| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១០. បុព្ពកម្មបិលោតិកពុទ្ធអបទានវណ្ណនា
10. Pubbakammapilotikabuddhaapadānavaṇṇanā
៦៤. ទសមាបទានេ អនោតត្តសរាសន្នេតិ បព្ពតកូដេហិ បដិច្ឆន្នត្តា ចន្ទិមសូរិយានំ សន្តាបេហិ ឱតត្តំ ឧណ្ហំ ឧទកំ ឯត្ថ នត្ថីតិ អនោតត្តោ។ សរន្តិ គច្ឆន្តិ បភវន្តិ សន្ទន្តិ ឯតស្មា មហានទិយោតិ សរោ។ សីហមុខាទីហិ និក្ខន្តា មហានទិយោ តិក្ខត្តុំ តិក្ខត្តុំ បទក្ខិណំ កត្វា និក្ខន្តនិក្ខន្តទិសាភាគេន សរន្តិ គច្ឆន្តីតិ អត្ថោ។ អនោតត្តោ ច សោ សរោ ចាតិ អនោតត្តសរោ ។ តស្ស អាសន្នំ សមីបដ្ឋានន្តិ អនោតត្តសរាសន្នំ, តស្មិំ អនោតត្តសរាសន្នេ, សមីបេតិ អត្ថោ។ រមណីយេតិ ទេវទានវគន្ធព្ពកិន្នរោរគពុទ្ធបច្ចេកពុទ្ធាទីហិ រមិតព្ពំ អល្លីយិតព្ពន្តិ រមណីយំ, តស្មិំ រមណីយេ។ សិលាតលេតិ ឯកគ្ឃនបព្ពតសិលាតលេតិ អត្ថោ។ នានារតនបជ្ជោតេតិ បទុមរាគវេឡុរិយាទិនានាអនេកេហិ រតនេហិ បជ្ជោតេ បការេន ជោតមានេ។ នានាគន្ធវនន្តរេតិ នានប្បការេហិ ចន្ទនាគរុកប្បូរតមាលតិលកាសោកនាគបុន្នាគកេតកាទីហិ អនេកេហិ សុគន្ធបុប្ផេហិ គហនីភូតវនន្តរេ សិលាតលេតិ សម្ពន្ធោ។
64. Dasamāpadāne anotattasarāsanneti pabbatakūṭehi paṭicchannattā candimasūriyānaṃ santāpehi otattaṃ uṇhaṃ udakaṃ ettha natthīti anotatto. Saranti gacchanti pabhavanti sandanti etasmā mahānadiyoti saro. Sīhamukhādīhi nikkhantā mahānadiyo tikkhattuṃ tikkhattuṃ padakkhiṇaṃ katvā nikkhantanikkhantadisābhāgena saranti gacchantīti attho. Anotatto ca so saro cāti anotattasaro . Tassa āsannaṃ samīpaṭṭhānanti anotattasarāsannaṃ, tasmiṃ anotattasarāsanne, samīpeti attho. Ramaṇīyeti devadānavagandhabbakinnaroragabuddhapaccekabuddhādīhi ramitabbaṃ allīyitabbanti ramaṇīyaṃ, tasmiṃ ramaṇīye. Silātaleti ekagghanapabbatasilātaleti attho. Nānāratanapajjoteti padumarāgaveḷuriyādinānāanekehi ratanehi pajjote pakārena jotamāne. Nānāgandhavanantareti nānappakārehi candanāgarukappūratamālatilakāsokanāgapunnāgaketakādīhi anekehi sugandhapupphehi gahanībhūtavanantare silātaleti sambandho.
៦៥. គុណមហន្តតាយ សង្ខ្យាមហន្តតាយ ច មហតា ភិក្ខុសង្ឃេន, បរេតោ បរិវុតោ លោកនាយកោ លោកត្តយសាមិសម្មាសម្ពុទ្ធោ តត្ថ សិលាសនេ និសិន្នោ អត្តនោ បុព្ពានិ កម្មានិ ព្យាករី វិសេសេន បាកដមកាសីតិ អត្ថោ។ សេសមេត្ថ ហេដ្ឋា ពុទ្ធាបទានេ (អប. ថេរ ១.១.១ អាទយោ) វុត្តត្តា ឧត្តានត្ថត្តា ច សុវិញ្ញេយ្យមេវ។ ពុទ្ធាបទានេ អន្តោគធម្បិ ឥធាបទានេ កុសលាកុសលំ កម្មសំសូចកត្តា វគ្គសង្គហវសេន ធម្មសង្គាហកត្ថេរា សង្គាយិំសូតិ។
65. Guṇamahantatāya saṅkhyāmahantatāya ca mahatā bhikkhusaṅghena, pareto parivuto lokanāyako lokattayasāmisammāsambuddho tattha silāsane nisinno attano pubbāni kammāni byākarī visesena pākaṭamakāsīti attho. Sesamettha heṭṭhā buddhāpadāne (apa. thera 1.1.1 ādayo) vuttattā uttānatthattā ca suviññeyyameva. Buddhāpadāne antogadhampi idhāpadāne kusalākusalaṃ kammasaṃsūcakattā vaggasaṅgahavasena dhammasaṅgāhakattherā saṅgāyiṃsūti.
បុព្ពកម្មបិលោតិកពុទ្ធអបទានវណ្ណនា សមត្តា។
Pubbakammapilotikabuddhaapadānavaṇṇanā samattā.
ឯកូនចត្តាលីសមវគ្គវណ្ណនា សមត្តា។
Ekūnacattālīsamavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១០. បុព្ពកម្មបិលោតិកពុទ្ធអបទានំ • 10. Pubbakammapilotikabuddhaapadānaṃ
