| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. အာနန္ဒသုတ္တဝဏ္ဏနာ
4. Ānandasuttavaṇṇanā
၂၁၂. စတုတ္ထေ ရာဂောတိ အာယသ္မာ အာနန္ဒော မဟာပုညော သမ္ဘာဝိတော, တံ ရာဇရာဇမဟာမတ္တာဒယော နိမန္တေတ္ဝာ အန္တောနိဝေသနေ နိသီဒာပေန္တိ။ သဗ္ဗာလင္ကာရပဋိမဏ္ဍိတာပိ ဣတ္ထိယော ထေရံ ဥပသင္ကမိတ္ဝာ ဝန္ဒိတ္ဝာ တာလဝဏ္ဋေန ဗီဇေန္တိ, ဥပနိသီဒိတ္ဝာ ပဉ္ဟံ ပုစ္ဆန္တိ ဓမ္မံ သုဏန္တိ။ တတ္ထ အာယသ္မတော ဝင္ဂီသသ္သ နဝပဗ္ဗဇိတသ္သ အာရမ္မဏံ ပရိဂ္ဂဟေတုံ အသက္ကောန္တသ္သ ဣတ္ထိရူပာရမ္မဏေ ရာဂော စိတ္တံ အနုဒ္ဓံသေတိ။ သော သဒ္ဓာပဗ္ဗဇိတတ္တာ ဥဇုဇာတိကော ကုလပုတ္တော ‘‘အယံ မေ ရာဂော ဝဍ္ဎိတ္ဝာ ဒိဋ္ဌဓမ္မိကသမ္ပရာယိကံ အတ္ထံ နာသေယ္ယာ’’တိ စိန္တေတ္ဝာ အနန္တရံ နိသိန္နောဝ ထေရသ္သ အတ္တာနံ အာဝိကရောန္တော ကာမရာဂေနာတိအာဒိမာဟ။
212. Catutthe rāgoti āyasmā ānando mahāpuñño sambhāvito, taṃ rājarājamahāmattādayo nimantetvā antonivesane nisīdāpenti. Sabbālaṅkārapaṭimaṇḍitāpi itthiyo theraṃ upasaṅkamitvā vanditvā tālavaṇṭena bījenti, upanisīditvā pañhaṃ pucchanti dhammaṃ suṇanti. Tattha āyasmato vaṅgīsassa navapabbajitassa ārammaṇaṃ pariggahetuṃ asakkontassa itthirūpārammaṇe rāgo cittaṃ anuddhaṃseti. So saddhāpabbajitattā ujujātiko kulaputto ‘‘ayaṃ me rāgo vaḍḍhitvā diṭṭhadhammikasamparāyikaṃ atthaṃ nāseyyā’’ti cintetvā anantaraṃ nisinnova therassa attānaṃ āvikaronto kāmarāgenātiādimāha.
တတ္ထ နိဗ္ဗာပနန္တိ ရာဂနိဗ္ဗာနကာရဏံ။ ဝိပရိယေသာတိ ဝိပလ္လာသေန။ သုဘံ ရာဂူပသဉ္ဟိတန္တိ ရာဂဋ္ဌာနိယံ ဣဋ္ဌာရမ္မဏံ။ ပရတော ပသ္သာတိ အနိစ္စတော ပသ္သ။ မာ စ အတ္တတောတိ အတ္တတော မာ ပသ္သ။ ကာယဂတာ တ္ယတ္ထူတိ ကာယဂတာ တေ အတ္ထု။ အနိမိတ္တဉ္စ ဘာဝေဟီတိ နိစ္စာဒီနံ နိမိတ္တာနံ ဥဂ္ဃာဋိတတ္တာ ဝိပသ္သနာ အနိမိတ္တာ နာမ, တံ ဘာဝေဟီတိ ဝဒတိ။ မာနာဘိသမယာတိ မာနသ္သ ဒသ္သနာဘိသမယာ စေဝ ပဟာနာဘိသမယာ စ။ ဥပသန္တောတိ ရာဂာဒိသန္တတာယ ဥပသန္တော။ စတုတ္ထံ။
Tattha nibbāpananti rāganibbānakāraṇaṃ. Vipariyesāti vipallāsena. Subhaṃ rāgūpasañhitanti rāgaṭṭhāniyaṃ iṭṭhārammaṇaṃ. Parato passāti aniccato passa. Mā ca attatoti attato mā passa. Kāyagatā tyatthūti kāyagatā te atthu. Animittañca bhāvehīti niccādīnaṃ nimittānaṃ ugghāṭitattā vipassanā animittā nāma, taṃ bhāvehīti vadati. Mānābhisamayāti mānassa dassanābhisamayā ceva pahānābhisamayā ca. Upasantoti rāgādisantatāya upasanto. Catutthaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. အာနန္ဒသုတ္တံ • 4. Ānandasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. အာနန္ဒသုတ္တဝဏ္ဏနာ • 4. Ānandasuttavaṇṇanā
