| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൭. ഇസ്സരിയസുത്തവണ്ണനാ
7. Issariyasuttavaṇṇanā
൭൭. സത്ഥസ്സ മലന്തി സത്ഥമലം, യേന സത്ഥം മലീനം ഹോതി, സത്ഥമലഗ്ഗഹണേന ചേത്ഥ മലീനം സത്ഥമേവ ഗഹിതന്തി ആഹ ‘‘മലഗ്ഗഹിതസത്ഥ’’ന്തി. ആണാപവത്തനന്തി അപ്പകേ വാ മഹന്തേ വാ യത്ഥ കത്ഥചി അത്തനോ ആണായ പവത്തനവസേന വസനം ഇസ്സരിയത്തമിച്ഛന്തി. മണിരതനമ്പി വിസ്സജ്ജനീയപക്ഖികത്താ ഉത്തമം ഭണ്ഡം നാമ ന ഹോതി, ഇത്ഥീ പന പരിച്ചത്തകുലാചാരിത്ഥികായപി അനിസ്സജ്ജനീയതായ ഉത്തമഭണ്ഡം നാമ. തേനാഹ ‘‘ഇത്ഥീ ഭണ്ഡാനമുത്തമ’’ന്തി. തേസം തേസഞ്ഹി പുരിസാജാനീയാനം ഉപ്പത്തിട്ഠാനതായ ഉത്തമരതനാകരത്താ ഇത്ഥീ ഭണ്ഡാനമുത്തമം. മലഗ്ഗഹിതസത്ഥസദിസോ അവബോധകിച്ചവിബന്ധനതോ. സത്ഥമലം വിയ സത്ഥസ്സ പഞ്ഞാസത്ഥസ്സ ഗുണാഭാവകരണതോ പഞ്ഞാസത്ഥമലം . അബ്ബു വുച്ചതി ഉപദ്ദവം, തം ദേതീതി അബ്ബുദം, വിനാസകാരണം. നനു ഹരണം സമണസ്സ അയുത്തന്തി? യുത്തം. തസ്സ അന്വയതോ ബ്യതിരേകതോ ച യുത്തതം ദസ്സേന്തോ ‘‘സലാകഭത്താദീനീ’’തിആദിമാഹ.
77. Satthassa malanti satthamalaṃ, yena satthaṃ malīnaṃ hoti, satthamalaggahaṇena cettha malīnaṃ satthameva gahitanti āha ‘‘malaggahitasattha’’nti. Āṇāpavattananti appake vā mahante vā yattha katthaci attano āṇāya pavattanavasena vasanaṃ issariyattamicchanti. Maṇiratanampi vissajjanīyapakkhikattā uttamaṃ bhaṇḍaṃ nāma na hoti, itthī pana pariccattakulācāritthikāyapi anissajjanīyatāya uttamabhaṇḍaṃ nāma. Tenāha ‘‘itthī bhaṇḍānamuttama’’nti. Tesaṃ tesañhi purisājānīyānaṃ uppattiṭṭhānatāya uttamaratanākarattā itthī bhaṇḍānamuttamaṃ. Malaggahitasatthasadiso avabodhakiccavibandhanato. Satthamalaṃ viya satthassa paññāsatthassa guṇābhāvakaraṇato paññāsatthamalaṃ. Abbu vuccati upaddavaṃ, taṃ detīti abbudaṃ, vināsakāraṇaṃ. Nanu haraṇaṃ samaṇassa ayuttanti? Yuttaṃ. Tassa anvayato byatirekato ca yuttataṃ dassento ‘‘salākabhattādīnī’’tiādimāha.
ഇസ്സരിയസുത്തവണ്ണനാ നിട്ഠിതാ.
Issariyasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൭. ഇസ്സരിയസുത്തം • 7. Issariyasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൭. ഇസ്സരിയസുത്തവണ്ണനാ • 7. Issariyasuttavaṇṇanā
