| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[২৯৪] ৪. জম্বুখাদকজাতকৰণ্ণনা
[294] 4. Jambukhādakajātakavaṇṇanā
কোযং বিন্দুস্সরো ৰগ্গূতি ইদং সত্থা ৰেল়ুৰনে ৰিহরন্তো দেৰদত্তকোকালিকে আরব্ভ কথেসি। তদা হি দেৰদত্তে পরিহীনলাভসক্কারে কোকালিকো কুলানি উপসঙ্কমিত্ৰা ‘‘দেৰদত্তত্থেরো নাম মহাসম্মতপৰেণিযা ওক্কাকরাজৰংসে জাতো অসম্ভিন্নখত্তিযৰংসে ৰড্ঢিতো তিপিটকধরো ঝানলাভী মধুরকথো ধম্মকথিকো, দেথ করোথ থেরস্সা’’তি দেৰদত্তস্স ৰণ্ণং ভাসতি। দেৰদত্তোপি ‘‘কোকালিকো উদিচ্চব্রাহ্মণকুলা নিক্খমিত্ৰা পব্বজিতো বহুস্সুতো ধম্মকথিকো, দেথ করোথ কোকালিকস্সা’’তি কোকালিকস্স ৰণ্ণং ভাসতি। ইতি তে অঞ্ঞমঞ্ঞস্স ৰণ্ণং ভাসিত্ৰা কুলঘরেসু ভুঞ্জন্তা ৰিচরন্তি। অথেকদিৰসং ধম্মসভাযং ভিক্খূ কথং সমুট্ঠাপেসুং – ‘‘আৰুসো দেৰদত্তকোকালিকা, অঞ্ঞমঞ্ঞস্স অভূতগুণকথং কথেত্ৰা ভুঞ্জন্তা ৰিচরন্তী’’তি। সত্থা আগন্ত্ৰা ‘‘কায নুত্থ, ভিক্খৰে, এতরহি কথায সন্নিসিন্না’’তি পুচ্ছিত্ৰা ‘‘ইমায নামা’’তি ৰুত্তে ‘‘ন, ভিক্খৰে, ইদানেৰ তে অঞ্ঞমঞ্ঞস্স অভূতগুণকথং কথেত্ৰা ভুঞ্জন্তি, পুব্বেপেৰং ভুঞ্জিংসুযেৰা’’তি ৰত্ৰা অতীতং আহরি।
Koyaṃ bindussaro vaggūti idaṃ satthā veḷuvane viharanto devadattakokālike ārabbha kathesi. Tadā hi devadatte parihīnalābhasakkāre kokāliko kulāni upasaṅkamitvā ‘‘devadattatthero nāma mahāsammatapaveṇiyā okkākarājavaṃse jāto asambhinnakhattiyavaṃse vaḍḍhito tipiṭakadharo jhānalābhī madhurakatho dhammakathiko, detha karotha therassā’’ti devadattassa vaṇṇaṃ bhāsati. Devadattopi ‘‘kokāliko udiccabrāhmaṇakulā nikkhamitvā pabbajito bahussuto dhammakathiko, detha karotha kokālikassā’’ti kokālikassa vaṇṇaṃ bhāsati. Iti te aññamaññassa vaṇṇaṃ bhāsitvā kulagharesu bhuñjantā vicaranti. Athekadivasaṃ dhammasabhāyaṃ bhikkhū kathaṃ samuṭṭhāpesuṃ – ‘‘āvuso devadattakokālikā, aññamaññassa abhūtaguṇakathaṃ kathetvā bhuñjantā vicarantī’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva te aññamaññassa abhūtaguṇakathaṃ kathetvā bhuñjanti, pubbepevaṃ bhuñjiṃsuyevā’’ti vatvā atītaṃ āhari.
অতীতে বারাণসিযং ব্রহ্মদত্তে রজ্জং কারেন্তে বোধিসত্তো অঞ্ঞতরস্মিং জম্বুৰনসণ্ডে রুক্খদেৰতা হুত্ৰা নিব্বত্তি। তত্রেকো কাকো জম্বুসাখায নিসিন্নো জম্বুপক্কানি খাদতি। অথেকো সিঙ্গালো আগন্ত্ৰা উদ্ধং ওলোকেন্তো কাকং দিস্ৰা ‘‘যংনূনাহং ইমস্স অভূতগুণকথং কথেত্ৰা জম্বূনি খাদেয্য’’ন্তি তস্স ৰণ্ণং কথেন্তো ইমং গাথমাহ –
Atīte bārāṇasiyaṃ brahmadatte rajjaṃ kārente bodhisatto aññatarasmiṃ jambuvanasaṇḍe rukkhadevatā hutvā nibbatti. Tatreko kāko jambusākhāya nisinno jambupakkāni khādati. Atheko siṅgālo āgantvā uddhaṃ olokento kākaṃ disvā ‘‘yaṃnūnāhaṃ imassa abhūtaguṇakathaṃ kathetvā jambūni khādeyya’’nti tassa vaṇṇaṃ kathento imaṃ gāthamāha –
১৩০.
130.
‘‘কোযং বিন্দুস্সরো ৰগ্গু, সরৰন্তানমুত্তমো।
‘‘Koyaṃ bindussaro vaggu, saravantānamuttamo;
অচ্চুতো জম্বুসাখায, মোরচ্ছাপোৰ কূজতী’’তি॥
Accuto jambusākhāya, moracchāpova kūjatī’’ti.
তত্থ বিন্দুস্সরোতি বিন্দুনা অৰিসারেন পিণ্ডিতেন সরেন সমন্নাগতো। ৰগ্গূতি মধুরসদ্দো। অচ্চুতোতি ন চুতো সন্নিসিন্নো। মোরচ্ছাপোৰ কূজতীতি তরুণমোরোৰ মনাপেন সদ্দেন ‘‘কো নামেসো কূজতী’’তি ৰদতি।
Tattha bindussaroti bindunā avisārena piṇḍitena sarena samannāgato. Vaggūti madhurasaddo. Accutoti na cuto sannisinno. Moracchāpova kūjatīti taruṇamorova manāpena saddena ‘‘ko nāmeso kūjatī’’ti vadati.
অথ নং কাকো পটিপসংসন্তো দুতিযং গাথমাহ –
Atha naṃ kāko paṭipasaṃsanto dutiyaṃ gāthamāha –
১৩১.
131.
‘‘কুলপুত্তোৰ জানাতি, কুলপুত্তং পসংসিতুং।
‘‘Kulaputtova jānāti, kulaputtaṃ pasaṃsituṃ;
ব্যগ্ঘচ্ছাপসরীৰণ্ণ, ভুঞ্জ সম্ম দদামি তে’’তি॥
Byagghacchāpasarīvaṇṇa, bhuñja samma dadāmi te’’ti.
তত্থ ব্যগ্ঘচ্ছাপসরীৰণ্ণাতি ত্ৰং অম্হাকং ব্যগ্ঘপোতকসমানৰণ্ণোৰ খাযসি, তেন তং ৰদামি অম্ভো ব্যগ্ঘচ্ছাপসরীৰণ্ণ। ভুঞ্জ, সম্ম, দদামি তেতি ৰযস্স যাৰদত্থং জম্বুপক্কানি খাদ, অহং তে দদামীতি।
Tattha byagghacchāpasarīvaṇṇāti tvaṃ amhākaṃ byagghapotakasamānavaṇṇova khāyasi, tena taṃ vadāmi ambho byagghacchāpasarīvaṇṇa. Bhuñja, samma, dadāmi teti vayassa yāvadatthaṃ jambupakkāni khāda, ahaṃ te dadāmīti.
এৰঞ্চ পন ৰত্ৰা জম্বুসাখং চালেত্ৰা ফলানি পাতেসি। অথ তস্মিং জম্বুরুক্খে অধিৰত্থা দেৰতা তে উভোপি অভূতগুণকথং কথেত্ৰা জম্বূনি খাদন্তে দিস্ৰা ততিযং গাথমাহ –
Evañca pana vatvā jambusākhaṃ cāletvā phalāni pātesi. Atha tasmiṃ jamburukkhe adhivatthā devatā te ubhopi abhūtaguṇakathaṃ kathetvā jambūni khādante disvā tatiyaṃ gāthamāha –
১৩২.
132.
‘‘চিরস্সং ৰত পস্সামি, মুসাৰাদী সমাগতে।
‘‘Cirassaṃ vata passāmi, musāvādī samāgate;
ৰন্তাদং কুণপাদঞ্চ, অঞ্ঞমঞ্ঞং পসংসকে’’তি॥
Vantādaṃ kuṇapādañca, aññamaññaṃ pasaṃsake’’ti.
তত্থ ৰন্তাদন্তি পরেসং ৰন্তভত্তখাদকং কাকং। কুণপাদঞ্চাতি কুণপখাদকং সিঙ্গালঞ্চ।
Tattha vantādanti paresaṃ vantabhattakhādakaṃ kākaṃ. Kuṇapādañcāti kuṇapakhādakaṃ siṅgālañca.
ইমঞ্চ পন গাথং ৰত্ৰা সা দেৰতা ভেরৰরূপারম্মণং দস্সেত্ৰা তে ততো পলাপেসি।
Imañca pana gāthaṃ vatvā sā devatā bheravarūpārammaṇaṃ dassetvā te tato palāpesi.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা সিঙ্গালো দেৰদত্তো অহোসি, কাকো কোকালিকো, রুক্খদেৰতা পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā siṅgālo devadatto ahosi, kāko kokāliko, rukkhadevatā pana ahameva ahosi’’nti.
জম্বুখাদকজাতকৰণ্ণনা চতুত্থা।
Jambukhādakajātakavaṇṇanā catutthā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ২৯৪. জম্বুখাদকজাতকং • 294. Jambukhādakajātakaṃ
