| Library / Tipiṭaka / ತಿಪಿಟಕ • Tipiṭaka / ವಿಮಾನವತ್ಥುಪಾಳಿ • Vimānavatthupāḷi |
೧೭. ಕೇಸಕಾರೀವಿಮಾನವತ್ಥು
17. Kesakārīvimānavatthu
೧೫೦.
150.
‘‘ಇದಂ ವಿಮಾನಂ ರುಚಿರಂ ಪಭಸ್ಸರಂ, ವೇಳುರಿಯಥಮ್ಭಂ ಸತತಂ ಸುನಿಮ್ಮಿತಂ।
‘‘Idaṃ vimānaṃ ruciraṃ pabhassaraṃ, veḷuriyathambhaṃ satataṃ sunimmitaṃ;
ಸುವಣ್ಣರುಕ್ಖೇಹಿ ಸಮನ್ತಮೋತ್ಥತಂ, ಠಾನಂ ಮಮಂ ಕಮ್ಮವಿಪಾಕಸಮ್ಭವಂ॥
Suvaṇṇarukkhehi samantamotthataṃ, ṭhānaṃ mamaṃ kammavipākasambhavaṃ.
೧೫೧.
151.
‘‘ತತ್ರೂಪಪನ್ನಾ ಪುರಿಮಚ್ಛರಾ ಇಮಾ, ಸತಂ ಸಹಸ್ಸಾನಿ ಸಕೇನ ಕಮ್ಮುನಾ।
‘‘Tatrūpapannā purimaccharā imā, sataṃ sahassāni sakena kammunā;
ತುವಂಸಿ ಅಜ್ಝುಪಗತಾ ಯಸಸ್ಸಿನೀ, ಓಭಾಸಯಂ ತಿಟ್ಠಸಿ ಪುಬ್ಬದೇವತಾ॥
Tuvaṃsi ajjhupagatā yasassinī, obhāsayaṃ tiṭṭhasi pubbadevatā.
೧೫೨.
152.
‘‘ಸಸೀ ಅಧಿಗ್ಗಯ್ಹ ಯಥಾ ವಿರೋಚತಿ, ನಕ್ಖತ್ತರಾಜಾರಿವ ತಾರಕಾಗಣಂ।
‘‘Sasī adhiggayha yathā virocati, nakkhattarājāriva tārakāgaṇaṃ;
ತಥೇವ ತ್ವಂ ಅಚ್ಛರಾಸಙ್ಗಣಂ 1 ಇಮಂ, ದದ್ದಲ್ಲಮಾನಾ ಯಸಸಾ ವಿರೋಚಸಿ॥
Tatheva tvaṃ accharāsaṅgaṇaṃ 2 imaṃ, daddallamānā yasasā virocasi.
೧೫೩.
153.
‘‘ಕುತೋ ನು ಆಗಮ್ಮ ಅನೋಮದಸ್ಸನೇ, ಉಪಪನ್ನಾ ತ್ವಂ ಭವನಂ ಮಮಂ ಇದಂ।
‘‘Kuto nu āgamma anomadassane, upapannā tvaṃ bhavanaṃ mamaṃ idaṃ;
ಬ್ರಹ್ಮಂವ ದೇವಾ ತಿದಸಾ ಸಹಿನ್ದಕಾ, ಸಬ್ಬೇ ನ ತಪ್ಪಾಮಸೇ ದಸ್ಸನೇನ ತ’’ನ್ತಿ॥
Brahmaṃva devā tidasā sahindakā, sabbe na tappāmase dassanena ta’’nti.
೧೫೪.
154.
‘‘ಯಮೇತಂ ಸಕ್ಕ ಅನುಪುಚ್ಛಸೇ ಮಮಂ, ‘ಕುತೋ ಚುತಾ ತ್ವಂ ಇಧ ಆಗತಾ’ತಿ 3।
‘‘Yametaṃ sakka anupucchase mamaṃ, ‘kuto cutā tvaṃ idha āgatā’ti 4;
ಬಾರಾಣಸೀ ನಾಮ ಪುರತ್ಥಿ ಕಾಸಿನಂ, ತತ್ಥ ಅಹೋಸಿಂ ಪುರೇ ಕೇಸಕಾರಿಕಾ॥
Bārāṇasī nāma puratthi kāsinaṃ, tattha ahosiṃ pure kesakārikā.
೧೫೫.
155.
‘‘ಬುದ್ಧೇ ಚ ಧಮ್ಮೇ ಚ ಪಸನ್ನಮಾನಸಾ, ಸಙ್ಘೇ ಚ ಏಕನ್ತಗತಾ ಅಸಂಸಯಾ।
‘‘Buddhe ca dhamme ca pasannamānasā, saṅghe ca ekantagatā asaṃsayā;
ಅಖಣ್ಡಸಿಕ್ಖಾಪದಾ ಆಗತಪ್ಫಲಾ, ಸಮ್ಬೋಧಿಧಮ್ಮೇ ನಿಯತಾ ಅನಾಮಯಾ’’ತಿ॥
Akhaṇḍasikkhāpadā āgatapphalā, sambodhidhamme niyatā anāmayā’’ti.
೧೫೬.
156.
‘‘ತನ್ತ್ಯಾಭಿನನ್ದಾಮಸೇ ಸ್ವಾಗತಞ್ಚ 5 ತೇ, ಧಮ್ಮೇನ ಚ ತ್ವಂ ಯಸಸಾ ವಿರೋಚಸಿ।
‘‘Tantyābhinandāmase svāgatañca 6 te, dhammena ca tvaṃ yasasā virocasi;
ಬುದ್ಧೇ ಚ ಧಮ್ಮೇ ಚ ಪಸನ್ನಮಾನಸೇ, ಸಙ್ಘೇ ಚ ಏಕನ್ತಗತೇ ಅಸಂಸಯೇ।
Buddhe ca dhamme ca pasannamānase, saṅghe ca ekantagate asaṃsaye;
ಅಖಣ್ಡಸಿಕ್ಖಾಪದೇ ಆಗತಪ್ಫಲೇ, ಸಮ್ಬೋಧಿಧಮ್ಮೇ ನಿಯತೇ ಅನಾಮಯೇ’’ತಿ॥
Akhaṇḍasikkhāpade āgatapphale, sambodhidhamme niyate anāmaye’’ti.
ಕೇಸಕಾರೀವಿಮಾನಂ ಸತ್ತರಸಮಂ।
Kesakārīvimānaṃ sattarasamaṃ.
ಪೀಠವಗ್ಗೋ ಪಠಮೋ ನಿಟ್ಠಿತೋ।
Pīṭhavaggo paṭhamo niṭṭhito.
ತಸ್ಸುದ್ದಾನಂ –
Tassuddānaṃ –
ಪಞ್ಚ ಪೀಠಾ ತಯೋ ನಾವಾ, ದೀಪತಿಲದಕ್ಖಿಣಾ ದ್ವೇ।
Pañca pīṭhā tayo nāvā, dīpatiladakkhiṇā dve;
ಪತಿ ದ್ವೇ ಸುಣಿಸಾ ಉತ್ತರಾ, ಸಿರಿಮಾ ಕೇಸಕಾರಿಕಾ।
Pati dve suṇisā uttarā, sirimā kesakārikā;
ವಗ್ಗೋ ತೇನ ಪವುಚ್ಚತೀತಿ॥
Vaggo tena pavuccatīti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ವಿಮಾನವತ್ಥು-ಅಟ್ಠಕಥಾ • Vimānavatthu-aṭṭhakathā / ೧೭. ಕೇಸಕಾರೀವಿಮಾನವಣ್ಣನಾ • 17. Kesakārīvimānavaṇṇanā
