| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൭. ഇസ്സരിയസുത്തവണ്ണനാ
7. Issariyasuttavaṇṇanā
൭൭. സത്തമേ സത്ഥമലന്തി മലഗ്ഗഹിതസത്ഥം. കിം സു ഹരന്തം വാരേന്തീതി കം ഹരന്തം നിസേധേന്തി. വസോതി ആണാപവത്തനം. ഇത്ഥീതി അവിസ്സജ്ജനീയഭണ്ഡത്താ ‘‘ഇത്ഥീ ഭണ്ഡാനമുത്തമം, വരഭണ്ഡ’’ന്തി ആഹ. അഥ വാ സബ്ബേപി ബോധിസത്താ ച ചക്കവത്തിനോ ച മാതുകുച്ഛിയംയേവ നിബ്ബത്തന്തീതി ‘‘ഇത്ഥീ ഭണ്ഡാനമുത്തമ’’ന്തി ആഹ. കോധോ സത്ഥമലന്തി കോധോ മലഗ്ഗഹിതസത്ഥസദിസോ, പഞ്ഞാസത്ഥസ്സ വാ മലന്തി സത്ഥമലം. അബ്ബുദന്തി വിനാസകാരണം, ചോരാ ലോകസ്മിം വിനാസകാതി അത്ഥോ. ഹരന്തോതി സലാകഭത്താദീനി ഗഹേത്വാ ഗച്ഛന്തോ. സലാകഭത്താദീനി ഹി പട്ഠപിതകാലേയേവ മനുസ്സേഹി പരിച്ചത്താനി. തേസം താനി ഹരന്തോ സമണോ പിയോ ഹോതി, അനാഹരന്തേ പുഞ്ഞഹാനിം നിസ്സായ വിപ്പടിസാരിനോ ഹോന്തി. സത്തമം.
77. Sattame satthamalanti malaggahitasatthaṃ. Kiṃ su harantaṃ vārentīti kaṃ harantaṃ nisedhenti. Vasoti āṇāpavattanaṃ. Itthīti avissajjanīyabhaṇḍattā ‘‘itthī bhaṇḍānamuttamaṃ, varabhaṇḍa’’nti āha. Atha vā sabbepi bodhisattā ca cakkavattino ca mātukucchiyaṃyeva nibbattantīti ‘‘itthī bhaṇḍānamuttama’’nti āha. Kodho satthamalanti kodho malaggahitasatthasadiso, paññāsatthassa vā malanti satthamalaṃ. Abbudanti vināsakāraṇaṃ, corā lokasmiṃ vināsakāti attho. Harantoti salākabhattādīni gahetvā gacchanto. Salākabhattādīni hi paṭṭhapitakāleyeva manussehi pariccattāni. Tesaṃ tāni haranto samaṇo piyo hoti, anāharante puññahāniṃ nissāya vippaṭisārino honti. Sattamaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൭. ഇസ്സരിയസുത്തം • 7. Issariyasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൭. ഇസ്സരിയസുത്തവണ്ണനാ • 7. Issariyasuttavaṇṇanā
