| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
৭. নন্দসুত্তৰণ্ণনা
7. Nandasuttavaṇṇanā
১০৮৪-৫. সন্তি লোকেতি নন্দসুত্তং। তত্থ পঠমগাথায অত্থো – লোকে খত্তিযাদযো জনা আজীৰকনিগণ্ঠাদিকে সন্ধায ‘‘সন্তি মুনযো’’তি ৰদন্তি, তযিদং কথংসূতি কিং নু খো তে সমাপত্তিঞাণাদিনা ঞাণেন উপ্পন্নত্তা ঞাণূপপন্নং নো মুনিং ৰদন্তি, এৰংৰিধং নু ৰদন্তি, উদাহু ৰে নানপ্পকারকেন লূখজীৰিতসঙ্খাতেন জীৰিতেনূপপন্নন্তি অথস্স ভগৰা তদুভযং পটিক্খিপিত্ৰা মুনিং দস্সেন্তো ‘‘ন দিট্ঠিযা’’তি গাথমাহ।
1084-5.Santiloketi nandasuttaṃ. Tattha paṭhamagāthāya attho – loke khattiyādayo janā ājīvakanigaṇṭhādike sandhāya ‘‘santi munayo’’ti vadanti, tayidaṃ kathaṃsūti kiṃ nu kho te samāpattiñāṇādinā ñāṇena uppannattā ñāṇūpapannaṃ no muniṃ vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti athassa bhagavā tadubhayaṃ paṭikkhipitvā muniṃ dassento ‘‘na diṭṭhiyā’’ti gāthamāha.
১০৮৬-৭. ইদানি ‘‘দিট্ঠাদীহি সুদ্ধী’’তি ৰদন্তানং ৰাদে কঙ্খাপহানত্থং ‘‘যে কেচিমে’’তি পুচ্ছতি। তত্থ অনেকরূপেনাতি কোতূহলমঙ্গলাদিনা। তত্থ যতা চরন্তাতি তত্থ সকায দিট্ঠিযা গুত্তা ৰিহরন্তা। অথস্স তথা সুদ্ধিঅভাৰং দীপেন্তো ভগৰা দুতিযং গাথমাহ।
1086-7. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādinā. Tattha yatā carantāti tattha sakāya diṭṭhiyā guttā viharantā. Athassa tathā suddhiabhāvaṃ dīpento bhagavā dutiyaṃ gāthamāha.
১০৮৮-৯০. এৰং ‘‘নাতরিংসূ’’তি সুত্ৰা ইদানি যো অতরি, তং সোতুকামো ‘‘যে কেচিমে’’তি পুচ্ছতি। অথস্স ভগৰা ওঘতিণ্ণমুখেন জাতিজরাতিণ্ণে দস্সেন্তো ততিযং গাথমাহ। তত্থ নিৰুতাতি ওৰুটা পরিযোনদ্ধা। যেসীধাতি যেসু ইধ। এত্থ চ সু-ইতি নিপাতমত্তং। তণ্হং পরিঞ্ঞাযাতি তীহি পরিঞ্ঞাহি তণ্হং পরিজানিত্ৰা। সেসং সব্বত্থ পুব্বে ৰুত্তনযত্তা পাকটমেৰ।
1088-90. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento tatiyaṃ gāthamāha. Tattha nivutāti ovuṭā pariyonaddhā. Yesīdhāti yesu idha. Ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
এৰং ভগৰা অরহত্তনিকূটেনেৰ দেসনং নিট্ঠাপেসি, দেসনাপরিযোসানে পন নন্দো ভগৰতো ভাসিতং অভিনন্দমানো ‘‘এতাভিনন্দামী’’তি গাথমাহ। ইধাপি চ পুব্বে ৰুত্তসদিসো এৰ ধম্মাভিসমযো অহোসীতি।
Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno ‘‘etābhinandāmī’’ti gāthamāha. Idhāpi ca pubbe vuttasadiso eva dhammābhisamayo ahosīti.
পরমত্থজোতিকায খুদ্দক-অট্ঠকথায
Paramatthajotikāya khuddaka-aṭṭhakathāya
সুত্তনিপাত-অট্ঠকথায নন্দসুত্তৰণ্ণনা নিট্ঠিতা।
Suttanipāta-aṭṭhakathāya nandasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / সুত্তনিপাতপাল়ি • Suttanipātapāḷi / ৭. নন্দমাণৰপুচ্ছা • 7. Nandamāṇavapucchā
