| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೦. ಲೋಕಸುತ್ತವಣ್ಣನಾ
10. Lokasuttavaṇṇanā
೭೦. ಕಿಸ್ಮಿನ್ತಿ ಕಿಸ್ಮಿಂ ಸತಿ? ತಸ್ಸ ಪನ ಸನ್ತಭಾವೋ ಉಪ್ಪತ್ತಿವಸೇನೇವಾತಿ ಆಹ ‘‘ಕಿಸ್ಮಿಂ ಉಪ್ಪನ್ನೇ’’ತಿ? ಲೋಕೋ ಉಪ್ಪನ್ನೋತಿ ವುಚ್ಚತಿ ಅನುಪಾದಾನತ್ತಾ ಲೋಕಸಮಞ್ಞಾಯ। ಛಸೂತಿ ಏತ್ಥಾಪಿ ಏಸೇವ ನಯೋ ಸನ್ಥವನ್ತಿ ಅಧಿಕಸಿನೇಹಂ ಕರೋತಿ ಅಧಿಕಸಿನೇಹವತ್ಥುಭಾವತೋ ಅಜ್ಝತ್ತಿಕಾಯತನಾನಂ। ಉಪಾದಾಯಾತಿ ಪುಬ್ಬಕಾಲಕಿರಿಯಾ ಅಪರಕಾಲಕಿರಿಯಂ ಅಪೇಕ್ಖತೀತಿ ವಚನಸೇಸವಸೇನ ಕಿರಿಯಾಪದಂ ಗಹಿತಂ ‘‘ಪವತ್ತತೀ’’ತಿ। ಕಿಂ ಪನ ಪವತ್ತತಿ? ಲೋಕೋ, ಲೋಕಸಮಞ್ಞಾತಿ ಅತ್ಥೋ। ಛಸೂತಿ ಇದಂ ನಿಮಿತ್ತತ್ಥೇ ಭುಮ್ಮಂ। ಛಳಾಯತನನಿಮಿತ್ತಞ್ಹಿ ಸಬ್ಬದುಕ್ಖಂ। ಅಯನ್ತಿ ಸತ್ತಲೋಕೋ। ಉಪ್ಪನ್ನೋ ನಾಮ ಹೋತಿ ಛಳಾಯತನಂ ನಾಮ ಮೂಲಂ ಸಬ್ಬದುಕ್ಖಾನನ್ತಿ ಕತ್ವಾ। ಬಾಹಿರೇಸು ಆಯತನೇಸು ಸನ್ಥವಂ ಕರೋತಿ ವಿಸೇಸತೋ ರೂಪಾದೀನಂ ತಣ್ಹಾವತ್ಥುಕತ್ತಾ। ಯಸ್ಮಾ ಚಕ್ಖಾದೀನಂ ಸನ್ತಪ್ಪನವಸೇನ ರೂಪಾದೀನಂ ಪರಿಗ್ಗಹಿತತ್ತಾ ಲೋಕಸ್ಸ ನಿಸೇವಿತಾಯ ಸಂವತ್ತತಿ, ತಸ್ಮಾ ವುತ್ತಂ ‘‘ಛನ್ನಂ…ಪೇ॰… ವಿಹಞ್ಞತೀ’’ತಿ।
70.Kisminti kismiṃ sati? Tassa pana santabhāvo uppattivasenevāti āha ‘‘kismiṃ uppanne’’ti? Loko uppannoti vuccati anupādānattā lokasamaññāya. Chasūti etthāpi eseva nayo santhavanti adhikasinehaṃ karoti adhikasinehavatthubhāvato ajjhattikāyatanānaṃ. Upādāyāti pubbakālakiriyā aparakālakiriyaṃ apekkhatīti vacanasesavasena kiriyāpadaṃ gahitaṃ ‘‘pavattatī’’ti. Kiṃ pana pavattati? Loko, lokasamaññāti attho. Chasūti idaṃ nimittatthe bhummaṃ. Chaḷāyatananimittañhi sabbadukkhaṃ. Ayanti sattaloko. Uppanno nāma hoti chaḷāyatanaṃ nāma mūlaṃ sabbadukkhānanti katvā. Bāhiresu āyatanesu santhavaṃ karoti visesato rūpādīnaṃ taṇhāvatthukattā. Yasmā cakkhādīnaṃ santappanavasena rūpādīnaṃ pariggahitattā lokassa nisevitāya saṃvattati, tasmā vuttaṃ ‘‘channaṃ…pe… vihaññatī’’ti.
ಲೋಕಸುತ್ತವಣ್ಣನಾ ನಿಟ್ಠಿತಾ।
Lokasuttavaṇṇanā niṭṭhitā.
ಅದ್ಧವಗ್ಗವಣ್ಣನಾ ನಿಟ್ಠಿತಾ।
Addhavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧೦. ಲೋಕಸುತ್ತಂ • 10. Lokasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧೦. ಲೋಕಸುತ್ತವಣ್ಣನಾ • 10. Lokasuttavaṇṇanā
