| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. ទុតិយបជ្ជុន្នធីតុសុត្តំ
10. Dutiyapajjunnadhītusuttaṃ
៤០. ឯវំ មេ សុតំ – ឯកំ សមយំ ភគវា វេសាលិយំ វិហរតិ មហាវនេ កូដាគារសាលាយំ។ អថ ខោ ចូឡកោកនទា 1 បជ្ជុន្នស្ស ធីតា អភិក្កន្តាយ រត្តិយា អភិក្កន្តវណ្ណា កេវលកប្បំ មហាវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ។ ឯកមន្តំ ឋិតា ខោ សា ទេវតា ចូឡកោកនទា បជ្ជុន្នស្ស ធីតា ភគវតោ សន្តិកេ ឥមា គាថាយោ អភាសិ –
40. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho cūḷakokanadā 2 pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā cūḷakokanadā pajjunnassa dhītā bhagavato santike imā gāthāyo abhāsi –
‘‘ឥធាគមា វិជ្ជុបភាសវណ្ណា, កោកនទា បជ្ជុន្នស្ស ធីតា;
‘‘Idhāgamā vijjupabhāsavaṇṇā, kokanadā pajjunnassa dhītā;
ពុទ្ធញ្ច ធម្មញ្ច នមស្សមានា, គាថាចិមា អត្ថវតី អភាសិ។
Buddhañca dhammañca namassamānā, gāthācimā atthavatī abhāsi.
‘‘ពហុនាបិ ខោ តំ វិភជេយ្យំ, បរិយាយេន តាទិសោ ធម្មោ;
‘‘Bahunāpi kho taṃ vibhajeyyaṃ, pariyāyena tādiso dhammo;
សំខិត្តមត្ថំ 3 លបយិស្សាមិ, យាវតា មេ មនសា បរិយត្តំ។
Saṃkhittamatthaṃ 4 lapayissāmi, yāvatā me manasā pariyattaṃ.
‘‘បាបំ ន កយិរា វចសា មនសា,
‘‘Pāpaṃ na kayirā vacasā manasā,
កាយេន វា កិញ្ចន សព្ពលោកេ;
Kāyena vā kiñcana sabbaloke;
កាមេ បហាយ សតិមា សម្បជានោ,
Kāme pahāya satimā sampajāno,
ទុក្ខំ ន សេវេថ អនត្ថសំហិត’’ន្តិ។
Dukkhaṃ na sevetha anatthasaṃhita’’nti.
សតុល្លបកាយិកវគ្គោ ចតុត្ថោ។
Satullapakāyikavaggo catuttho.
តស្សុទ្ទានំ –
Tassuddānaṃ –
សព្ភិមច្ឆរិនា សាធុ, ន សន្តុជ្ឈានសញ្ញិនោ;
Sabbhimaccharinā sādhu, na santujjhānasaññino;
សទ្ធា សមយោ សកលិកំ, ឧភោ បជ្ជុន្នធីតរោតិ។
Saddhā samayo sakalikaṃ, ubho pajjunnadhītaroti.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. ទុតិយបជ្ជុន្នធីតុសុត្តវណ្ណនា • 10. Dutiyapajjunnadhītusuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. ទុតិយបជ្ជុន្នធីតុសុត្តវណ្ណនា • 10. Dutiyapajjunnadhītusuttavaṇṇanā
