| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៤. បហារសិក្ខាបទវណ្ណនា
4. Pahārasikkhāpadavaṇṇanā
៤៤៩. ចតុត្ថេ – បហារំ ទេន្តីតិ ‘‘អាវុសោ បីឋកំ បញ្ញបេថ, បាទធោវនំ អាហរថា’’តិអាទីនិ វត្វា តថា អករោន្តានំ បហារំ ទេន្តិ។
449. Catutthe – pahāraṃ dentīti ‘‘āvuso pīṭhakaṃ paññapetha, pādadhovanaṃ āharathā’’tiādīni vatvā tathā akarontānaṃ pahāraṃ denti.
៤៥១. បហារំ ទេតិ អាបត្តិ បាចិត្តិយស្សាតិ ឯត្ថ បហរិតុកាមតាយ បហារេ ទិន្នេ សចេបិ មរតិ បាចិត្តិយមេវ។ បហារេន ហត្ថោ វា បាទោ វា ភិជ្ជតិ, សីសំ វា ភិន្នំ ហោតិ, បាចិត្តិយមេវ។ ‘‘យថាយំ សង្ឃមជ្ឈេ ន វិរោចតិ, តថា នំ ករោមី’’តិ ឯវំ វិរូបករណាធិប្បាយេន កណ្ណំ វា នាសំ វា ឆិន្ទតិ, ទុក្កដំ។
451.Pahāraṃ deti āpatti pācittiyassāti ettha paharitukāmatāya pahāre dinne sacepi marati pācittiyameva. Pahārena hattho vā pādo vā bhijjati, sīsaṃ vā bhinnaṃ hoti, pācittiyameva. ‘‘Yathāyaṃ saṅghamajjhe na virocati, tathā naṃ karomī’’ti evaṃ virūpakaraṇādhippāyena kaṇṇaṃ vā nāsaṃ vā chindati, dukkaṭaṃ.
៤៥២. អនុបសម្បន្នស្សាតិ គហដ្ឋស្ស វា បព្ពជិតស្ស វា ឥត្ថិយា វា បុរិសស្ស វា អន្តមសោ តិរច្ឆានគតស្សាបិ បហារំ ទេតិ, ទុក្កដំ។ សចេ បន រត្តចិត្តោ ឥត្ថិំ បហរតិ, សង្ឃាទិសេសោ។
452.Anupasampannassāti gahaṭṭhassa vā pabbajitassa vā itthiyā vā purisassa vā antamaso tiracchānagatassāpi pahāraṃ deti, dukkaṭaṃ. Sace pana rattacitto itthiṃ paharati, saṅghādiseso.
៤៥៣. កេនចិ វិហេឋិយមានោតិ មនុស្សេន វា តិរច្ឆានគតេន វា វិហេឋិយមានោ។ មោក្ខាធិប្បាយោតិ តតោ អត្តនោ មោក្ខំ បត្ថយមានោ។ បហារំ ទេតីតិ កាយកាយបដិពទ្ធនិស្សគ្គិយានំ អញ្ញតរេន បហារំ ទេតិ, អនាបត្តិ។ សចេបិ អន្តរាមគ្គេ ចោរំ វា បច្ចត្ថិកំ វា វិហេឋេតុកាមំ ទិស្វា ‘‘ឧបាសក, ឯត្ថេវ តិដ្ឋ, មា អាគមី’’តិ វត្វា វចនំ អនាទិយិត្វា អាគច្ឆន្តំ ‘‘គច្ឆ រេ’’តិ មុគ្គរេន វា សត្ថកេន វា បហរិត្វា យាតិ, សោ ចេ តេន បហារេន មរតិ, អនាបត្តិយេវ។ វាឡមិគេសុបិ ឯសេវ នយោ។ សេសមេត្ថ ឧត្តានមេវ។ សមុដ្ឋានាទីនិ បនស្ស បឋមបារាជិកសទិសានិ, ឥទំ បន ទុក្ខវេទនន្តិ។
453.Kenaciviheṭhiyamānoti manussena vā tiracchānagatena vā viheṭhiyamāno. Mokkhādhippāyoti tato attano mokkhaṃ patthayamāno. Pahāraṃ detīti kāyakāyapaṭibaddhanissaggiyānaṃ aññatarena pahāraṃ deti, anāpatti. Sacepi antarāmagge coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamī’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo. Sesamettha uttānameva. Samuṭṭhānādīni panassa paṭhamapārājikasadisāni, idaṃ pana dukkhavedananti.
បហារសិក្ខាបទំ ចតុត្ថំ។
Pahārasikkhāpadaṃ catutthaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៨. សហធម្មិកវគ្គោ • 8. Sahadhammikavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. បហារសិក្ខាបទវណ្ណនា • 4. Pahārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៤. បហារសិក្ខាបទវណ្ណនា • 4. Pahārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៤. បហារសិក្ខាបទវណ្ណនា • 4. Pahārasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៤. បហារសិក្ខាបទំ • 4. Pahārasikkhāpadaṃ
