| Library / Tipiṭaka / तिपिटक • Tipiṭaka / पाचित्यादियोजनापाळि • Pācityādiyojanāpāḷi |
पुब्बकरणनिदानादिविभागवण्णना
Pubbakaraṇanidānādivibhāgavaṇṇanā
४०६-७. द्विक्खत्तुं पुच्छितत्ता ‘‘पुच्छाद्वय’’न्ति वुत्तं। हेतुपच्चयानं सरूपं दस्सेन्तो आह ‘‘छ चीवरानी’’ति। कस्मा वेदितब्बानीति आह ‘‘पुब्बपयोगादीनञ्ही’’तिआदि। हीति यस्मा। तानियेवाति छ चीवरानि एव। एवसद्दो पच्छापि योजेतब्बो, तानि एवाति अत्थो। हीति सच्चं, पुब्बकरणादीनि न अत्थीति योजना।
406-7. Dvikkhattuṃ pucchitattā ‘‘pucchādvaya’’nti vuttaṃ. Hetupaccayānaṃ sarūpaṃ dassento āha ‘‘cha cīvarānī’’ti. Kasmā veditabbānīti āha ‘‘pubbapayogādīnañhī’’tiādi. Hīti yasmā. Tāniyevāti cha cīvarāni eva. Evasaddo pacchāpi yojetabbo, tāni evāti attho. Hīti saccaṃ, pubbakaraṇādīni na atthīti yojanā.
४०८. ‘‘इमाय सङ्घाटिया’’तिआदिना वचीभेदाकारं दस्सेति। कथिनत्थारकेन यस्मा पच्चुद्धारो च अधिट्ठानञ्च करीयति, तस्मा किरियाति वुच्चति। तेन वुत्तं ‘‘पच्चुद्धारो चेव अधिट्ठानञ्चा’’ति।
408. ‘‘Imāya saṅghāṭiyā’’tiādinā vacībhedākāraṃ dasseti. Kathinatthārakena yasmā paccuddhāro ca adhiṭṭhānañca karīyati, tasmā kiriyāti vuccati. Tena vuttaṃ ‘‘paccuddhāro ceva adhiṭṭhānañcā’’ti.
४११. वत्थुविपन्नादीनं सरूपं दस्सेन्तो आह ‘‘अकप्पियदुस्सं होती’’तिआदि। विनासं, विकारं वा पज्जतीति विपन्नं, वत्थुमेव विपन्नं वत्थुविपन्नं।
411. Vatthuvipannādīnaṃ sarūpaṃ dassento āha ‘‘akappiyadussaṃ hotī’’tiādi. Vināsaṃ, vikāraṃ vā pajjatīti vipannaṃ, vatthumeva vipannaṃ vatthuvipannaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / परिवारपाळि • Parivārapāḷi / ३. पुब्बकरणनिदानादिविभागो • 3. Pubbakaraṇanidānādivibhāgo
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / पुब्बकरणनिदानादिविभागवण्णना • Pubbakaraṇanidānādivibhāgavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / पुब्बकरणनिदानादिविभागवण्णना • Pubbakaraṇanidānādivibhāgavaṇṇanā
