| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២០. វីសតិមវគ្គោ
20. Vīsatimavaggo
(១៩៦) ៣. និរយបាលកថា
(196) 3. Nirayapālakathā
៨៦៦. នត្ថិ និរយេសុ និរយបាលាតិ? អាមន្តា។ នត្ថិ និរយេសុ កម្មការណាតិ? ន ហេវំ វត្តព្ពេ…បេ.… អត្ថិ និរយេសុ កម្មការណាតិ? អាមន្តា។ អត្ថិ និរយេសុ និរយបាលាតិ? ន ហេវំ វត្តព្ពេ…បេ.…។
866. Natthi nirayesu nirayapālāti? Āmantā. Natthi nirayesu kammakāraṇāti? Na hevaṃ vattabbe…pe… atthi nirayesu kammakāraṇāti? Āmantā. Atthi nirayesu nirayapālāti? Na hevaṃ vattabbe…pe….
អត្ថិ មនុស្សេសុ កម្មការណា, អត្ថិ ច ការណិកាតិ? អាមន្តា។ អត្ថិ និរយេសុ កម្មការណា, អត្ថិ ច ការណិកាតិ? ន ហេវំ វត្តព្ពេ…បេ.… អត្ថិ និរយេសុ កម្មការណា, នត្ថិ ច ការណិកាតិ? អាមន្តា។ អត្ថិ មនុស្សេសុ កម្មការណា, នត្ថិ ច ការណិកាតិ? ន ហេវំ វត្តព្ពេ…បេ.…។
Atthi manussesu kammakāraṇā, atthi ca kāraṇikāti? Āmantā. Atthi nirayesu kammakāraṇā, atthi ca kāraṇikāti? Na hevaṃ vattabbe…pe… atthi nirayesu kammakāraṇā, natthi ca kāraṇikāti? Āmantā. Atthi manussesu kammakāraṇā, natthi ca kāraṇikāti? Na hevaṃ vattabbe…pe….
៨៦៧. អត្ថិ និរយេសុ និរយបាលាតិ? អាមន្តា។ ននុ វុត្តំ ភគវតា –
867. Atthi nirayesu nirayapālāti? Āmantā. Nanu vuttaṃ bhagavatā –
‘‘ន វេស្សភូ នោបិ ច បេត្តិរាជា,
‘‘Na vessabhū nopi ca pettirājā,
សោមោ យមោ វេស្សវណោ ច រាជា;
Somo yamo vessavaṇo ca rājā;
សកានិ កម្មានិ ហនន្តិ តត្ថ, ឥតោ បណុន្នំ 1 បរលោកបត្ត’’ន្តិ។
Sakāni kammāni hananti tattha, ito paṇunnaṃ 2 paralokapatta’’nti.
អត្ថេវ សុត្តន្តោតិ? អាមន្តា។ តេន ហិ នត្ថិ និរយេសុ និរយបាលាតិ។
Attheva suttantoti? Āmantā. Tena hi natthi nirayesu nirayapālāti.
៨៦៨. នត្ថិ និរយេសុ និរយបាលាតិ? អាមន្តា។ ននុ វុត្តំ ភគវតា – ‘‘តមេនំ, ភិក្ខវេ , និរយបាលា បញ្ចវិធពន្ធនំ នាម ការណំ ការេន្តិ 3 – តត្តំ អយោខីលំ ហត្ថេ គមេន្តិ, តត្តំ អយោខីលំ ទុតិយេ ហត្ថេ គមេន្តិ, តត្តំ អយោខីលំ បាទេ គមេន្តិ, តត្តំ អយោខីលំ ទុតិយេ បាទេ គមេន្តិ, តត្តំ អយោខីលំ មជ្ឈេឧរស្មិំ គមេន្តិ; សោ តត្ថ ទុក្ខា តិព្ពា កដុកា វេទនា វេទេតិ; ន ច តាវ កាលំ ករោតិ យាវ ន តំ បាបកម្មំ ព្យន្តីហោតី’’តិ 4! អត្ថេវ សុត្តន្តោតិ? អាមន្តា។ តេន ហិ អត្ថិ និរយេសុ និរយបាលាតិ។
868. Natthi nirayesu nirayapālāti? Āmantā. Nanu vuttaṃ bhagavatā – ‘‘tamenaṃ, bhikkhave , nirayapālā pañcavidhabandhanaṃ nāma kāraṇaṃ kārenti 5 – tattaṃ ayokhīlaṃ hatthe gamenti, tattaṃ ayokhīlaṃ dutiye hatthe gamenti, tattaṃ ayokhīlaṃ pāde gamenti, tattaṃ ayokhīlaṃ dutiye pāde gamenti, tattaṃ ayokhīlaṃ majjheurasmiṃ gamenti; so tattha dukkhā tibbā kaṭukā vedanā vedeti; na ca tāva kālaṃ karoti yāva na taṃ pāpakammaṃ byantīhotī’’ti 6! Attheva suttantoti? Āmantā. Tena hi atthi nirayesu nirayapālāti.
នត្ថិ និរយេសុ និរយបាលាតិ? អាមន្តា។ ននុ វុត្តំ ភគវតា – ‘‘តមេនំ, ភិក្ខវេ, និរយបាលា សំវេសេត្វា កុឋារីហិ 7 តច្ឆន្តិ…បេ.… តមេនំ, ភិក្ខវេ, និរយបាលា ឧទ្ធម្បាទំ អធោសិរំ ឋបេត្វា វាសីហិ តច្ឆន្តិ…បេ.… តមេនំ , ភិក្ខវេ, និរយបាលា រថេ យោជេត្វា អាទិត្តាយ បថវិយា សម្បជ្ជលិតាយ សជោតិភូតាយ 8 សារេន្តិបិ បច្ចាសារេន្តិបិ…បេ.… តមេនំ, ភិក្ខវេ, និរយបាលា មហន្តំ អង្គារបព្ពតំ អាទិត្តំ សម្បជ្ជលិតំ សជោតិភូតំ អារោបេន្តិបិ ឱរោបេន្តិបិ…បេ.… តមេនំ, ភិក្ខវេ, និរយបាលា ឧទ្ធម្បាទំ អធោសិរំ គហេត្វា តត្តាយ លោហកុម្ភិយា បក្ខិបន្តិ អាទិត្តាយ សម្បជ្ជលិតាយ សជោតិភូតាយ។ សោ តត្ថ ផេណុទ្ទេហកំ បច្ចតិ, សោ តត្ថ ផេណុទ្ទេហកំ បច្ចមានោ សកិម្បិ ឧទ្ធំ គច្ឆតិ, សកិម្បិ អធោ គច្ឆតិ, សកិម្បិ តិរិយំ គច្ឆតិ។ សោ តត្ថ ទុក្ខា តិព្ពា កដុកា វេទនា វេទយតិ, ន ច តាវ កាលំ ករោតិ យាវ ន តំ បាបកម្មំ ព្យន្តីហោតិ។ តមេនំ, ភិក្ខវេ, និរយបាលា មហានិរយេ បក្ខិបន្តិ! សោ ខោ បន, ភិក្ខវេ, មហានិរយោ –
Natthi nirayesu nirayapālāti? Āmantā. Nanu vuttaṃ bhagavatā – ‘‘tamenaṃ, bhikkhave, nirayapālā saṃvesetvā kuṭhārīhi 9 tacchanti…pe… tamenaṃ, bhikkhave, nirayapālā uddhampādaṃ adhosiraṃ ṭhapetvā vāsīhi tacchanti…pe… tamenaṃ , bhikkhave, nirayapālā rathe yojetvā ādittāya pathaviyā sampajjalitāya sajotibhūtāya 10 sārentipi paccāsārentipi…pe… tamenaṃ, bhikkhave, nirayapālā mahantaṃ aṅgārapabbataṃ ādittaṃ sampajjalitaṃ sajotibhūtaṃ āropentipi oropentipi…pe… tamenaṃ, bhikkhave, nirayapālā uddhampādaṃ adhosiraṃ gahetvā tattāya lohakumbhiyā pakkhipanti ādittāya sampajjalitāya sajotibhūtāya. So tattha pheṇuddehakaṃ paccati, so tattha pheṇuddehakaṃ paccamāno sakimpi uddhaṃ gacchati, sakimpi adho gacchati, sakimpi tiriyaṃ gacchati. So tattha dukkhā tibbā kaṭukā vedanā vedayati, na ca tāva kālaṃ karoti yāva na taṃ pāpakammaṃ byantīhoti. Tamenaṃ, bhikkhave, nirayapālā mahāniraye pakkhipanti! So kho pana, bhikkhave, mahānirayo –
‘‘ចតុក្កណ្ណោ ចតុទ្វារោ, វិភត្តោ ភាគសោ មិតោ;
‘‘Catukkaṇṇo catudvāro, vibhatto bhāgaso mito;
អយោបាការបរិយន្តោ, អយសា បដិកុជ្ជិតោ។
Ayopākārapariyanto, ayasā paṭikujjito.
‘‘តស្ស អយោមយា ភូមិ, ជលិតា តេជសា យុតា;
‘‘Tassa ayomayā bhūmi, jalitā tejasā yutā;
សមន្តា យោជនសតំ, ផរិត្វា តិដ្ឋតិ សព្ពទា’’តិ 11។
Samantā yojanasataṃ, pharitvā tiṭṭhati sabbadā’’ti 12.
អត្ថេវ សុត្តន្តោតិ? អាមន្តា។ តេន ហិ អត្ថិ និរយេសុ និរយបាលាតិ។
Attheva suttantoti? Āmantā. Tena hi atthi nirayesu nirayapālāti.
និរយបាលកថា និដ្ឋិតា។
Nirayapālakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. និរយបាលកថាវណ្ណនា • 3. Nirayapālakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៣. និរយបាលកថាវណ្ណនា • 3. Nirayapālakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៣. និរយបាលកថាវណ្ណនា • 3. Nirayapālakathāvaṇṇanā
