| Library / Tipiṭaka / ติปิฎก • Tipiṭaka / จูฬนิเทฺทส-อฎฺฐกถา • Cūḷaniddesa-aṭṭhakathā |
๗. นนฺทมาณวสุตฺตนิเทฺทสวณฺณนา
7. Nandamāṇavasuttaniddesavaṇṇanā
๔๖. สตฺตเม นนฺทสุเตฺต – ปฐมคาถายโตฺถ – โลเก ขตฺติยาทโยชนา อาชีวกนิคณฺฐาทิเก สนฺธาย ‘‘สนฺติ โลเก มุนโย’’ติ วทนฺติฯ ตยิทํ กถํสูติ กิํ นุ โข เต สมาปตฺติญาณาทินา ญาเณน อุปปนฺนตฺตา ญาณูปปนฺนํ มุนิ โน วทนฺติ, เอวํวิธํ นุ วทนฺติ, อุทาหุ เว นานปฺปการเกน ลูขชีวิตสงฺขาเตน ชีวิเตนูปปนฺนนฺติฯ
46. Sattame nandasutte – paṭhamagāthāyattho – loke khattiyādayojanā ājīvakanigaṇṭhādike sandhāya ‘‘santi loke munayo’’ti vadanti. Tayidaṃ kathaṃsūti kiṃ nu kho te samāpattiñāṇādinā ñāṇena upapannattā ñāṇūpapannaṃ muni no vadanti, evaṃvidhaṃ nu vadanti, udāhu ve nānappakārakena lūkhajīvitasaṅkhātena jīvitenūpapannanti.
นิเทฺทเส อฎฺฐสมาปตฺติญาเณน วาติ ปฐมชฺฌานาทิอฎฺฐสมาปตฺติสมฺปยุตฺตญาเณน วาฯ ปญฺจาภิญฺญาญาเณน วาติ ปุเพฺพนิวาสาทิชานนญาเณน วาฯ
Niddese aṭṭhasamāpattiñāṇena vāti paṭhamajjhānādiaṭṭhasamāpattisampayuttañāṇena vā. Pañcābhiññāñāṇena vāti pubbenivāsādijānanañāṇena vā.
๔๗. อถสฺส ภควา ตทุภยมฺปิ ปฎิกฺขิปิตฺวา มุนิํ ทเสฺสโนฺต ‘‘น ทิฎฺฐิยา’’ติ คาถมาหฯ
47. Athassa bhagavā tadubhayampi paṭikkhipitvā muniṃ dassento ‘‘na diṭṭhiyā’’ti gāthamāha.
๔๘. อิทานิ ‘‘ทิฎฺฐาทีหิ สุทฺธี’’ติ วทนฺตานํ วาเท กงฺขาปหานตฺถํ ‘‘เย เกจิเม’’ติ ปุจฺฉติฯ ตตฺถ อเนกรูเปนาติ โกตูหลมงฺคลาทินาปิฯ ตตฺถ ยตา จรนฺตาติ ตตฺถ สกฺกายทิฎฺฐิยา คุตฺตา วิหรนฺตาฯ
48. Idāni ‘‘diṭṭhādīhi suddhī’’ti vadantānaṃ vāde kaṅkhāpahānatthaṃ ‘‘ye kecime’’ti pucchati. Tattha anekarūpenāti kotūhalamaṅgalādināpi. Tattha yatā carantāti tattha sakkāyadiṭṭhiyā guttā viharantā.
๔๙. อถสฺส ตถา สุทฺธิอภาวํ ทีเปโนฺต ภควา จตุตฺถํ คาถมาหฯ
49. Athassa tathā suddhiabhāvaṃ dīpento bhagavā catutthaṃ gāthamāha.
๕๐. เอวํ ‘‘นาตริํสู’’ติ สุตฺวา อิทานิ โย อตริ, ตํ โสตุกาโม ‘‘เย เกจิเม’’ติ ปุจฺฉติฯ อถสฺส ภควา โอฆติณฺณมุเขน ชาติชราติเณฺณ ทเสฺสโนฺต ฉฎฺฐํ คาถมาหฯ
50. Evaṃ ‘‘nātariṃsū’’ti sutvā idāni yo atari, taṃ sotukāmo ‘‘ye kecime’’ti pucchati. Athassa bhagavā oghatiṇṇamukhena jātijarātiṇṇe dassento chaṭṭhaṃ gāthamāha.
๕๑. ตตฺถ นิวุตาติ โอวุฎา ปริโยนทฺธาฯ เย สีธาติ เย สุ อิธ, เอตฺถ จ สุ-อิติ นิปาตมตฺตํฯ ตณฺหํ ปริญฺญายาติ ตีหิ ปริญฺญาหิ ตณฺหํ ปริชานิตฺวาฯ เสสํ สพฺพตฺถ ปุเพฺพ วุตฺตนยตฺตา ปากฎเมวฯ
51. Tattha nivutāti ovuṭā pariyonaddhā. Ye sīdhāti ye su idha, ettha ca su-iti nipātamattaṃ. Taṇhaṃ pariññāyāti tīhi pariññāhi taṇhaṃ parijānitvā. Sesaṃ sabbattha pubbe vuttanayattā pākaṭameva.
๕๒. เอวํ ภควา อรหตฺตนิกูเฎเนว เทสนํ นิฎฺฐาเปสิ, เทสนาปริโยสาเน ปน นโนฺท ภควโต ภาสิตํ อภินนฺทมาโน เอตาภินนฺทามีติ คาถมาหฯ อิธาปิ จ ปุเพฺพ วุตฺตสทิโส เอว ธมฺมาภิสมโย อโหสีติฯ
52. Evaṃ bhagavā arahattanikūṭeneva desanaṃ niṭṭhāpesi, desanāpariyosāne pana nando bhagavato bhāsitaṃ abhinandamāno etābhinandāmīti gāthamāha. Idhāpi ca pubbe vuttasadiso eva dhammābhisamayo ahosīti.
สทฺธมฺมปฺปโชฺชติกาย จูฬนิเทฺทส-อฎฺฐกถาย
Saddhammappajjotikāya cūḷaniddesa-aṭṭhakathāya
นนฺทมาณวสุตฺตนิเทฺทสวณฺณนา นิฎฺฐิตาฯ
Nandamāṇavasuttaniddesavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / จูฬนิเทฺทสปาฬิ • Cūḷaniddesapāḷi
๗. นนฺทมาณวปุจฺฉา • 7. Nandamāṇavapucchā
๗. นนฺทมาณวปุจฺฉานิเทฺทโส • 7. Nandamāṇavapucchāniddeso
