| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၉. ပဌမအာယုသုတ္တဝဏ္ဏနာ
9. Paṭhamaāyusuttavaṇṇanā
၁၄၅. ပဏ္ဏာသံ ဝာ ဝသ္သာနိ ဇီဝတိ ဝသ္သသတတော ဥပရိ သေယ္ယထာပိ ထေရော အနုရုဒ္ဓော။ သဋ္ဌိ ဝာ ဝသ္သာနိ သေယ္ယထာပိ ထေရော ဗာကုလော။ ပဋိဟရိတ္ဝာ ပစ္စနီကဘာဝေ သာတံ သုခံ ဧတသ္သာတိ ပစ္စနီကသာတော, တဗ္ဘာဝော ပစ္စနီကသာတတာ, တာယ။ အဘိဘဝိတ္ဝာ အဘာသိ ပဋိဝစနံ ဇာနမာနောဝ။
145.Paṇṇāsaṃvā vassāni jīvati vassasatato upari seyyathāpi thero anuruddho. Saṭṭhi vā vassāni seyyathāpi thero bākulo. Paṭiharitvā paccanīkabhāve sātaṃ sukhaṃ etassāti paccanīkasāto, tabbhāvo paccanīkasātatā, tāya. Abhibhavitvā abhāsi paṭivacanaṃ jānamānova.
န ဟီဠေယ္ယ န ဇိဂုစ္ဆေယ္ယ။ ဧဝန္တိ သော ဒာရကော ဝိယ ကိဉ္စိ အစိန္တေန္တော သပ္ပုရိသော စရေယ္ယ, ဧဝံ ဟိသ္သ စိတ္တဒုက္ခံ န ဟောတီတိ အဓိပ္ပာယော။ ပဇ္ဇလိတသီသော ဝိယ စရေယ္ယာတိ ယထာ ပဇ္ဇလိတသီသော ပုရိသော အညံ ကိဉ္စိ အကတ္ဝာ တသ္သေဝ ဝူပသမာယ ဝာယမေယ္ယ, ဧဝံ သပ္ပုရိသော အာယုံ ပရိတ္တန္တိ ဉတ္ဝာ တေနေဝ နယေန သဗ္ဗသင္ခာရဂတံ အနိစ္စံ, အနိစ္စတ္တာ ဧဝ ဒုက္ခံ, အနတ္တာတိ ဝိပသ္သနမ္ပိ ဩတရိတ္ဝာ တံ ဥသ္သုက္ကာပေန္တောပိ သင္ခာရဝိဂမာယ စရေယ္ယ ပဋိပဇ္ဇေယ္ယ။
Na hīḷeyya na jiguccheyya. Evanti so dārako viya kiñci acintento sappuriso careyya, evaṃ hissa cittadukkhaṃ na hotīti adhippāyo. Pajjalitasīso viya careyyāti yathā pajjalitasīso puriso aññaṃ kiñci akatvā tasseva vūpasamāya vāyameyya, evaṃ sappuriso āyuṃ parittanti ñatvā teneva nayena sabbasaṅkhāragataṃ aniccaṃ, aniccattā eva dukkhaṃ, anattāti vipassanampi otaritvā taṃ ussukkāpentopi saṅkhāravigamāya careyya paṭipajjeyya.
ပဌမအာယုသုတ္တဝဏ္ဏနာ နိဋ္ဌိတာ။
Paṭhamaāyusuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၉. ပဌမအာယုသုတ္တံ • 9. Paṭhamaāyusuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉. ပဌမအာယုသုတ္တဝဏ္ဏနာ • 9. Paṭhamaāyusuttavaṇṇanā
