកាលេ មជ្ឈិមទេសេ ព្រាហ្មណកុលេ និព្ពត្តោ វុទ្ធិមន្វាយ សកសិប្បេសុ និប្ផត្តិំ បត្វា តត្ថ សារំ អបស្សន្តោ កេវលំ ឧទរំ បូរេត្វា កោធមទមានាទយោ អកុសលេយេវ ទិស្វា ឃរាវាសំ បហាយ ហិមវន្តំ បវិសិត្វា ឥសិបព្ពជ្ជំ បព្ពជិត្វា អនេកតាបសសតបរិវារោ វសភបព្ពតសមីបេ អស្សមំ មាបេត្វា តីណិ វស្សសហស្សានិ ហិមវន្តេយេវ វសមានោ ‘‘អហំ ឯត្តកានំ សិស្សានំ អាចរិយោតិ សម្មតោ គរុដ្ឋានិយោ គរុកាតព្ពោ វន្ទនីយោ, អាចរិយោ មេ នត្ថី’’តិ ទោមនស្សប្បត្តោ តេ សព្ពេ សិស្សេ សន្និបាតេត្វា ពុទ្ធានំ អភាវេ និព្ពានាធិគមាភាវំ បកាសេត្វា សយំ ឯកកោ រហោ វិវេកដ្ឋានេវ និសិន្នោ ពុទ្ធស្ស សម្មុខា និសិន្នោ វិយ ពុទ្ធសញ្ញំ មនសិ ករិត្វា ពុទ្ធារម្មណំ បីតិំ ឧប្បាទេត្វា សាលាយំ បល្លង្កំ អាភុជិត្វា និសិន្នោ កាលំ កត្វា ព្រហ្មលោកេ និព្ពត្តិ។
Himavantassāvidūretiādikaṃ āyasmato rahosaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ekasmiṃ buddhasuññakāle majjhimadese brāhmaṇakule nibbatto vuddhimanvāya sakasippesu nipphattiṃ patvā tattha sāraṃ apassanto kevalaṃ udaraṃ pūretvā kodhamadamānādayo akusaleyeva disvā gharāvāsaṃ pahāya himavantaṃ pavisitvā isipabbajjaṃ pabbajitvā anekatāpasasataparivāro vasabhapabbatasamīpe assamaṃ māpetvā tīṇi vassasahassāni himavanteyeva vasamāno ‘‘ahaṃ ettakānaṃ sissānaṃ ācariyoti sammato garuṭṭhāniyo garukātabbo vandanīyo, ācariyo me natthī’’ti domanassappatto te sabbe sisse sannipātetvā buddhānaṃ abhāve nibbānādhigamābhāvaṃ pakāsetvā sayaṃ ekako raho vivekaṭṭhāneva nisinno buddhassa sammukhā nisinno viya buddhasaññaṃ manasi karitvā buddhārammaṇaṃ pītiṃ uppādetvā sālāyaṃ pallaṅkaṃ ābhujitvā nisinno kālaṃ katvā brahmaloke nibbatti.
៣៤. សោ តត្ថ ឈានសុខេន ចិរំ វសិត្វា ឥមស្មិំ ពុទ្ធុប្បាទេ កុលគេហេ និព្ពត្តោ កាមេសុ អនល្លីនោ សត្តវស្សិកោ បព្ពជិត្វា ខុរគ្គេយេវ អរហត្តំ បត្វា ឆឡភិញ្ញោ ហុត្វា បុព្ពេនិវាសញាណេន អត្តនោ បុព្ពកម្មំ សរិត្វា សញ្ជាតសោមនស្សោ បុព្ពចរិតាបទានំ បកាសេន្តោ ហិមវន្តស្សាវិទូរេតិអាទិមាហ។ វសភោ នាម បព្ពតោតិ ហិមវន្តបព្ពតំ វិនា សេសបព្ពតានំ ឧច្ចតរភាវេន សេដ្ឋតរភាវេន វសភោតិ សង្ខំ គតោ បព្ពតោតិ អត្ថោ។ សេសំ សព្ពត្ថ ឧត្តានត្ថមេវាតិ។
34. So tattha jhānasukhena ciraṃ vasitvā imasmiṃ buddhuppāde kulagehe nibbatto kāmesu anallīno sattavassiko pabbajitvā khuraggeyeva arahattaṃ patvā chaḷabhiñño hutvā pubbenivāsañāṇena attano pubbakammaṃ saritvā sañjātasomanasso pubbacaritāpadānaṃ pakāsento himavantassāvidūretiādimāha. Vasabho nāma pabbatoti himavantapabbataṃ vinā sesapabbatānaṃ uccatarabhāvena seṭṭhatarabhāvena vasabhoti saṅkhaṃ gato pabbatoti attho. Sesaṃ sabbattha uttānatthamevāti.
រហោសញ្ញកត្ថេរអបទានវណ្ណនា សមត្តា។
Rahosaññakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៥. រហោសញ្ញកត្ថេរអបទានំ • 5. Rahosaññakattheraapadānaṃ
