| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៣. និរយបាលកថាវណ្ណនា
3. Nirayapālakathāvaṇṇanā
៨៦៦. ឥទានិ និរយបាលកថា នាម ហោតិ។ តត្ថ ‘‘និរយេ នេរយិកកម្មានេវ និរយបាលរូបវសេន វធេន្តិ, នត្ថិ និរយបាលា នាម សត្តា’’តិ យេសំ លទ្ធិ, សេយ្យថាបិ អន្ធកានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស។ អថ នំ ‘‘យទិ តត្ថ និរយបាលា ន សិយុំ, កម្មការណាបិ ន ភវេយ្យុំ។ ការណិកេសុ ហិ សតិ ការណា’’តិ ចោទេតុំ នត្ថិ និរយេសូតិអាទិមាហ។
866. Idāni nirayapālakathā nāma hoti. Tattha ‘‘niraye nerayikakammāneva nirayapālarūpavasena vadhenti, natthi nirayapālā nāma sattā’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Atha naṃ ‘‘yadi tattha nirayapālā na siyuṃ, kammakāraṇāpi na bhaveyyuṃ. Kāraṇikesu hi sati kāraṇā’’ti codetuṃ natthi nirayesūtiādimāha.
៨៦៧-៨៦៨. អត្ថិ មនុស្សេសូតិ បច្ចក្ខេន ញាបនត្ថំ។ យថា ហិ មនុស្សេសុ សតិ ការណិកេសុ ការណា, ឯវំ តត្ថាបីតិ អយមេត្ថ អធិប្បាយោ។ អត្ថិ និរយេសូតិ បុច្ឆា បរវាទិស្ស, បដិញ្ញា ឥតរស្ស។ ន វេស្សភូ នោបិ ច បេត្តិរាជាតិ បរវាទិនា សកសមយតោ សុត្តំ អាភតំ។ តំ បន សាសនាវចរិកន្តិ សកវាទិនា អនុញ្ញាតំ។ តត្ថ វេស្សភូតិ ឯកោ ទេវោ។ បេត្តិរាជាតិ បេត្តិវិសយេ បេតមហិទ្ធិកោ។ សោមាទយោ បាកដា ឯវ។ ឥទំ វុត្តំ ហោតិ – អត្តនោ កម្មេហិ ឥតោ បណុន្នំ បរលោកំ បត្តំ បុរិសំ ន ឯតេ វេស្សភូអាទយោ ហនន្តិ។ យេហិ បន សោ កម្មេហិ តត្ថ បណុន្នោ, តានិ សកានិ កម្មានិយេវ នំ តត្ថ ហនន្តីតិ កម្មស្សកតំ ទីបេតិ, ន និរយបាលានំ អភាវំ។ សកវាទិនា បន តមេនំ, ភិក្ខវេតិ អាភតានិ សុត្តបទានិ នីតត្ថានេវាតិ។
867-868. Atthi manussesūti paccakkhena ñāpanatthaṃ. Yathā hi manussesu sati kāraṇikesu kāraṇā, evaṃ tatthāpīti ayamettha adhippāyo. Atthi nirayesūti pucchā paravādissa, paṭiññā itarassa. Na vessabhū nopi ca pettirājāti paravādinā sakasamayato suttaṃ ābhataṃ. Taṃ pana sāsanāvacarikanti sakavādinā anuññātaṃ. Tattha vessabhūti eko devo. Pettirājāti pettivisaye petamahiddhiko. Somādayo pākaṭā eva. Idaṃ vuttaṃ hoti – attano kammehi ito paṇunnaṃ paralokaṃ pattaṃ purisaṃ na ete vessabhūādayo hananti. Yehi pana so kammehi tattha paṇunno, tāni sakāni kammāniyeva naṃ tattha hanantīti kammassakataṃ dīpeti, na nirayapālānaṃ abhāvaṃ. Sakavādinā pana tamenaṃ, bhikkhaveti ābhatāni suttapadāni nītatthānevāti.
និរយបាលកថាវណ្ណនា។
Nirayapālakathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១៩៦) ៣. និរយបាលកថា • (196) 3. Nirayapālakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. និរយបាលកថាវណ្ណនា • 3. Nirayapālakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៣. និរយបាលកថាវណ្ណនា • 3. Nirayapālakathāvaṇṇanā
