| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១១២. បហិតេយេវ អនុជាននា
112. Pahiteyeva anujānanā
១៩៩ . ឥធ បន, ភិក្ខវេ, ភិក្ខុស្ស ភាតា គិលានោ ហោតិ។ សោ ចេ ភាតុនោ សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆតុ មេ ភាតា, ឥច្ឆាមិ ភាតុនោ អាគត’’ន្តិ, គន្តព្ពំ, ភិក្ខវេ , សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។
199. Idha pana, bhikkhave, bhikkhussa bhātā gilāno hoti. So ce bhātuno santike dūtaṃ pahiṇeyya – ‘‘ahañhi gilāno, āgacchatu me bhātā, icchāmi bhātuno āgata’’nti, gantabbaṃ, bhikkhave , sattāhakaraṇīyena, pahite, na tveva appahite. Sattāhaṃ sannivatto kātabbo.
ឥធ បន, ភិក្ខវេ, ភិក្ខុស្ស ភគិនី គិលានា ហោតិ។ សា ចេ ភាតុនោ សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆតុ មេ ភាតា, ឥច្ឆាមិ ភាតុនោ អាគត’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។
Idha pana, bhikkhave, bhikkhussa bhaginī gilānā hoti. Sā ce bhātuno santike dūtaṃ pahiṇeyya – ‘‘ahañhi gilānā, āgacchatu me bhātā, icchāmi bhātuno āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ឥធ បន, ភិក្ខវេ, ភិក្ខុស្ស ញាតកោ គិលានោ ហោតិ។ សោ ចេ ភិក្ខុស្ស សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆតុ ភទន្តោ, ឥច្ឆាមិ ភទន្តស្ស អាគត’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។
Idha pana, bhikkhave, bhikkhussa ñātako gilāno hoti. So ce bhikkhussa santike dūtaṃ pahiṇeyya – ‘‘ahañhi gilāno, āgacchatu bhadanto, icchāmi bhadantassa āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ឥធ បន, ភិក្ខវេ, ភិក្ខុគតិកោ គិលានោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆន្តុ ភទន្តា, ឥច្ឆាមិ ភទន្តានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។
Idha pana, bhikkhave, bhikkhugatiko gilāno hoti. So ce bhikkhūnaṃ santike dūtaṃ pahiṇeyya – ‘‘ahañhi gilāno, āgacchantu bhadantā, icchāmi bhadantānaṃ āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
តេន ខោ បន សមយេន សង្ឃស្ស វិហារោ ឧន្ទ្រិយតិ។ អញ្ញតរេន ឧបាសកេន អរញ្ញេ ភណ្ឌំ ឆេទាបិតំ ហោតិ។ សោ ភិក្ខូនំ សន្តិកេ ទូតំ បាហេសិ – ‘‘សចេ ភទន្តា តំ ភណ្ឌំ អាវហាបេយ្យុំ, ទជ្ជាហំ តំ ភណ្ឌ’’ន្តិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, សង្ឃករណីយេន គន្តុំ។ សត្តាហំ សន្និវត្តោ កាតព្ពោតិ។
Tena kho pana samayena saṅghassa vihāro undriyati. Aññatarena upāsakena araññe bhaṇḍaṃ chedāpitaṃ hoti. So bhikkhūnaṃ santike dūtaṃ pāhesi – ‘‘sace bhadantā taṃ bhaṇḍaṃ āvahāpeyyuṃ, dajjāhaṃ taṃ bhaṇḍa’’nti. Bhagavato etamatthaṃ ārocesuṃ. Anujānāmi, bhikkhave, saṅghakaraṇīyena gantuṃ. Sattāhaṃ sannivatto kātabboti.
បហិតេយេវ អនុជាននា និដ្ឋិតា។
Pahiteyeva anujānanā niṭṭhitā.
វស្សាវាសភាណវារោ និដ្ឋិតោ។
Vassāvāsabhāṇavāro niṭṭhito.
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / បហិតេយេវអនុជាននកថា • Pahiteyevaanujānanakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បហិតេយេវ អនុជាននកថាវណ្ណនា • Pahiteyeva anujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បហិតេយេវអនុជាននកថាវណ្ណនា • Pahiteyevaanujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / បហិតេយេវអនុជាននកថាវណ្ណនា • Pahiteyevaanujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១១២. បហិតេយេវអនុជាននកថា • 112. Pahiteyevaanujānanakathā
