| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១៥. មោឃរាជមាណវបុច្ឆា
15. Mogharājamāṇavapucchā
១១២២.
1122.
‘‘ទ្វាហំ សក្កំ អបុច្ឆិស្សំ, (ឥច្ចាយស្មា មោឃរាជា)
‘‘Dvāhaṃ sakkaṃ apucchissaṃ, (iccāyasmā mogharājā)
ន មេ ព្យាកាសិ ចក្ខុមា;
Na me byākāsi cakkhumā;
យាវតតិយញ្ច ទេវីសិ, ព្យាករោតីតិ មេ សុតំ។
Yāvatatiyañca devīsi, byākarotīti me sutaṃ.
១១២៣.
1123.
‘‘អយំ លោកោ បរោ លោកោ, ព្រហ្មលោកោ សទេវកោ;
‘‘Ayaṃ loko paro loko, brahmaloko sadevako;
ទិដ្ឋិំ តេ នាភិជានាតិ, គោតមស្ស យសស្សិនោ។
Diṭṭhiṃ te nābhijānāti, gotamassa yasassino.
១១២៤.
1124.
‘‘ឯវំ អភិក្កន្តទស្សាវិំ, អត្ថិ បញ្ហេន អាគមំ;
‘‘Evaṃ abhikkantadassāviṃ, atthi pañhena āgamaṃ;
កថំ លោកំ អវេក្ខន្តំ, មច្ចុរាជា ន បស្សតិ’’។
Kathaṃ lokaṃ avekkhantaṃ, maccurājā na passati’’.
១១២៥.
1125.
‘‘សុញ្ញតោ លោកំ អវេក្ខស្សុ, មោឃរាជ សទា សតោ;
‘‘Suññato lokaṃ avekkhassu, mogharāja sadā sato;
អត្តានុទិដ្ឋិំ ឩហច្ច, ឯវំ មច្ចុតរោ សិយា;
Attānudiṭṭhiṃ ūhacca, evaṃ maccutaro siyā;
ឯវំ លោកំ អវេក្ខន្តំ, មច្ចុរាជា ន បស្សតី’’តិ។
Evaṃ lokaṃ avekkhantaṃ, maccurājā na passatī’’ti.
មោឃរាជមាណវបុច្ឆា បន្នរសមា និដ្ឋិតា។
Mogharājamāṇavapucchā pannarasamā niṭṭhitā.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១៥. មោឃរាជសុត្តវណ្ណនា • 15. Mogharājasuttavaṇṇanā
