| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
29-31. ஞாணத்தயனித்³தே³ஸவண்ணனா
29-31. Ñāṇattayaniddesavaṇṇanā
78. ஞாணத்தயனித்³தே³ஸே நிமித்தந்தி ஸங்கா²ரனிமித்தங். அனிமித்தேதி ஸங்கா²ரனிமித்தபடிபக்கே² நிப்³பா³னே. அதி⁴முத்தத்தாதி தன்னின்னபா⁴வேன சித்தஸ்ஸ விஸ்ஸட்ட²த்தா. பு²ஸ்ஸ பு²ஸ்ஸ வயங் பஸ்ஸதீதி ஸங்கா²ரனிமித்தங் ஞாணேன பு²ஸித்வா பு²ஸித்வா தஸ்ஸ ப⁴ங்க³ங் விபஸ்ஸனாஞாணேனேவ பஸ்ஸதி. ஏதேன ப⁴ங்கா³னுபஸ்ஸனா ஸித்³தா⁴. ஸா அனிச்சானுபஸ்ஸனங் ஸாதே⁴தி, அனிச்சஸ்ஸ து³க்க²த்தா ஸா து³க்கா²னுபஸ்ஸனங், து³க்க²ஸ்ஸ அனத்தத்தா ஸா அனத்தானுபஸ்ஸனந்தி ஏவமெத்த² திஸ்ஸோ அனுபஸ்ஸனா வுத்தா ஹொந்தி. அனிமித்தோ விஹாரோதி நிமித்தங் ப⁴யதோ தி³ட்ட²த்தா ஸோ விபஸ்ஸனத்தயவிஹாரோ அனிமித்தவிஹாரோ நாம ஹோதி. பணிதி⁴ந்தி தண்ஹங். அப்பணிஹிதேதி தண்ஹாபடிபக்கே² நிப்³பா³னே. அபி⁴னிவேஸந்தி அத்தாபி⁴னிவேஸங். ஸுஞ்ஞதேதி அத்தவிரஹிதே நிப்³பா³னே. ஸுஞ்ஞதோதி ஸுஞ்ஞங்யேவ ஸுஞ்ஞதோ. பவத்தங் அஜ்ஜு²பெக்கி²த்வாதி விபாகப்பவத்தங் ஸங்கா²ருபெக்கா²ய அஜ்ஜு²பெக்கி²த்வா. ஸுக³திஸங்கா²தவிபாகப்பவத்தாபி⁴னந்தி³னோ ஹி ஸத்தா. அயங் பன ப²லஸமாபத்திங் ஸமாபஜ்ஜிதுகாமோ தங் பவத்தங், ஸப்³ப³ஞ்ச ஸங்கா²ரக³தங் அனிச்சாதி³தோ பஸ்ஸித்வா அஜ்ஜு²பெக்க²தியேவ. ஏவஞ்ஹி தி³ட்டே² ப²லஸமாபத்திங் ஸமாபஜ்ஜிதுங் ஸக்கோதி, ந அஞ்ஞதா². ஆவஜ்ஜித்வாதி ஆவஜ்ஜனேன ஆவஜ்ஜித்வா. ஸமாபஜ்ஜதீதி ப²லஸமாபத்திங் படிபஜ்ஜதி. அனிமித்தா ஸமாபத்தீதி நிமித்தங் ப⁴யதோ தி³ஸ்வா ஸமாபன்னத்தா அனிமித்தா ஸமாபத்தி நாம. அனிமித்தவிஹாரஸமாபத்தீதி விபஸ்ஸனாவிஹாரவஸேன ச ப²லஸமாபத்திவஸேன ச தது³ப⁴யங் நாம ஹோதி.
78. Ñāṇattayaniddese nimittanti saṅkhāranimittaṃ. Animitteti saṅkhāranimittapaṭipakkhe nibbāne. Adhimuttattāti tanninnabhāvena cittassa vissaṭṭhattā. Phussa phussa vayaṃ passatīti saṅkhāranimittaṃ ñāṇena phusitvā phusitvā tassa bhaṅgaṃ vipassanāñāṇeneva passati. Etena bhaṅgānupassanā siddhā. Sā aniccānupassanaṃ sādheti, aniccassa dukkhattā sā dukkhānupassanaṃ, dukkhassa anattattā sā anattānupassananti evamettha tisso anupassanā vuttā honti. Animitto vihāroti nimittaṃ bhayato diṭṭhattā so vipassanattayavihāro animittavihāro nāma hoti. Paṇidhinti taṇhaṃ. Appaṇihiteti taṇhāpaṭipakkhe nibbāne. Abhinivesanti attābhinivesaṃ. Suññateti attavirahite nibbāne. Suññatoti suññaṃyeva suññato. Pavattaṃ ajjhupekkhitvāti vipākappavattaṃ saṅkhārupekkhāya ajjhupekkhitvā. Sugatisaṅkhātavipākappavattābhinandino hi sattā. Ayaṃ pana phalasamāpattiṃ samāpajjitukāmo taṃ pavattaṃ, sabbañca saṅkhāragataṃ aniccādito passitvā ajjhupekkhatiyeva. Evañhi diṭṭhe phalasamāpattiṃ samāpajjituṃ sakkoti, na aññathā. Āvajjitvāti āvajjanena āvajjitvā. Samāpajjatīti phalasamāpattiṃ paṭipajjati. Animittā samāpattīti nimittaṃ bhayato disvā samāpannattā animittā samāpatti nāma. Animittavihārasamāpattīti vipassanāvihāravasena ca phalasamāpattivasena ca tadubhayaṃ nāma hoti.
79. இதா³னி ஸங்கா²ரனிமித்தமேவ விப⁴ஜித்வா த³ஸ்ஸெந்தோ ரூபனிமித்தந்திஆதி³மாஹ. ஜராமரணக்³க³ஹணே வத்தப்³ப³ங் புப்³பே³ வுத்தமேவ. ‘‘அஞ்ஞோ அனிமித்தவிஹாரோ’’திஆதீ³ஹி வுத்தேயேவ நிக³மெத்வா த³ஸ்ஸேதி. ஸங்கே²பேன விஹாரட்டே² ஞாணங் நாம ப²லஸமாபத்தியா புப்³ப³பா⁴கே³ ஸங்கா²ருபெக்கா²ஞாணே டி²தஸ்ஸ விபஸ்ஸனாவிஹாரனானத்தே ஞாணங் ஸமாபத்தட்டே² ஞாணங் நாம ப²லஸமாபத்தினானத்தே ஞாணங். விஹாரஸமாபத்தட்டே² ஞாணங் நாம தது³ப⁴யனானத்தே ஞாணங். விபஸ்ஸனாவிஹாரேனேவ வீதினாமேதுகாமோ விபஸ்ஸனாவிஹாரமேவ பவத்தேதி, ப²லஸமாபத்திவிஹாரேனேவ வீதினாமேதுகாமோ விபஸ்ஸனாபடிபாடியா உஸ்ஸக்கித்வா ப²லஸமாபத்திவிஹாரமேவ பவத்தேதி, தது³ப⁴யேன வீதினாமேதுகாமோ தது³ப⁴யங் பவத்தேதி. ஏவங் புக்³க³லாதி⁴ப்பாயவஸேன திவித⁴ங் ஜாதங். ஸேஸமெத்த² வத்தப்³ப³ங் ஸங்கா²ருபெக்கா²ஞாணவண்ணனாயங் வுத்தமேவ.
79. Idāni saṅkhāranimittameva vibhajitvā dassento rūpanimittantiādimāha. Jarāmaraṇaggahaṇe vattabbaṃ pubbe vuttameva. ‘‘Añño animittavihāro’’tiādīhi vutteyeva nigametvā dasseti. Saṅkhepena vihāraṭṭhe ñāṇaṃ nāma phalasamāpattiyā pubbabhāge saṅkhārupekkhāñāṇe ṭhitassa vipassanāvihāranānatte ñāṇaṃ samāpattaṭṭhe ñāṇaṃ nāma phalasamāpattinānatte ñāṇaṃ. Vihārasamāpattaṭṭhe ñāṇaṃ nāma tadubhayanānatte ñāṇaṃ. Vipassanāvihāreneva vītināmetukāmo vipassanāvihārameva pavatteti, phalasamāpattivihāreneva vītināmetukāmo vipassanāpaṭipāṭiyā ussakkitvā phalasamāpattivihārameva pavatteti, tadubhayena vītināmetukāmo tadubhayaṃ pavatteti. Evaṃ puggalādhippāyavasena tividhaṃ jātaṃ. Sesamettha vattabbaṃ saṅkhārupekkhāñāṇavaṇṇanāyaṃ vuttameva.
ஞாணத்தயனித்³தே³ஸவண்ணனா நிட்டி²தா.
Ñāṇattayaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 29-31. ஞாணத்தயனித்³தே³ஸோ • 29-31. Ñāṇattayaniddeso
