| Tipiṭaka / তিপিটক • Tipiṭaka / জাতকপাল়ি • Jātakapāḷi |
৪৪৭. মহাধম্মপালজাতকং (৯)
447. Mahādhammapālajātakaṃ (9)
৯২.
92.
কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো।
Kiṃ te vataṃ kiṃ pana brahmacariyaṃ, kissa suciṇṇassa ayaṃ vipāko;
অক্খাহি মে ব্রাহ্মণ এতমত্থং, কস্মা নু তুম্হং দহরা ন মিয্যরে 1॥
Akkhāhi me brāhmaṇa etamatthaṃ, kasmā nu tumhaṃ daharā na miyyare 2.
৯৩.
93.
ধম্মং চরাম ন মুসা ভণাম, পাপানি কম্মানি পরিৰজ্জযাম 3।
Dhammaṃ carāma na musā bhaṇāma, pāpāni kammāni parivajjayāma 4;
অনরিযং পরিৰজ্জেমু সব্বং, তস্মা হি অম্হং দহরা ন মিয্যরে॥
Anariyaṃ parivajjemu sabbaṃ, tasmā hi amhaṃ daharā na miyyare.
৯৪.
94.
সুণোম ধম্মং অসতং সতঞ্চ, ন চাপি ধম্মং অসতং রোচযাম।
Suṇoma dhammaṃ asataṃ satañca, na cāpi dhammaṃ asataṃ rocayāma;
হিত্ৰা অসন্তে ন জহাম সন্তে, তস্মা হি অম্হং দহরা ন মিয্যরে॥
Hitvā asante na jahāma sante, tasmā hi amhaṃ daharā na miyyare.
৯৫.
95.
পুব্বেৰ দানা সুমনা ভৰাম, দদম্পি ৰে অত্তমনা ভৰাম।
Pubbeva dānā sumanā bhavāma, dadampi ve attamanā bhavāma;
দত্ৰাপি ৰে নানুতপ্পাম পচ্ছা, তস্মা হি অম্হং দহরা ন মিয্যরে॥
Datvāpi ve nānutappāma pacchā, tasmā hi amhaṃ daharā na miyyare.
৯৬.
96.
সমণে মযং ব্রাহ্মণে অদ্ধিকে চ, ৰনিব্বকে যাচনকে দলিদ্দে।
Samaṇe mayaṃ brāhmaṇe addhike ca, vanibbake yācanake dalidde;
অন্নেন পানেন অভিতপ্পযাম, তস্মা হি অম্হং দহরা ন মিয্যরে॥
Annena pānena abhitappayāma, tasmā hi amhaṃ daharā na miyyare.
৯৭.
97.
মযঞ্চ ভরিযং নাতিক্কমাম, অম্হে চ ভরিযা নাতিক্কমন্তি।
Mayañca bhariyaṃ nātikkamāma, amhe ca bhariyā nātikkamanti;
অঞ্ঞত্র তাহি ব্রহ্মচরিযং চরাম, তস্মা হি অম্হং দহরা ন মিয্যরে॥
Aññatra tāhi brahmacariyaṃ carāma, tasmā hi amhaṃ daharā na miyyare.
৯৮.
98.
পাণাতিপাতা ৰিরমাম সব্বে, লোকে অদিন্নং পরিৰজ্জযাম।
Pāṇātipātā viramāma sabbe, loke adinnaṃ parivajjayāma;
অমজ্জপা নোপি মুসা ভণাম, তস্মা হি অম্হং দহরা ন মিয্যরে॥
Amajjapā nopi musā bhaṇāma, tasmā hi amhaṃ daharā na miyyare.
৯৯.
99.
এতাসু ৰে জাযরে সুত্তমাসু, মেধাৰিনো হোন্তি পহূতপঞ্ঞা।
Etāsu ve jāyare suttamāsu, medhāvino honti pahūtapaññā;
বহুস্সুতা ৰেদগুনো 5 চ হোন্তি, তস্মা হি অম্হং দহরা ন মিয্যরে॥
Bahussutā vedaguno 6 ca honti, tasmā hi amhaṃ daharā na miyyare.
১০০.
100.
মাতা পিতা চ 7 ভগিনী ভাতরো চ, পুত্তা চ দারা চ মযঞ্চ সব্বে।
Mātā pitā ca 8 bhaginī bhātaro ca, puttā ca dārā ca mayañca sabbe;
ধম্মং চরাম পরলোকহেতু, তস্মা হি অম্হং দহরা ন মিয্যরে॥
Dhammaṃ carāma paralokahetu, tasmā hi amhaṃ daharā na miyyare.
১০১.
101.
দাসা চ দাস্যো 9 অনুজীৰিনো চ, পরিচারকা কম্মকরা চ সব্বে।
Dāsā ca dāsyo 10 anujīvino ca, paricārakā kammakarā ca sabbe;
ধম্মং চরন্তি পরলোকহেতু, তস্মা হি অম্হং দহরা ন মিয্যরে॥
Dhammaṃ caranti paralokahetu, tasmā hi amhaṃ daharā na miyyare.
১০২.
102.
ধম্মো হৰে রক্খতি ধম্মচারিং, ধম্মো সুচিণ্ণো সুখমাৰহাতি।
Dhammo have rakkhati dhammacāriṃ, dhammo suciṇṇo sukhamāvahāti;
এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচারী॥
Esānisaṃso dhamme suciṇṇe, na duggatiṃ gacchati dhammacārī.
১০৩.
103.
ধম্মো হৰে রক্খতি ধম্মচারিং, ছত্তং মহন্তং ৰিয ৰস্সকালে।
Dhammo have rakkhati dhammacāriṃ, chattaṃ mahantaṃ viya vassakāle;
ধম্মেন গুত্তো মম ধম্মপালো, অঞ্ঞস্স অট্ঠীনি সুখী কুমারোতি॥
Dhammena gutto mama dhammapālo, aññassa aṭṭhīni sukhī kumāroti.
মহাধম্মপালজাতকং নৰমং।
Mahādhammapālajātakaṃ navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / জাতক-অট্ঠকথা • Jātaka-aṭṭhakathā / [৪৪৭] ৯. মহাধম্মপালজাতকৰণ্ণনা • [447] 9. Mahādhammapālajātakavaṇṇanā
