| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. ပေသလသုတ္တဝဏ္ဏနာ
3. Pesalasuttavaṇṇanā
၂၁၁. ဧတေသန္တိ ဧတေသံ မဟလ္လကာနံ။ န ပာဠိ အာဂစ္ဆတိ အပ္ပဂုဏဘာဝတော။ န စ ပာဠိ ဥပဋ္ဌာတိ, ဧကာယ ပာဠိယာ သတိ ပာဠိဂတိယာ တထာ တထာ ဥပဋ္ဌာနမ္ပိ နေသံ နတ္ထီတိ ဝဒတိ။ န အဋ္ဌကထာတိ ဧတ္ထာပိ ဧသေဝ နယော။ သိထိလဓနိတာဒိတံတံဗ္ယဉ္ဇနဗုဒ္ဓိံ အဟာပေတ္ဝာ ဥစ္စာရဏံ ပဒဗ္ယဉ္ဇနမဓုရတာ။ အတိက္ကမိတ္ဝာ မညတိ အညေ ဘိက္ခူ။ ဟီဠနဝသေန အဘိဘဝိတ္ဝာ ပဋိဘာနသုတေန အတ္တာနံ ပသံသတိ သမ္ဘာဝေတိ။ မာနသ္သ ပဝတ္တိတာယ သဟဇာတနိသ္သယာဒိပစ္စယဓမ္မာ တံသဟဘုဓမ္မာ။ မာနဝသေန ဝိပ္ပဋိသာရီ အဟုဝာ။ မာ အဟောသီတိ ယောဇနာ။ ဝဏ္ဏဘဏနန္တိ ပရေဟိ ကိရိယမာနံ ဂုဏာဘိတ္ထဝံ။ အခိလောတိ ပဉ္စစေတောခိလရဟိတော။ နိသ္သေသံ နဝဝိဓန္တိ နဝဝိဓမ္ပိ မာနံ ကသ္သစိ ဧကဒေသသ္သပိ အသေသတော။ ဝိဇ္ဇာယာတိ အဂ္ဂမဂ္ဂဝိဇ္ဇာယ။ အစ္စန္တမေဝ သမိတတာယ ဝူပသမိတတာယ သမိတာဝီ။
211.Etesanti etesaṃ mahallakānaṃ. Na pāḷi āgacchati appaguṇabhāvato. Na ca pāḷi upaṭṭhāti, ekāya pāḷiyā sati pāḷigatiyā tathā tathā upaṭṭhānampi nesaṃ natthīti vadati. Na aṭṭhakathāti etthāpi eseva nayo. Sithiladhanitāditaṃtaṃbyañjanabuddhiṃ ahāpetvā uccāraṇaṃ padabyañjanamadhuratā. Atikkamitvā maññati aññe bhikkhū. Hīḷanavasena abhibhavitvā paṭibhānasutena attānaṃ pasaṃsati sambhāveti. Mānassa pavattitāya sahajātanissayādipaccayadhammā taṃsahabhudhammā. Mānavasena vippaṭisārī ahuvā. Mā ahosīti yojanā. Vaṇṇabhaṇananti parehi kiriyamānaṃ guṇābhitthavaṃ. Akhiloti pañcacetokhilarahito. Nissesaṃ navavidhanti navavidhampi mānaṃ kassaci ekadesassapi asesato. Vijjāyāti aggamaggavijjāya. Accantameva samitatāya vūpasamitatāya samitāvī.
ပေသလသုတ္တဝဏ္ဏနာ နိဋ္ဌိတာ။
Pesalasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. ပေသလသုတ္တံ • 3. Pesalasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. ပေသလသုတ္တဝဏ္ဏနာ • 3. Pesalasuttavaṇṇanā
