| Library / Tipiṭaka / តិបិដក • Tipiṭaka / ចូឡនិទ្ទេស-អដ្ឋកថា • Cūḷaniddesa-aṭṭhakathā |
៨. ហេមកមាណវសុត្តនិទ្ទេសវណ្ណនា
8. Hemakamāṇavasuttaniddesavaṇṇanā
៥៣. អដ្ឋមេ ហេមកសុត្តេ – យេ មេ បុព្ពេ វិយាកំសូតិ យេ ពាវរិអាទយោ បុព្ពេ មយ្ហំ សកំ លទ្ធិំ វិយាកំសុ។ ហុរំ គោតមសាសនាតិ គោតមសាសនតោ បុព្ពតរំ។ សព្ពំ តំ តក្កវឌ្ឍនន្តិ សព្ពំ តំ កាមវិតក្កាទិវឌ្ឍនំ។
53. Aṭṭhame hemakasutte – ye me pubbe viyākaṃsūti ye bāvariādayo pubbe mayhaṃ sakaṃ laddhiṃ viyākaṃsu. Huraṃ gotamasāsanāti gotamasāsanato pubbataraṃ. Sabbaṃ taṃ takkavaḍḍhananti sabbaṃ taṃ kāmavitakkādivaḍḍhanaṃ.
យេ ចញ្ញេ តស្ស អាចរិយាតិ យេ ច អញ្ញេ តស្ស ពាវរិយស្ស អាចារេ សិក្ខាបកា អាចរិយា។ តេ សកំ ទិដ្ឋិន្តិ តេ អាចរិយា អត្តនោ ទិដ្ឋិំ។ សកំ ខន្តិន្តិ អត្តនោ ខមនំ។ សកំ រុចិន្តិ អត្តនោ រោចនំ។ វិតក្កវឌ្ឍនន្តិ កាមវិតក្កាទិវិតក្កានំ ឧប្បាទនំ បុនប្បុនំ បវត្តនំ។ សង្កប្បវឌ្ឍនន្តិ កាមសង្កប្បាទីនំ វឌ្ឍនំ។ ឥមានិ ទ្វេ បទានិ សព្ពសង្គាហិកវសេន វុត្តានិ។ ឥទានិ កាមវិតក្កាទិកេ សរូបតោ ទស្សេតុំ ‘‘កាមវិតក្កវឌ្ឍន’’ន្តិអាទិនា នយេន នវវិតក្កេ ទស្សេសិ។
Ye caññe tassa ācariyāti ye ca aññe tassa bāvariyassa ācāre sikkhāpakā ācariyā. Te sakaṃ diṭṭhinti te ācariyā attano diṭṭhiṃ. Sakaṃ khantinti attano khamanaṃ. Sakaṃ rucinti attano rocanaṃ. Vitakkavaḍḍhananti kāmavitakkādivitakkānaṃ uppādanaṃ punappunaṃ pavattanaṃ. Saṅkappavaḍḍhananti kāmasaṅkappādīnaṃ vaḍḍhanaṃ. Imāni dve padāni sabbasaṅgāhikavasena vuttāni. Idāni kāmavitakkādike sarūpato dassetuṃ ‘‘kāmavitakkavaḍḍhana’’ntiādinā nayena navavitakke dassesi.
៥៤. តណ្ហានិគ្ឃាតនន្តិ តណ្ហាវិនាសនំ។
54.Taṇhānigghātananti taṇhāvināsanaṃ.
៥៥-៦. អថស្ស ភគវា តំ ធម្មំ អាចិក្ខន្តោ ‘‘ឥធា’’តិ គាថាទ្វយមាហ។ តត្ថ ឯតទញ្ញាយ យេ សតាតិ ឯតំ និព្ពានំ បទមច្ចុតំ ‘‘សព្ពេ សង្ខារា អនិច្ចា’’តិអាទិនា (ធ. ប. ២៧៧; ថេរគា. ៦៧៦; កថា. ៧៥៣) នយេន វិបស្សន្តា អនុបុព្ពេន ជានិត្វា យេ កាយានុបស្សនាសតិអាទីហិ សតា។ ទិដ្ឋធម្មាភិនិព្ពុតាតិ វិទិតធម្មត្តា ទិដ្ឋធម្មា ច រាគាទិនិព្ពានេន ច អភិនិព្ពុតា។ សេសំ សព្ពត្ថ បាកដមេវ។
55-6. Athassa bhagavā taṃ dhammaṃ ācikkhanto ‘‘idhā’’ti gāthādvayamāha. Tattha etadaññāya ye satāti etaṃ nibbānaṃ padamaccutaṃ ‘‘sabbe saṅkhārā aniccā’’tiādinā (dha. pa. 277; theragā. 676; kathā. 753) nayena vipassantā anupubbena jānitvā ye kāyānupassanāsatiādīhi satā. Diṭṭhadhammābhinibbutāti viditadhammattā diṭṭhadhammā ca rāgādinibbānena ca abhinibbutā. Sesaṃ sabbattha pākaṭameva.
ឯវំ ភគវា ឥទម្បិ សុត្តំ អរហត្តនិកូដេនេវ ទេសេសិ, ទេសនាបរិយោសានេ ច បុព្ពសទិសោ ឯវ ធម្មាភិសមយោ អហោសីតិ។
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
សទ្ធម្មប្បជ្ជោតិកាយ ចូឡនិទ្ទេស-អដ្ឋកថាយ
Saddhammappajjotikāya cūḷaniddesa-aṭṭhakathāya
ហេមកមាណវសុត្តនិទ្ទេសវណ្ណនា និដ្ឋិតា។
Hemakamāṇavasuttaniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ចូឡនិទ្ទេសបាឡិ • Cūḷaniddesapāḷi
៨. ហេមកមាណវបុច្ឆា • 8. Hemakamāṇavapucchā
៨. ហេមកមាណវបុច្ឆានិទ្ទេសោ • 8. Hemakamāṇavapucchāniddeso
