| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. အာနန္ဒသုတ္တဝဏ္ဏနာ
4. Ānandasuttavaṇṇanā
၂၁၂. ရာဂောတိ ဧတ္ထ အာယသ္မတော ဝင္ဂီသသ္သ ရာဂသ္သ ဥပ္ပတ္တိယာ ကာရဏံ ဝိဘာဝေတုံ ‘‘အာယသ္မာ အာနန္ဒော’’တိအာဒိ ဝုတ္တံ။ တန္တိ အာနန္ဒတ္ထေရံ။ အာရမ္မဏံ ပရိဂ္ဂဟေတုန္တိ ကာယဝေဒနာဒိဘေဒံ အာရမ္မဏံ သတိဂောစရံ။ အသုဘဒုက္ခာဒိတော, ရူပာဒိဧကေကမေဝ ဝာ ဆဠာရမ္မဏံ အနိစ္စဒုက္ခာဒိတော ပရိဂ္ဂဏ္ဟိတုံ ပရိစ္ဆိဇ္ဇ ဇာနိတုံ။ ဣတ္ထိရူပာရမ္မဏေတိ ဣတ္ထိသန္တာနေ ရူပသဘာဝေ အာရမ္မဏေ။
212.Rāgoti ettha āyasmato vaṅgīsassa rāgassa uppattiyā kāraṇaṃ vibhāvetuṃ ‘‘āyasmā ānando’’tiādi vuttaṃ. Tanti ānandattheraṃ. Ārammaṇaṃ pariggahetunti kāyavedanādibhedaṃ ārammaṇaṃ satigocaraṃ. Asubhadukkhādito, rūpādiekekameva vā chaḷārammaṇaṃ aniccadukkhādito pariggaṇhituṃ paricchijja jānituṃ. Itthirūpārammaṇeti itthisantāne rūpasabhāve ārammaṇe.
နိဗ္ဗာပနန္တိ နိဗ္ဗာပယတိ ဧတေနာတိ နိဗ္ဗာပနံ။ ဝိပလ္လာသေနာတိ အသုဘေ ‘‘သုဘ’’န္တိ ဝိပလ္လာသဘာဝဟေတု။ ရာဂဋ္ဌာနိယန္တိ ရာဂုပ္ပတ္တိဟေတု။ ဣဋ္ဌာရမ္မဏန္တိ သုဘာရမ္မဏံ။ ဧတ္ထ စ ဣဋ္ဌာရမ္မဏသီသေန တတ္ထ ဣဋ္ဌာကာရဂ္ဂဟဏံ ဝဒတိ။ တဉ္ဟိ ဝဇ္ဇနီယံ။ ပရတောတိ အဝသဝတ္တနတ္ထေန အညတော။ သင္ခာရာ ဟိ ‘‘မာ ဘိဇ္ဇန္တူ’’တိ ဣစ္ဆိတာပိ ဘိဇ္ဇန္တေဝ, တသ္မာ တေ အဝသဝတ္တိတ္တာ ပရော နာမ, သာ စ နေသံ ပရတာ အနိစ္စဒသ္သနေန ပာကဋာ ဟောတီတိ ဝုတ္တံ ‘‘ပရတော ပသ္သာတိ အနိစ္စတော ပသ္သာ’’တိ။ ကာမံ ဝိပသ္သနာ သင္ခာရနိမိတ္တံ န ပရိစ္စဇတိ သင္ခာရေ အာရဗ္ဘ ဝတ္တနတော, ယေသံ ပန နိမိတ္တာနံ အဂ္ဂဟဏေန အနိမိတ္တာတိ ဂဟိတုံ အရဟတိ, တံ ဒသ္သေတုံ ‘‘နိစ္စာဒီနံ နိမိတ္တာန’’န္တိအာဒိ ဝုတ္တံ။ သလက္ခဏ-သာမညလက္ခဏ-ဒသ္သနဝသေန မာနသ္သ ဒသ္သနာဘိသမယော, ဝိပသ္သနာယ ပဟာနာဘိသမယော။ ‘‘မဂ္ဂေနာ’’တိ ဝဒန္တိ, မဂ္ဂေနေဝ ပန အသမ္မောဟတော ပရိညာပဋိဝေဓဝသေန ဒသ္သနာဘိသမယော, ပဟာနပဋိဝေဓဝသေန ပဟာနာဘိသမယော။ ရာဂာဒိသန္တတာယာတိ ရာဂာဒီနံ သမုစ္ဆေဒဝသေန ပဋိပ္ပသ္သဒ္ဓိဝသေန ဝူပသမေတဗ္ဗတော သန္တဘာဝေန။
Nibbāpananti nibbāpayati etenāti nibbāpanaṃ. Vipallāsenāti asubhe ‘‘subha’’nti vipallāsabhāvahetu. Rāgaṭṭhāniyanti rāguppattihetu. Iṭṭhārammaṇanti subhārammaṇaṃ. Ettha ca iṭṭhārammaṇasīsena tattha iṭṭhākāraggahaṇaṃ vadati. Tañhi vajjanīyaṃ. Paratoti avasavattanatthena aññato. Saṅkhārā hi ‘‘mā bhijjantū’’ti icchitāpi bhijjanteva, tasmā te avasavattittā paro nāma, sā ca nesaṃ paratā aniccadassanena pākaṭā hotīti vuttaṃ ‘‘parato passāti aniccato passā’’ti. Kāmaṃ vipassanā saṅkhāranimittaṃ na pariccajati saṅkhāre ārabbha vattanato, yesaṃ pana nimittānaṃ aggahaṇena animittāti gahituṃ arahati, taṃ dassetuṃ ‘‘niccādīnaṃ nimittāna’’ntiādi vuttaṃ. Salakkhaṇa-sāmaññalakkhaṇa-dassanavasena mānassa dassanābhisamayo, vipassanāya pahānābhisamayo. ‘‘Maggenā’’ti vadanti, maggeneva pana asammohato pariññāpaṭivedhavasena dassanābhisamayo, pahānapaṭivedhavasena pahānābhisamayo. Rāgādisantatāyāti rāgādīnaṃ samucchedavasena paṭippassaddhivasena vūpasametabbato santabhāvena.
အာနန္ဒသုတ္တဝဏ္ဏနာ နိဋ္ဌိတာ။
Ānandasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. အာနန္ဒသုတ္တံ • 4. Ānandasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. အာနန္ဒသုတ္တဝဏ္ဏနာ • 4. Ānandasuttavaṇṇanā
