| Library / Tipiṭaka / तिपिटक • Tipiṭaka / परिवारपाळि • Parivārapāḷi |
२. पाराजिकादिपञ्हा
2. Pārājikādipañhā
४८०.
480.
इत्थी च अब्भन्तरे सिया,
Itthī ca abbhantare siyā,
भिक्खु च बहिद्धा सिया।
Bhikkhu ca bahiddhā siyā;
छिद्दं तस्मिं घरे नत्थि।
Chiddaṃ tasmiṃ ghare natthi;
मेथुनधम्मपच्चया।
Methunadhammapaccayā;
कथं पाराजिको सिया।
Kathaṃ pārājiko siyā;
पञ्हा मेसा कुसलेहि चिन्तिता॥
Pañhā mesā kusalehi cintitā.
तेलं मधुं फाणितञ्चापि सप्पिं।
Telaṃ madhuṃ phāṇitañcāpi sappiṃ;
सामं गहेत्वान निक्खिपेय्य।
Sāmaṃ gahetvāna nikkhipeyya;
अवीतिवत्ते सत्ताहे।
Avītivatte sattāhe;
सति पच्चये परिभुञ्जन्तस्स आपत्ति।
Sati paccaye paribhuñjantassa āpatti;
पञ्हा मेसा कुसलेहि चिन्तिता॥
Pañhā mesā kusalehi cintitā.
निस्सग्गियेन आपत्ति।
Nissaggiyena āpatti;
सुद्धकेन पाचित्तियं।
Suddhakena pācittiyaṃ;
आपज्जन्तस्स एकतो।
Āpajjantassa ekato;
पञ्हा मेसा कुसलेहि चिन्तिता॥
Pañhā mesā kusalehi cintitā.
भिक्खू सिया वीसतिया समागता।
Bhikkhū siyā vīsatiyā samāgatā;
कम्मं करेय्युं समग्गसञ्ञिनो।
Kammaṃ kareyyuṃ samaggasaññino;
भिक्खु सिया द्वादसयोजने ठितो।
Bhikkhu siyā dvādasayojane ṭhito;
कम्मञ्च तं कुप्पेय्य वग्गपच्चया।
Kammañca taṃ kuppeyya vaggapaccayā;
पञ्हा मेसा कुसलेहि चिन्तिता॥
Pañhā mesā kusalehi cintitā.
पदवीतिहारमत्तेन वाचाय भणितेन च।
Padavītihāramattena vācāya bhaṇitena ca;
सब्बानि गरुकानि सप्पटिकम्मानि।
Sabbāni garukāni sappaṭikammāni;
चतुसट्ठि आपत्तियो आपज्जेय्य एकतो।
Catusaṭṭhi āpattiyo āpajjeyya ekato;
पञ्हा मेसा कुसलेहि चिन्तिता॥
Pañhā mesā kusalehi cintitā.
निवत्थो अन्तरवासकेन।
Nivattho antaravāsakena;
दिगुणं सङ्घाटिं पारुतो।
Diguṇaṃ saṅghāṭiṃ pāruto;
सब्बानि तानि निस्सग्गियानि होन्ति।
Sabbāni tāni nissaggiyāni honti;
पञ्हा मेसा कुसलेहि चिन्तिता॥
Pañhā mesā kusalehi cintitā.
न चापि ञत्ति न च पन कम्मवाचा।
Na cāpi ñatti na ca pana kammavācā;
न चेहि भिक्खूति जिनो अवोच।
Na cehi bhikkhūti jino avoca;
सरणगमनम्पि न तस्स अत्थि।
Saraṇagamanampi na tassa atthi;
उपसम्पदा चस्स अकुप्पा।
Upasampadā cassa akuppā;
पञ्हा मेसा कुसलेहि चिन्तिता॥
Pañhā mesā kusalehi cintitā.
इत्थिं हने न मातरं, पुरिसञ्च न पितरं हने।
Itthiṃ hane na mātaraṃ, purisañca na pitaraṃ hane;
हनेय्य अनरियं मन्दो, तेन चानन्तरं फुसे।
Haneyya anariyaṃ mando, tena cānantaraṃ phuse;
पञ्हा मेसा कुसलेहि चिन्तिता॥
Pañhā mesā kusalehi cintitā.
इत्थिं हने च मातरं, पुरिसञ्च पितरं हने।
Itthiṃ hane ca mātaraṃ, purisañca pitaraṃ hane;
मातरं पितरं हन्त्वा, न तेनानन्तरं फुसे।
Mātaraṃ pitaraṃ hantvā, na tenānantaraṃ phuse;
पञ्हा मेसा कुसलेहि चिन्तिता॥
Pañhā mesā kusalehi cintitā.
अचोदयित्वा अस्सारयित्वा।
Acodayitvā assārayitvā;
असम्मुखीभूतस्स करेय्य कम्मं।
Asammukhībhūtassa kareyya kammaṃ;
कतञ्च कम्मं सुकतं भवेय्य।
Katañca kammaṃ sukataṃ bhaveyya;
कारको च सङ्घो अनापत्तिको सिया।
Kārako ca saṅgho anāpattiko siyā;
पञ्हा मेसा कुसलेहि चिन्तिता॥
Pañhā mesā kusalehi cintitā.
चोदयित्वा सारयित्वा।
Codayitvā sārayitvā;
सम्मुखीभूतस्स करेय्य कम्मं।
Sammukhībhūtassa kareyya kammaṃ;
कतञ्च कम्मं अकतं भवेय्य।
Katañca kammaṃ akataṃ bhaveyya;
कारको च सङ्घो सापत्तिको सिया।
Kārako ca saṅgho sāpattiko siyā;
पञ्हा मेसा कुसलेहि चिन्तिता॥
Pañhā mesā kusalehi cintitā.
छिन्दन्तस्स आपत्ति, छिन्दन्तस्स अनापत्ति।
Chindantassa āpatti, chindantassa anāpatti;
छादेन्तस्स आपत्ति, छादेन्तस्स अनापत्ति।
Chādentassa āpatti, chādentassa anāpatti;
पञ्हा मेसा कुसलेहि चिन्तिता॥
Pañhā mesā kusalehi cintitā.
सच्चं भणन्तो गरुकं, मुसा च लहु भासतो।
Saccaṃ bhaṇanto garukaṃ, musā ca lahu bhāsato;
मुसा भणन्तो गरुकं, सच्चञ्च लहु भासतो।
Musā bhaṇanto garukaṃ, saccañca lahu bhāsato;
पञ्हा मेसा कुसलेहि चिन्तिता॥
Pañhā mesā kusalehi cintitā.
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / (२) पाराजिकादिपञ्हावण्णना • (2) Pārājikādipañhāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पाराजिकादिपञ्हवण्णना • Pārājikādipañhavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / पाराजिकादिपञ्हावण्णना • Pārājikādipañhāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / पाराजिकादिपञ्हावण्णना • Pārājikādipañhāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / (२) पाराजिकादिपञ्हावण्णना • (2) Pārājikādipañhāvaṇṇanā
