| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤០. បិលិន្ទវច្ឆវគ្គោ
40. Pilindavacchavaggo
១. បិលិន្ទវច្ឆត្ថេរអបទានវណ្ណនា
1. Pilindavacchattheraapadānavaṇṇanā
ចត្តាលីសមវគ្គេ អបទានេ នគរេ ហំសវតិយាតិអាទិកំ អាយស្មតោ បិលិន្ទវច្ឆត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ ហំសវតីនគរេ ទោវារិកកុលេ និព្ពត្តោ មហទ្ធនោ មហាភោគោ អហោសិ។ សោ កោដិសន្និចិតធនរាសិំ ឱលោកេត្វា រហោ និសិន្នោ ‘‘ឥមំ សព្ពធនំ មយា សម្មា គហេត្វា គន្តុំ វដ្ដតី’’តិ ចិន្តេត្វា ‘‘ពុទ្ធប្បមុខស្ស ភិក្ខុសង្ឃស្ស សព្ពបរិក្ខារទានំ ទាតុំ វដ្ដតី’’តិ សន្និដ្ឋានំ កត្វា ឆត្តសតសហស្សំ អាទិំ កត្វា សព្ពបរិភោគបរិក្ខារានិបិ សតសហស្សវសេន ការេត្វា បទុមុត្តរំ ភគវន្តំ និមន្តេត្វា ពុទ្ធប្បមុខស្ស ភិក្ខុសង្ឃស្ស មហាទានំ អទាសិ។ ឯវំ សត្តាហំ ទានំ ទត្វា បរិយោសានទិវសេ និព្ពានាធិគមំ បត្ថេត្វា យាវជីវំ បុញ្ញានិ កត្វា ជីវិតបរិយោសានេ ទេវលោកេ និព្ពត្តោ ឆ កាមាវចរេ ទិព្ពសម្បត្តិយោ អនុភវិត្វា មនុស្សេសុ ច ចក្កវត្តិអាទិសម្បត្តិយោ អនុភវិត្វា ឥមស្មិំ ពុទ្ធុប្បាទេ ព្រាហ្មណកុលេ និព្ពត្តោ សព្ពសិប្បេសុ និប្ផត្តិំ បត្តោ គោត្តវសេន បិលិន្ទវច្ឆោតិ បាកដោ អហោសិ។
Cattālīsamavagge apadāne nagare haṃsavatiyātiādikaṃ āyasmato pilindavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare dovārikakule nibbatto mahaddhano mahābhogo ahosi. So koṭisannicitadhanarāsiṃ oloketvā raho nisinno ‘‘imaṃ sabbadhanaṃ mayā sammā gahetvā gantuṃ vaṭṭatī’’ti cintetvā ‘‘buddhappamukhassa bhikkhusaṅghassa sabbaparikkhāradānaṃ dātuṃ vaṭṭatī’’ti sanniṭṭhānaṃ katvā chattasatasahassaṃ ādiṃ katvā sabbaparibhogaparikkhārānipi satasahassavasena kāretvā padumuttaraṃ bhagavantaṃ nimantetvā buddhappamukhassa bhikkhusaṅghassa mahādānaṃ adāsi. Evaṃ sattāhaṃ dānaṃ datvā pariyosānadivase nibbānādhigamaṃ patthetvā yāvajīvaṃ puññāni katvā jīvitapariyosāne devaloke nibbatto cha kāmāvacare dibbasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde brāhmaṇakule nibbatto sabbasippesu nipphattiṃ patto gottavasena pilindavacchoti pākaṭo ahosi.
១. សោ ឯកទិវសំ សត្ថុ សន្តិកេ ធម្មទេសនំ សុត្វា បដិលទ្ធសទ្ធោ បព្ពជិត្វា នចិរស្សេវ អរហា ហុត្វា អត្តនោ បុព្ពកម្មំ សរិត្វា សោមនស្សជាតោ ឧទានវសេន តំ បកាសេន្តោ នគរេ ហំសវតិយាតិអាទិមាហ។ តស្សត្ថោ ហេដ្ឋា វុត្តោវ។ អាសិំ ទោវារិកោ អហន្តិ អហំ ហំសវតីនគរេ រញ្ញោ គេហទ្វារេ ទ្វារបាលកោ អាសិំ អហោសិន្តិ អត្ថោ។ អក្ខោភំ អមិតំ ភោគន្តិ រញ្ញោ វល្លភត្តា អញ្ញេហិ ខោភេតុំ ចាលេតុំ អសក្កុណេយ្យំ អមិតំ អបរិមាណភោគំ ធនំ មម ឃរេ សន្និចិតំ រាសីកតំ អហោសីតិ អត្ថោ។
1. So ekadivasaṃ satthu santike dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ saritvā somanassajāto udānavasena taṃ pakāsento nagare haṃsavatiyātiādimāha. Tassattho heṭṭhā vuttova. Āsiṃ dovāriko ahanti ahaṃ haṃsavatīnagare rañño gehadvāre dvārapālako āsiṃ ahosinti attho. Akkhobhaṃ amitaṃ bhoganti rañño vallabhattā aññehi khobhetuṃ cāletuṃ asakkuṇeyyaṃ amitaṃ aparimāṇabhogaṃ dhanaṃ mama ghare sannicitaṃ rāsīkataṃ ahosīti attho.
៣. ពហូ មេធិគតា ភោគាតិ អនេកា ភោគា មេ មយា អធិគតា បត្តា បដិលទ្ធាតិ អត្ថោ ។ សត្ថវាសិអាទីនំ បរិក្ខារានំ នាមានិ នយានុយោគេន សុវិញ្ញេយ្យានិ។ បរិក្ខារទានានិសំសានិ ច សុវិញ្ញេយ្យានេវាតិ។
3.Bahū medhigatā bhogāti anekā bhogā me mayā adhigatā pattā paṭiladdhāti attho . Satthavāsiādīnaṃ parikkhārānaṃ nāmāni nayānuyogena suviññeyyāni. Parikkhāradānānisaṃsāni ca suviññeyyānevāti.
បិលិន្ទវច្ឆត្ថេរអបទានវណ្ណនា សមត្តា។
Pilindavacchattheraapadānavaṇṇanā samattā.
ទុតិយតតិយចតុត្ថបញ្ចមាបទានានិ ឧត្តានានេវាតិ។
Dutiyatatiyacatutthapañcamāpadānāni uttānānevāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. បិលិន្ទវច្ឆត្ថេរអបទានំ • 1. Pilindavacchattheraapadānaṃ
