| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
៥. បារាជិកាទិអាបត្តិ
5. Pārājikādiāpatti
៣៣៩.
339.
‘បារាជិក’ន្តិ យំ វុត្តំ, តំ សុណោហិ យថាតថំ;
‘Pārājika’nti yaṃ vuttaṃ, taṃ suṇohi yathātathaṃ;
ចុតោ បរទ្ធោ ភដ្ឋោ ច, សទ្ធម្មា ហិ និរង្កតោ;
Cuto paraddho bhaṭṭho ca, saddhammā hi niraṅkato;
សំវាសោបិ តហិំ នត្ថិ, តេនេតំ ឥតិ វុច្ចតិ។
Saṃvāsopi tahiṃ natthi, tenetaṃ iti vuccati.
‘សង្ឃាទិសេសោ’តិ យំ វុត្តំ, តំ សុណោហិ យថាតថំ;
‘Saṅghādiseso’ti yaṃ vuttaṃ, taṃ suṇohi yathātathaṃ;
សង្ឃោវ ទេតិ បរិវាសំ, មូលាយ បដិកស្សតិ;
Saṅghova deti parivāsaṃ, mūlāya paṭikassati;
មានត្តំ ទេតិ អព្ភេតិ, តេនេតំ ឥតិ វុច្ចតិ។
Mānattaṃ deti abbheti, tenetaṃ iti vuccati.
‘អនិយតោ’តិ យំ វុត្តំ, តំ សុណោហិ យថាតថំ;
‘Aniyato’ti yaṃ vuttaṃ, taṃ suṇohi yathātathaṃ;
អនិយតោ ន និយតោ, អនេកំសិកតំ បទំ;
Aniyato na niyato, anekaṃsikataṃ padaṃ;
តិណ្ណមញ្ញតរំ ឋានំ, ‘អនិយតោ’តិ បវុច្ចតិ។
Tiṇṇamaññataraṃ ṭhānaṃ, ‘aniyato’ti pavuccati.
‘ថុល្លច្ចយ’ន្តិ យំ វុត្តំ, តំ សុណោហិ យថាតថំ;
‘Thullaccaya’nti yaṃ vuttaṃ, taṃ suṇohi yathātathaṃ;
ឯកស្ស មូលេ យោ ទេសេតិ, យោ ច តំ បដិគណ្ហតិ;
Ekassa mūle yo deseti, yo ca taṃ paṭigaṇhati;
អច្ចយោ តេន សមោ នត្ថិ, តេនេតំ ឥតិ វុច្ចតិ។
Accayo tena samo natthi, tenetaṃ iti vuccati.
‘និស្សគ្គិយ’ន្តិ យំ វុត្តំ, តំ សុណោហិ យថាតថំ;
‘Nissaggiya’nti yaṃ vuttaṃ, taṃ suṇohi yathātathaṃ;
សង្ឃមជ្ឈេ គណមជ្ឈេ, ឯកស្សេវ ច ឯកតោ;
Saṅghamajjhe gaṇamajjhe, ekasseva ca ekato;
និស្សជ្ជិត្វាន ទេសេតិ, តេនេតំ ឥតិ វុច្ចតិ។
Nissajjitvāna deseti, tenetaṃ iti vuccati.
‘បាចិត្តិយ’ន្តិ យំ វុត្តំ, តំ សុណោហិ យថាតថំ;
‘Pācittiya’nti yaṃ vuttaṃ, taṃ suṇohi yathātathaṃ;
បាតេតិ កុសលំ ធម្មំ, អរិយមគ្គំ អបរជ្ឈតិ;
Pāteti kusalaṃ dhammaṃ, ariyamaggaṃ aparajjhati;
ចិត្តសំមោហនដ្ឋានំ, តេនេតំ ឥតិ វុច្ចតិ។
Cittasaṃmohanaṭṭhānaṃ, tenetaṃ iti vuccati.
‘បាដិទេសនីយ’ន្តិ យំ វុត្តំ, តំ សុណោហិ យថាតថំ;
‘Pāṭidesanīya’nti yaṃ vuttaṃ, taṃ suṇohi yathātathaṃ;
ភិក្ខុ អញ្ញាតកោ សន្តោ, កិច្ឆា លទ្ធាយ ភោជនំ;
Bhikkhu aññātako santo, kicchā laddhāya bhojanaṃ;
សាមំ គហេត្វា ភុញ្ជេយ្យ, ‘គារយ្ហ’ន្តិ បវុច្ចតិ។
Sāmaṃ gahetvā bhuñjeyya, ‘gārayha’nti pavuccati.
និមន្តនាសុ ភុញ្ជន្តា ឆន្ទាយ, វោសាសតិ តត្ថ ភិក្ខុនិំ;
Nimantanāsu bhuñjantā chandāya, vosāsati tattha bhikkhuniṃ;
អនិវារេត្វា តហិំ ភុញ្ជេ, គារយ្ហន្តិ បវុច្ចតិ។
Anivāretvā tahiṃ bhuñje, gārayhanti pavuccati.
អគិលានោ តហិំ ភុញ្ជេ, គារយ្ហន្តិ បវុច្ចតិ។
Agilāno tahiṃ bhuñje, gārayhanti pavuccati.
យោ ចេ អរញ្ញេ វិហរន្តោ, សាសង្កេ សភយានកេ;
Yo ce araññe viharanto, sāsaṅke sabhayānake;
អវិទិតំ តហិំ ភុញ្ជេ, គារយ្ហន្តិ បវុច្ចតិ។
Aviditaṃ tahiṃ bhuñje, gārayhanti pavuccati.
ភិក្ខុនី អញ្ញាតិកា សន្តា, យំ បរេសំ មមាយិតំ;
Bhikkhunī aññātikā santā, yaṃ paresaṃ mamāyitaṃ;
សប្បិ តេលំ មធុំ ផាណិតំ, មច្ឆមំសំ អថោ ខីរំ;
Sappi telaṃ madhuṃ phāṇitaṃ, macchamaṃsaṃ atho khīraṃ;
ទធិំ សយំ វិញ្ញាបេយ្យ ភិក្ខុនី, គារយ្ហបត្តា សុគតស្ស សាសនេ។
Dadhiṃ sayaṃ viññāpeyya bhikkhunī, gārayhapattā sugatassa sāsane.
‘ទុក្កដ’ន្តិ យំ វុត្តំ, តំ សុណោហិ យថាតថំ;
‘Dukkaṭa’nti yaṃ vuttaṃ, taṃ suṇohi yathātathaṃ;
អបរទ្ធំ វិរទ្ធញ្ច, ខលិតំ យញ្ច ទុក្កដំ។
Aparaddhaṃ viraddhañca, khalitaṃ yañca dukkaṭaṃ.
យំ មនុស្សោ ករេ បាបំ, អាវិ វា យទិ វា រហោ;
Yaṃ manusso kare pāpaṃ, āvi vā yadi vā raho;
‘ទុក្កដ’ន្តិ បវេទេន្តិ, តេនេតំ ឥតិ វុច្ចតិ។
‘Dukkaṭa’nti pavedenti, tenetaṃ iti vuccati.
‘ទុព្ភាសិត’ន្តិ យំ វុត្តំ, តំ សុណោហិ យថាតថំ;
‘Dubbhāsita’nti yaṃ vuttaṃ, taṃ suṇohi yathātathaṃ;
ទុព្ភាសិតំ ទុរាភដ្ឋំ, សំកិលិដ្ឋញ្ច យំ បទំ;
Dubbhāsitaṃ durābhaṭṭhaṃ, saṃkiliṭṭhañca yaṃ padaṃ;
យញ្ច វិញ្ញូ គរហន្តិ, តេនេតំ ឥតិ វុច្ចតិ។
Yañca viññū garahanti, tenetaṃ iti vuccati.
‘សេខិយ’ន្តិ យំ វុត្តំ, តំ សុណោហិ យថាតថំ;
‘Sekhiya’nti yaṃ vuttaṃ, taṃ suṇohi yathātathaṃ;
សេក្ខស្ស សិក្ខមានស្ស, ឧជុមគ្គានុសារិនោ។
Sekkhassa sikkhamānassa, ujumaggānusārino.
អាទិ ចេតំ ចរណញ្ច, មុខំ សញ្ញមសំវរោ;
Ādi cetaṃ caraṇañca, mukhaṃ saññamasaṃvaro;
សិក្ខា ឯតាទិសី នត្ថិ, តេនេតំ ឥតិ វុច្ចតិ។
Sikkhā etādisī natthi, tenetaṃ iti vuccati.
តស្មា ឆន្នំ វិវរេថ, ឯវំ តំ នាតិវស្សតិ។
Tasmā channaṃ vivaretha, evaṃ taṃ nātivassati.
គតិ មិគានំ បវនំ, អាកាសោ បក្ខិនំ គតិ;
Gati migānaṃ pavanaṃ, ākāso pakkhinaṃ gati;
វិភវោ គតិ ធម្មានំ, និព្ពានំ អរហតោ គតីតិ។
Vibhavo gati dhammānaṃ, nibbānaṃ arahato gatīti.
គាថាសង្គណិកំ។
Gāthāsaṅgaṇikaṃ.
តស្សុទ្ទានំ –
Tassuddānaṃ –
សត្តនគរេសុ បញ្ញត្តា, វិបត្តិ ចតុរោបិ ច;
Sattanagaresu paññattā, vipatti caturopi ca;
ភិក្ខូនំ ភិក្ខុនីនញ្ច, សាធារណា អសាធារណា;
Bhikkhūnaṃ bhikkhunīnañca, sādhāraṇā asādhāraṇā;
សាសនំ អនុគ្គហាយ, គាថាសង្គណិកំ ឥទន្តិ។
Sāsanaṃ anuggahāya, gāthāsaṅgaṇikaṃ idanti.
គាថាសង្គណិកំ និដ្ឋិតំ។
Gāthāsaṅgaṇikaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / បារាជិកាទិអាបត្តិវណ្ណនា • Pārājikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / អសាធារណាទិវណ្ណនា • Asādhāraṇādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បារាជិកាទិអាបត្តិវណ្ណនា • Pārājikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / បារាជិកាទិអាបត្តិវណ្ណនា • Pārājikādiāpattivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / បារាជិកាទិអាបត្តិវណ្ណនា • Pārājikādiāpattivaṇṇanā
