| Library / Tipiṭaka / តិបិដក • Tipiṭaka / ចូឡនិទ្ទេស-អដ្ឋកថា • Cūḷaniddesa-aṭṭhakathā |
៧. នន្ទមាណវសុត្តនិទ្ទេសវណ្ណនា
7. Nandamāṇavasuttaniddesavaṇṇanā
៤៦. សត្តមេ នន្ទសុត្តេ – បឋមគាថាយត្ថោ – លោកេ ខត្តិយាទយោជនា អាជីវកនិគណ្ឋាទិកេ សន្ធាយ ‘‘សន្តិ លោកេ មុនយោ’’តិ វទន្តិ។ តយិទំ កថំសូតិ កិំ នុ ខោ តេ សមាបត្តិញាណាទិនា ញាណេន ឧបបន្នត្តា ញាណូបបន្នំ មុនិ នោ វទន្តិ, ឯវំវិធំ នុ វទន្តិ, ឧទាហុ វេ នានប្បការកេន លូខជីវិតសង្ខាតេន ជីវិតេនូបបន្នន្តិ។
46. Sattame nandasutte – paṭhamagāthāyattho – loke khattiyādayojanā ājīvakanigaṇṭhādike sandhāya ‘‘santi loke munayo’’ti vadanti. Tayidaṃ kathaṃsūti kiṃ nu kho te samāpattiñāṇādinā ñāṇena upapannattā ñāṇūpapannaṃ muni no vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti.
និទ្ទេសេ អដ្ឋសមាបត្តិញាណេន វាតិ បឋមជ្ឈានាទិអដ្ឋសមាបត្តិសម្បយុត្តញាណេន វា។ បញ្ចាភិញ្ញាញាណេន វាតិ បុព្ពេនិវាសាទិជាននញាណេន វា។
Niddese aṭṭhasamāpattiñāṇena vāti paṭhamajjhānādiaṭṭhasamāpattisampayuttañāṇena vā. Pañcābhiññāñāṇena vāti pubbenivāsādijānanañāṇena vā.
៤៧. អថស្ស ភគវា តទុភយម្បិ បដិក្ខិបិត្វា មុនិំ ទស្សេន្តោ ‘‘ន ទិដ្ឋិយា’’តិ គាថមាហ។
47. Athassa bhagavā tadubhayampi paṭikkhipitvā muniṃ dassento ‘‘na diṭṭhiyā’’ti gāthamāha.
៤៨. ឥទានិ ‘‘ទិដ្ឋាទីហិ សុទ្ធី’’តិ វទន្តានំ វាទេ កង្ខាបហានត្ថំ ‘‘យេ កេចិមេ’’តិ បុច្ឆតិ។ តត្ថ អនេករូបេនាតិ កោតូហលមង្គលាទិនាបិ។ តត្ថ យតា ចរន្តាតិ តត្ថ សក្កាយទិដ្ឋិយា គុត្តា វិហរន្តា។
48. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādināpi. Tattha yatā carantāti tattha sakkāyadiṭṭhiyā guttā viharantā.
៤៩. អថស្ស តថា សុទ្ធិអភាវំ ទីបេន្តោ ភគវា ចតុត្ថំ គាថមាហ។
49. Athassa tathā suddhiabhāvaṃ dīpento bhagavā catutthaṃ gāthamāha.
៥០. ឯវំ ‘‘នាតរិំសូ’’តិ សុត្វា ឥទានិ យោ អតរិ, តំ សោតុកាមោ ‘‘យេ កេចិមេ’’តិ បុច្ឆតិ។ អថស្ស ភគវា ឱឃតិណ្ណមុខេន ជាតិជរាតិណ្ណេ ទស្សេន្តោ ឆដ្ឋំ គាថមាហ។
50. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento chaṭṭhaṃ gāthamāha.
៥១. តត្ថ និវុតាតិ ឱវុដា បរិយោនទ្ធា។ យេ សីធាតិ យេ សុ ឥធ, ឯត្ថ ច សុ-ឥតិ និបាតមត្តំ។ តណ្ហំ បរិញ្ញាយាតិ តីហិ បរិញ្ញាហិ តណ្ហំ បរិជានិត្វា។ សេសំ សព្ពត្ថ បុព្ពេ វុត្តនយត្តា បាកដមេវ។
51. Tattha nivutāti ovuṭā pariyonaddhā. Ye sīdhāti ye su idha, ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
៥២. ឯវំ ភគវា អរហត្តនិកូដេនេវ ទេសនំ និដ្ឋាបេសិ, ទេសនាបរិយោសានេ បន នន្ទោ ភគវតោ ភាសិតំ អភិនន្ទមានោ ឯតាភិនន្ទាមីតិ គាថមាហ។ ឥធាបិ ច បុព្ពេ វុត្តសទិសោ ឯវ ធម្មាភិសមយោ អហោសីតិ។
52. Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno etābhinandāmīti gāthamāha. Idhāpi ca pubbe vuttasadiso eva dhammābhisamayo ahosīti.
សទ្ធម្មប្បជ្ជោតិកាយ ចូឡនិទ្ទេស-អដ្ឋកថាយ
Saddhammappajjotikāya cūḷaniddesa-aṭṭhakathāya
នន្ទមាណវសុត្តនិទ្ទេសវណ្ណនា និដ្ឋិតា។
Nandamāṇavasuttaniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ចូឡនិទ្ទេសបាឡិ • Cūḷaniddesapāḷi
៧. នន្ទមាណវបុច្ឆា • 7. Nandamāṇavapucchā
៧. នន្ទមាណវបុច្ឆានិទ្ទេសោ • 7. Nandamāṇavapucchāniddeso
