| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
បច្ឆិមវិកប្បនុបគចីវរាទិកថា
Pacchimavikappanupagacīvarādikathā
៣៥៩. បំសុកូលកតោតិ កតបំសុកូលោ។ គរុកោ ហោតីតិ ជិណ្ណជិណ្ណដ្ឋានេ អគ្គឡារោបនេន គរុកោ ហោតិ។ សុត្តលូខំ កាតុន្តិ សុត្តេនេវ អគ្គឡំ កាតុន្តិ អត្ថោ។ វិកណ្ណោ ហោតីតិ សុត្តំ អច្ឆេត្វា អច្ឆេត្វា សិព្ពន្តានំ ឯកោ សង្ឃាដិកោណោ ទីឃោ ហោតិ។ វិកណ្ណំ ឧទ្ធរិតុន្តិ ទីឃកោណំ ឆិន្ទិតុំ។ ឱកិរិយន្តីតិ ឆិន្នកោណតោ គឡន្តិ។ អនុវាតំ បរិភណ្ឌន្តិ អនុវាតញ្ចេវ បរិភណ្ឌញ្ច។ បត្តា លុជ្ជន្តីតិ មហន្តេសុ បត្តមុខេសុ ទិន្នានិ សុត្តានិ គឡន្តិ, តតោ បត្តា លុជ្ជន្តិ។ អដ្ឋបទកំ កាតុន្តិ អដ្ឋបទកច្ឆន្នេន បត្តមុខំ សិព្ពិតុំ។
359.Paṃsukūlakatoti katapaṃsukūlo. Garuko hotīti jiṇṇajiṇṇaṭṭhāne aggaḷāropanena garuko hoti. Suttalūkhaṃ kātunti sutteneva aggaḷaṃ kātunti attho. Vikaṇṇo hotīti suttaṃ acchetvā acchetvā sibbantānaṃ eko saṅghāṭikoṇo dīgho hoti. Vikaṇṇaṃ uddharitunti dīghakoṇaṃ chindituṃ. Okiriyantīti chinnakoṇato gaḷanti. Anuvātaṃ paribhaṇḍanti anuvātañceva paribhaṇḍañca. Pattā lujjantīti mahantesu pattamukhesu dinnāni suttāni gaḷanti, tato pattā lujjanti. Aṭṭhapadakaṃ kātunti aṭṭhapadakacchannena pattamukhaṃ sibbituṃ.
៣៦០. អន្វាធិកម្បិ អារោបេតុន្តិ អាគន្តុកបត្តម្បិ ទាតុំ។ ឥទំ បន អប្បហោនកេ អារោបេតព្ពំ។ សចេ បហោតិ, អាគន្តុកបត្តំ ន វដ្ដតិ, ឆិន្ទិតព្ពមេវ។
360.Anvādhikampi āropetunti āgantukapattampi dātuṃ. Idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbameva.
៣៦១. ន ច ភិក្ខវេ សទ្ធាទេយ្យន្តិ ឯត្ថ សេសញាតីនំ ទេន្តោ វិនិបាតេតិយេវ។ មាតាបិតរោ បន សចេ រជ្ជេ ឋិតា បត្ថយន្តិ, ទាតព្ពំ។
361.Na ca bhikkhave saddhādeyyanti ettha sesañātīnaṃ dento vinipātetiyeva. Mātāpitaro pana sace rajje ṭhitā patthayanti, dātabbaṃ.
៣៦២. គិលានោតិ គិលានតាយ គហេត្វា គន្តុំ អសមត្ថោ។ វស្សិកសង្កេតន្តិ វស្សិកេ ចត្តារោ មាសេ។ នទីបារន្តិ នទិយា បារេ ភត្តំ ភុញ្ជិតព្ពំ ហោតិ។ អគ្គឡគុត្តិវិហារោតិ សព្ពេស្វេវ ចេតេសុ គិលានវស្សិកសង្កេតនទីបារគមនអត្ថតកថិនភាវេសុ អគ្គឡគុត្តិយេវ បមាណំ។ គុត្តេ ឯវ ហិ វិហារេ ឯតេសុ ការណេសុ និក្ខិបិត្វា ពហិ គន្តុំ វដ្ដតិ, ន អគុត្តេ។ អារញ្ញកស្ស បន វិហារោ ន សុគុត្តោ ហោតិ, តេន ភណ្ឌុក្ខលិកាយ បក្ខិបិត្វា បាសាណសុសិរ រុក្ខសុសិរាទីសុ សុប្បដិច្ឆន្នេសុ ឋបេត្វា គន្តព្ពំ។
362.Gilānoti gilānatāya gahetvā gantuṃ asamattho. Vassikasaṅketanti vassike cattāro māse. Nadīpāranti nadiyā pāre bhattaṃ bhuñjitabbaṃ hoti. Aggaḷaguttivihāroti sabbesveva cetesu gilānavassikasaṅketanadīpāragamanaatthatakathinabhāvesu aggaḷaguttiyeva pamāṇaṃ. Gutte eva hi vihāre etesu kāraṇesu nikkhipitvā bahi gantuṃ vaṭṭati, na agutte. Āraññakassa pana vihāro na sugutto hoti, tena bhaṇḍukkhalikāya pakkhipitvā pāsāṇasusira rukkhasusirādīsu suppaṭicchannesu ṭhapetvā gantabbaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ២២១. បច្ឆិមវិកប្បនុបគចីវរាទិកថា • 221. Pacchimavikappanupagacīvarādikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បច្ឆិមវិកប្បនុបគចីវរាទិកថាវណ្ណនា • Pacchimavikappanupagacīvarādikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / និសីទនាទិអនុជាននកថាវណ្ណនា • Nisīdanādianujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ចីវររជនកថាទិវណ្ណនា • Cīvararajanakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២២១. បច្ឆិមវិកប្បនុបគចីវរាទិកថា • 221. Pacchimavikappanupagacīvarādikathā
