| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
២២៧. កុសចីរាទិបដិក្ខេបកថា
227. Kusacīrādipaṭikkhepakathā
៣៧១. ‘‘អក្កនាឡមយ’’ន្តិ ឥមិនា អក្កនាឡេន និព្ពត្តំ អក្កនាឡន្តិ វចនត្ថំ ទស្សេតិ។ មកចិមយោតិ ឯត្ថ មកចិសទ្ទេន បោត្ថកសទ្ទស្ស គន្ថាទយោ អត្ថេ និវត្តេតិ។ មយសទ្ទេន បុរិមនយេនេវ និព្ពត្តតទ្ធិតំ ទស្សេតិ។ សេសានីតិ អក្កនាឡបោត្ថកេហិ សេសានិ កុសចីរាទីនិ។ តេសូតិ កុសចីរាទីសុ។
371. ‘‘Akkanāḷamaya’’nti iminā akkanāḷena nibbattaṃ akkanāḷanti vacanatthaṃ dasseti. Makacimayoti ettha makacisaddena potthakasaddassa ganthādayo atthe nivatteti. Mayasaddena purimanayeneva nibbattataddhitaṃ dasseti. Sesānīti akkanāḷapotthakehi sesāni kusacīrādīni. Tesūti kusacīrādīsu.
៣៧២. តិបដ្ដចីវរស្ស វាតិ ឥទំ ទ្វិបដ្ដចីវរស្ស មជ្ឈេ ទានំ សន្ធាយ វុត្តំ។ តេសន្តិ សព្ពនីលកាទីនំ។ កញ្ចុកន្តិ វារណំ។ តញ្ហិ កចិយតិ កាយេ ពន្ធិយតីតិ កញ្ចុកោតិ វុច្ចតិ។ វេឋនេបីតិ ឧណ្ហីសេបិ។ តញ្ហិ យស្មា យេន សីសេ វេឋិយតិ, តស្មា វេឋនន្តិ វុច្ចតិ។ រុក្ខឆល្លិមយន្តិ ឯត្ថ រុក្ខឆល្លិសទ្ទេន តិរីដសទ្ទស្ស វក្កលត្ថំ ទស្សេតិ។ វក្កលញ្ហិ និវសនានំ អង្គបច្ចង្គំ តិរោភាវំ បដិច្ឆន្នភាវំ ឯតិ គច្ឆតិ អនេនាតិ វា រុក្ខំ តិរោបដិច្ឆន្នំ ហុត្វា ឯតិ បវត្តតីតិ វា តិរីដន្តិ វុច្ចតិ។ អភិធានេ (អភិធានប្បទីបិកាយំ ៤៤២ គាថាយំ) បន តរីដន្តិ តការេ ឥការវិរហិតោ បាឋោ អត្ថិ។ បាទបុញ្ជនន្តិ បាទោ បុជិយតិ សោធិយតិ អនេនាតិ បាទបុញ្ជនំ, តាលុជោ តតិយក្ខរោ។
372.Tipaṭṭacīvarassa vāti idaṃ dvipaṭṭacīvarassa majjhe dānaṃ sandhāya vuttaṃ. Tesanti sabbanīlakādīnaṃ. Kañcukanti vāraṇaṃ. Tañhi kaciyati kāye bandhiyatīti kañcukoti vuccati. Veṭhanepīti uṇhīsepi. Tañhi yasmā yena sīse veṭhiyati, tasmā veṭhananti vuccati. Rukkhachallimayanti ettha rukkhachallisaddena tirīṭasaddassa vakkalatthaṃ dasseti. Vakkalañhi nivasanānaṃ aṅgapaccaṅgaṃ tirobhāvaṃ paṭicchannabhāvaṃ eti gacchati anenāti vā rukkhaṃ tiropaṭicchannaṃ hutvā eti pavattatīti vā tirīṭanti vuccati. Abhidhāne (abhidhānappadīpikāyaṃ 442 gāthāyaṃ) pana tarīṭanti takāre ikāravirahito pāṭho atthi. Pādapuñjananti pādo pujiyati sodhiyati anenāti pādapuñjanaṃ, tālujo tatiyakkharo.
៣៧៤. សន្តេ បតិរូបកេ គាហកេតិ ឯត្ថ បតិរូបកោ នាម បក្កមន្តស្ស ភិក្ខុនោ សន្ទិដ្ឋសម្ភត្តោ។ ឥមិនា បតិរូបកេ គាហកេ អសតិ អទត្វា សង្ឃេន ភាជិតេ សុភាជិតមេវាតិ ទស្សេតិ។ សត្ត ជនាតិ បក្កមន្តឧម្មត្តកខិត្តចិត្តវេទនដ្ដា ចត្តារោ, ឧក្ខិត្តកា តយោតិ សត្ត ជនា។
374.Sante patirūpake gāhaketi ettha patirūpako nāma pakkamantassa bhikkhuno sandiṭṭhasambhatto. Iminā patirūpake gāhake asati adatvā saṅghena bhājite subhājitamevāti dasseti. Satta janāti pakkamantaummattakakhittacittavedanaṭṭā cattāro, ukkhittakā tayoti satta janā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
២២៧. កុសចីរាទិបដិក្ខេបកថា • 227. Kusacīrādipaṭikkhepakathā
២២៨. សព្ពនីលកាទិបដិក្ខេបកថា • 228. Sabbanīlakādipaṭikkhepakathā
២២៩. វស្សំវុដ្ឋានំ អនុប្បន្នចីវរកថា • 229. Vassaṃvuṭṭhānaṃ anuppannacīvarakathā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / កុសចីរាទិបដិក្ខេបកថា • Kusacīrādipaṭikkhepakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / មតសន្តកកថាទិវណ្ណនា • Matasantakakathādivaṇṇanā
