| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៩. បឋមបជ្ជុន្នធីតុសុត្តំ
9. Paṭhamapajjunnadhītusuttaṃ
៣៩. ឯវំ មេ សុតំ – ឯកំ សមយំ ភគវា វេសាលិយំ វិហរតិ មហាវនេ កូដាគារសាលាយំ។ អថ ខោ កោកនទា បជ្ជុន្នស្ស ធីតា អភិក្កន្តាយ រត្តិយា អភិក្កន្តវណ្ណា កេវលកប្បំ មហាវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ។ ឯកមន្តំ ឋិតា ខោ សា ទេវតា កោកនទា បជ្ជុន្នស្ស ធីតា ភគវតោ សន្តិកេ ឥមា គាថាយោ អភាសិ –
39. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho kokanadā pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā kokanadā pajjunnassa dhītā bhagavato santike imā gāthāyo abhāsi –
‘‘វេសាលិយំ វនេ វិហរន្តំ, អគ្គំ សត្តស្ស សម្ពុទ្ធំ;
‘‘Vesāliyaṃ vane viharantaṃ, aggaṃ sattassa sambuddhaṃ;
កោកនទាហមស្មិ អភិវន្ទេ, កោកនទា បជ្ជុន្នស្ស ធីតា។
Kokanadāhamasmi abhivande, kokanadā pajjunnassa dhītā.
‘‘សុតមេវ បុរេ អាសិ, ធម្មោ ចក្ខុមតានុពុទ្ធោ;
‘‘Sutameva pure āsi, dhammo cakkhumatānubuddho;
សាហំ ទានិ សក្ខិ ជានាមិ, មុនិនោ ទេសយតោ សុគតស្ស។
Sāhaṃ dāni sakkhi jānāmi, munino desayato sugatassa.
‘‘យេ កេចិ អរិយំ ធម្មំ, វិគរហន្តា ចរន្តិ ទុម្មេធា;
‘‘Ye keci ariyaṃ dhammaṃ, vigarahantā caranti dummedhā;
ឧបេន្តិ រោរុវំ ឃោរំ, ចិររត្តំ ទុក្ខំ អនុភវន្តិ។
Upenti roruvaṃ ghoraṃ, cirarattaṃ dukkhaṃ anubhavanti.
‘‘យេ ច ខោ អរិយេ ធម្មេ, ខន្តិយា ឧបសមេន ឧបេតា;
‘‘Ye ca kho ariye dhamme, khantiyā upasamena upetā;
បហាយ មានុសំ ទេហំ, ទេវកាយ បរិបូរេស្សន្តី’’តិ។
Pahāya mānusaṃ dehaṃ, devakāya paripūressantī’’ti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. បឋមបជ្ជុន្នធីតុសុត្តវណ្ណនា • 9. Paṭhamapajjunnadhītusuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៩. បឋមបជ្ជុន្នធីតុសុត្តវណ្ណនា • 9. Paṭhamapajjunnadhītusuttavaṇṇanā
