| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៧. បុលិនបូជកត្ថេរអបទានវណ្ណនា
7. Pulinapūjakattheraapadānavaṇṇanā
វិបស្សិស្ស ភគវតោតិអាទិកំ អាយស្មតោ បុលិនបូជកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ឯកស្មិំ កុលេ និព្ពត្តោ សាសនេ បសន្នចិត្តោ ចេតិយង្គណពោធិយង្គណេសុ បុរាណវាលុកំ អបនេត្វា នវំ មុត្តាទលសទិសបណ្ឌរបុលិនំ ឱកិរិត្វា មាឡកំ អលង្ករិ។ តេន កម្មេន សោ ទេវលោកេ និព្ពត្តោ តត្ថ ទិព្ពេហិ រតនេហិ វិជ្ជោតមានេ អនេកយោជនេ កនកវិមានេ ទិព្ពសម្បត្តិំ អនុភវិត្វា តតោ ចុតោ មនុស្សលោកេ សត្តរតនសម្បន្នោ ចក្កវត្តី រាជា ហុត្វា មនុស្សសម្បត្តិំ អនុភវិត្វា អបរាបរំ សំសរន្តោ ឥមស្មិំ ពុទ្ធុប្បាទេ វិភវសម្បន្នេ ឯកស្មិំ កុលេ និព្ពត្តោ សាសនេ បសន្នោ បព្ពជិត្វា វិបស្សនំ វឌ្ឍេត្វា អរហត្តំ បាបុណិ។ សោ អត្តនោ កតបុញ្ញនាមសទិសេន នាមេន បុលិនបូជកត្ថេរោតិ បាកដោ។
Vipassissabhagavatotiādikaṃ āyasmato pulinapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kule nibbatto sāsane pasannacitto cetiyaṅgaṇabodhiyaṅgaṇesu purāṇavālukaṃ apanetvā navaṃ muttādalasadisapaṇḍarapulinaṃ okiritvā māḷakaṃ alaṅkari. Tena kammena so devaloke nibbatto tattha dibbehi ratanehi vijjotamāne anekayojane kanakavimāne dibbasampattiṃ anubhavitvā tato cuto manussaloke sattaratanasampanno cakkavattī rājā hutvā manussasampattiṃ anubhavitvā aparāparaṃ saṃsaranto imasmiṃ buddhuppāde vibhavasampanne ekasmiṃ kule nibbatto sāsane pasanno pabbajitvā vipassanaṃ vaḍḍhetvā arahattaṃ pāpuṇi. So attano katapuññanāmasadisena nāmena pulinapūjakattheroti pākaṭo.
១៦៥. សោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ ទស្សេន្តោ វិបស្សិស្ស ភគវតោតិអាទិមាហ។ តត្ថ វិវិធំ បស្សតីតិ វិបស្សី, វិវិច្ច បស្សតីតិ វា វិបស្សី, វិវិធេ អត្តត្ថបរត្ថាទិភេទេ អត្ថេ បស្សតីតិ វា វិបស្សី, វិវិធេ វោហារបរមត្ថាទិភេទេ បស្សតីតិ វា វិបស្សី, តស្ស វិបស្សិស្ស ពោធិយា បាទបុត្តមេ ឧត្តមេ ពោធិរុក្ខមណ្ឌលមាឡកេ បុរាណបុលិនំ វាលុកំ ឆឌ្ឌេត្វា សុទ្ធំ បណ្ឌរំ បុលិនំ អាកិរិំ សន្ថរិំ។ សេសំ សុវិញ្ញេយ្យមេវាតិ។
165. So attano pubbakammaṃ saritvā somanassajāto pubbacaritāpadānaṃ dassento vipassissa bhagavatotiādimāha. Tattha vividhaṃ passatīti vipassī, vivicca passatīti vā vipassī, vividhe attatthaparatthādibhede atthe passatīti vā vipassī, vividhe vohāraparamatthādibhede passatīti vā vipassī, tassa vipassissa bodhiyā pādaputtame uttame bodhirukkhamaṇḍalamāḷake purāṇapulinaṃ vālukaṃ chaḍḍetvā suddhaṃ paṇḍaraṃ pulinaṃ ākiriṃ santhariṃ. Sesaṃ suviññeyyamevāti.
បុលិនបូជកត្ថេរអបទានវណ្ណនា សមត្តា។
Pulinapūjakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៧. បុលិនបូជកត្ថេរអបទានំ • 7. Pulinapūjakattheraapadānaṃ
