| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
১৫. মোঘরাজসুত্তৰণ্ণনা
15. Mogharājasuttavaṇṇanā
১১২৩. দ্ৰাহং সক্কন্তি মোঘরাজসুত্তং। তত্থ দ্ৰাহন্তি দ্ৰে ৰারে অহং। সো হি পুব্বে অজিতসুত্তস্স চ তিস্সমেত্তেয্যসুত্তস্স চ অৰসানে দ্ৰিক্খত্তুং ভগৰন্তং পুচ্ছি। ভগৰা পনস্স ইন্দ্রিযপরিপাকং আগমযমানো ন ব্যাকাসি। তেনাহ – ‘‘দ্ৰাহং সক্কং অপুচ্ছিস্স’’ন্তি। যাৰততিযঞ্চ দেৰীসি, ব্যাকরোতীতি মে সুতন্তি যাৰততিযঞ্চ সহধম্মিকং পুট্ঠো ৰিসুদ্ধিদেৰভূতো ইসি ভগৰা সম্মাসম্বুদ্ধো ব্যাকরোতীতি এৰং মে সুতং। গোধাৰরীতীরেযেৰ কির সো এৰমস্সোসি। তেনাহ – ‘‘ব্যাকরোতীতি মে সুত’’ন্তি।
1123.Dvāhaṃsakkanti mogharājasuttaṃ. Tattha dvāhanti dve vāre ahaṃ. So hi pubbe ajitasuttassa ca tissametteyyasuttassa ca avasāne dvikkhattuṃ bhagavantaṃ pucchi. Bhagavā panassa indriyaparipākaṃ āgamayamāno na byākāsi. Tenāha – ‘‘dvāhaṃ sakkaṃ apucchissa’’nti. Yāvatatiyañca devīsi, byākarotīti me sutanti yāvatatiyañca sahadhammikaṃ puṭṭho visuddhidevabhūto isi bhagavā sammāsambuddho byākarotīti evaṃ me sutaṃ. Godhāvarītīreyeva kira so evamassosi. Tenāha – ‘‘byākarotīti me suta’’nti.
১১২৪. অযং লোকোতি মনুস্সলোকো। পরো লোকোতি তং ঠপেত্ৰা অৰসেসো। সদেৰকোতি ব্রহ্মলোকং ঠপেত্ৰা অৰসেসো উপপত্তিদেৰসম্মুতিদেৰযুত্তো, ‘‘ব্রহ্মলোকো সদেৰকো’’তি এতং ৰা ‘‘সদেৰকে লোকে’’তিআদিনযনিদস্সনমত্তং, তেন সব্বোপি তথাৰুত্তপ্পকারো লোকো ৰেদিতব্বো।
1124.Ayaṃ lokoti manussaloko. Paro lokoti taṃ ṭhapetvā avaseso. Sadevakoti brahmalokaṃ ṭhapetvā avaseso upapattidevasammutidevayutto, ‘‘brahmaloko sadevako’’ti etaṃ vā ‘‘sadevake loke’’tiādinayanidassanamattaṃ, tena sabbopi tathāvuttappakāro loko veditabbo.
১১২৫. এৰং অভিক্কন্তদস্সাৰিন্তি এৰং অগ্গদস্সাৰিং, সদেৰকস্স লোকস্স অজ্ঝাসযাধিমুত্তিগতিপরাযণাদীনি পস্সিতুং সমত্থন্তি দস্সেতি।
1125. Evaṃ abhikkantadassāvinti evaṃ aggadassāviṃ, sadevakassa lokassa ajjhāsayādhimuttigatiparāyaṇādīni passituṃ samatthanti dasseti.
১১২৬. সুঞ্ঞতো লোকং অৰেক্খস্সূতি অৰসিযপৰত্তসল্লক্খণৰসেন ৰা তুচ্ছসঙ্খারসমনুপস্সনাৰসেন ৰাতি দ্ৰীহি কারণেহি সুঞ্ঞতো লোকং পস্স। অত্তানুদিট্ঠিং ঊহচ্চাতি সক্কাযদিট্ঠিং উদ্ধরিত্ৰা। সেসং সব্বত্থ পাকটমেৰ।
1126.Suññato lokaṃ avekkhassūti avasiyapavattasallakkhaṇavasena vā tucchasaṅkhārasamanupassanāvasena vāti dvīhi kāraṇehi suññato lokaṃ passa. Attānudiṭṭhiṃ ūhaccāti sakkāyadiṭṭhiṃ uddharitvā. Sesaṃ sabbattha pākaṭameva.
এৰং ভগৰা ইমম্পি সুত্তং অরহত্তনিকূটেনেৰ দেসেসি। দেসনাপরিযোসানে চ ৰুত্তসদিসো এৰ ধম্মাভিসমযো অহোসীতি।
Evaṃ bhagavā imampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
পরমত্থজোতিকায খুদ্দক-অট্ঠকথায
Paramatthajotikāya khuddaka-aṭṭhakathāya
সুত্তনিপাত-অট্ঠকথায মোঘরাজসুত্তৰণ্ণনা নিট্ঠিতা।
Suttanipāta-aṭṭhakathāya mogharājasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / সুত্তনিপাতপাল়ি • Suttanipātapāḷi / ১৫. মোঘরাজমাণৰপুচ্ছা • 15. Mogharājamāṇavapucchā
