| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. បទបូជកត្ថេរអបទានវណ្ណនា
4. Padapūjakattheraapadānavaṇṇanā
សិទ្ធត្ថស្ស ភគវតោតិអាទិកំ អាយស្មតោ បទបូជកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ សិទ្ធត្ថស្ស ភគវតោ កាលេ កុលគេហេ និព្ពត្តោ វុទ្ធិមន្វាយ សត្ថរិ បសន្នោ សុមនបុប្ផេន បាទមូលេ បូជេសិ។ សោ តេន បុញ្ញេន ទេវមនុស្សេសុ សំសរន្តោ សក្កសម្បត្តិំ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិមន្វាយ សត្ថរិ បសីទិត្វា បព្ពជិតោ វិបស្សនំ វឌ្ឍេត្វា អរហត្តផលេ បតិដ្ឋាសិ។
Siddhatthassabhagavatotiādikaṃ āyasmato padapūjakattherassa apadānaṃ. Ayampi purimabuddhesu katādhikāro siddhatthassa bhagavato kāle kulagehe nibbatto vuddhimanvāya satthari pasanno sumanapupphena pādamūle pūjesi. So tena puññena devamanussesu saṃsaranto sakkasampattiṃ anubhavitvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito vipassanaṃ vaḍḍhetvā arahattaphale patiṭṭhāsi.
១៩. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ សិទ្ធត្ថស្ស ភគវតោតិអាទិមាហ។ ជាតិបុប្ផមទាសហន្តិ ជាតិសុមនបុប្ផំ អទាសិំ អហន្តិ វត្តព្ពេ គាថាពន្ធសុខត្ថំ សុមនសទ្ទស្ស លោបំ កត្វា វុត្តំ។ តត្ថ ជាតិយា និព្ពត្តោ វិកសមានោយេវ សុមនំ ជនានំ សោមនស្សំ ករោតីតិ សុមនំ, បុប្ផនដ្ឋេន វិកសនដ្ឋេន បុប្ផំ, សុមនញ្ច តំ បុប្ផញ្ចាតិ សុមនបុប្ផំ, តានិ សុមនបុប្ផានិ សិទ្ធត្ថស្ស ភគវតោ អហំ បូជេសិន្តិ អត្ថោ។ សេសំ សព្ពត្ថ ឧត្តានមេវាតិ។
19. So aparabhāge attano pubbakammaṃ saritvā somanassajāto pubbacaritāpadānaṃ pakāsento siddhatthassa bhagavatotiādimāha. Jātipupphamadāsahanti jātisumanapupphaṃ adāsiṃ ahanti vattabbe gāthābandhasukhatthaṃ sumanasaddassa lopaṃ katvā vuttaṃ. Tattha jātiyā nibbatto vikasamānoyeva sumanaṃ janānaṃ somanassaṃ karotīti sumanaṃ, pupphanaṭṭhena vikasanaṭṭhena pupphaṃ, sumanañca taṃ pupphañcāti sumanapupphaṃ, tāni sumanapupphāni siddhatthassa bhagavato ahaṃ pūjesinti attho. Sesaṃ sabbattha uttānamevāti.
បទបូជកត្ថេរអបទានវណ្ណនា សមត្តា។
Padapūjakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. បទបូជកត្ថេរអបទានំ • 4. Padapūjakattheraapadānaṃ
