| Library / Tipiṭaka / ติปิฎก • Tipiṭaka / จูฬนิเทฺทส-อฎฺฐกถา • Cūḷaniddesa-aṭṭhakathā |
๘. เหมกมาณวสุตฺตนิเทฺทสวณฺณนา
8. Hemakamāṇavasuttaniddesavaṇṇanā
๕๓. อฎฺฐเม เหมกสุเตฺต – เย เม ปุเพฺพ วิยากํสูติ เย พาวริอาทโย ปุเพฺพ มยฺหํ สกํ ลทฺธิํ วิยากํสุฯ หุรํ โคตมสาสนาติ โคตมสาสนโต ปุพฺพตรํฯ สพฺพํ ตํ ตกฺกวฑฺฒนนฺติ สพฺพํ ตํ กามวิตกฺกาทิวฑฺฒนํฯ
53. Aṭṭhame hemakasutte – ye me pubbe viyākaṃsūti ye bāvariādayo pubbe mayhaṃ sakaṃ laddhiṃ viyākaṃsu. Huraṃ gotamasāsanāti gotamasāsanato pubbataraṃ. Sabbaṃ taṃ takkavaḍḍhananti sabbaṃ taṃ kāmavitakkādivaḍḍhanaṃ.
เย จเญฺญ ตสฺส อาจริยาติ เย จ อเญฺญ ตสฺส พาวริยสฺส อาจาเร สิกฺขาปกา อาจริยาฯ เต สกํ ทิฎฺฐินฺติ เต อาจริยา อตฺตโน ทิฎฺฐิํฯ สกํ ขนฺตินฺติ อตฺตโน ขมนํฯ สกํ รุจินฺติ อตฺตโน โรจนํฯ วิตกฺกวฑฺฒนนฺติ กามวิตกฺกาทิวิตกฺกานํ อุปฺปาทนํ ปุนปฺปุนํ ปวตฺตนํฯ สงฺกปฺปวฑฺฒนนฺติ กามสงฺกปฺปาทีนํ วฑฺฒนํฯ อิมานิ เทฺว ปทานิ สพฺพสงฺคาหิกวเสน วุตฺตานิฯ อิทานิ กามวิตกฺกาทิเก สรูปโต ทเสฺสตุํ ‘‘กามวิตกฺกวฑฺฒน’’นฺติอาทินา นเยน นววิตเกฺก ทเสฺสสิฯ
Ye caññe tassa ācariyāti ye ca aññe tassa bāvariyassa ācāre sikkhāpakā ācariyā. Te sakaṃ diṭṭhinti te ācariyā attano diṭṭhiṃ. Sakaṃ khantinti attano khamanaṃ. Sakaṃ rucinti attano rocanaṃ. Vitakkavaḍḍhananti kāmavitakkādivitakkānaṃ uppādanaṃ punappunaṃ pavattanaṃ. Saṅkappavaḍḍhananti kāmasaṅkappādīnaṃ vaḍḍhanaṃ. Imāni dve padāni sabbasaṅgāhikavasena vuttāni. Idāni kāmavitakkādike sarūpato dassetuṃ ‘‘kāmavitakkavaḍḍhana’’ntiādinā nayena navavitakke dassesi.
๕๔. ตณฺหานิคฺฆาตนนฺติ ตณฺหาวินาสนํฯ
54.Taṇhānigghātananti taṇhāvināsanaṃ.
๕๕-๖. อถสฺส ภควา ตํ ธมฺมํ อาจิกฺขโนฺต ‘‘อิธา’’ติ คาถาทฺวยมาหฯ ตตฺถ เอตทญฺญาย เย สตาติ เอตํ นิพฺพานํ ปทมจฺจุตํ ‘‘สเพฺพ สงฺขารา อนิจฺจา’’ติอาทินา (ธ. ป. ๒๗๗; เถรคา. ๖๗๖; กถา. ๗๕๓) นเยน วิปสฺสนฺตา อนุปุเพฺพน ชานิตฺวา เย กายานุปสฺสนาสติอาทีหิ สตาฯ ทิฎฺฐธมฺมาภินิพฺพุตาติ วิทิตธมฺมตฺตา ทิฎฺฐธมฺมา จ ราคาทินิพฺพาเนน จ อภินิพฺพุตาฯ เสสํ สพฺพตฺถ ปากฎเมวฯ
55-6. Athassa bhagavā taṃ dhammaṃ ācikkhanto ‘‘idhā’’ti gāthādvayamāha. Tattha etadaññāya ye satāti etaṃ nibbānaṃ padamaccutaṃ ‘‘sabbe saṅkhārā aniccā’’tiādinā (dha. pa. 277; theragā. 676; kathā. 753) nayena vipassantā anupubbena jānitvā ye kāyānupassanāsatiādīhi satā. Diṭṭhadhammābhinibbutāti viditadhammattā diṭṭhadhammā ca rāgādinibbānena ca abhinibbutā. Sesaṃ sabbattha pākaṭameva.
เอวํ ภควา อิทมฺปิ สุตฺตํ อรหตฺตนิกูเฎเนว เทเสสิ, เทสนาปริโยสาเน จ ปุพฺพสทิโส เอว ธมฺมาภิสมโย อโหสีติฯ
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
สทฺธมฺมปฺปโชฺชติกาย จูฬนิเทฺทส-อฎฺฐกถาย
Saddhammappajjotikāya cūḷaniddesa-aṭṭhakathāya
เหมกมาณวสุตฺตนิเทฺทสวณฺณนา นิฎฺฐิตาฯ
Hemakamāṇavasuttaniddesavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / จูฬนิเทฺทสปาฬิ • Cūḷaniddesapāḷi
๘. เหมกมาณวปุจฺฉา • 8. Hemakamāṇavapucchā
๘. เหมกมาณวปุจฺฉานิเทฺทโส • 8. Hemakamāṇavapucchāniddeso
