| Library / Tipiṭaka / තිපිටක • Tipiṭaka / ඉතිවුත්තකපාළි • Itivuttakapāḷi |
3. ඉන්ද්රියසුත්තං
3. Indriyasuttaṃ
62. වුත්තඤ්හෙතං භගවතා, වුත්තමරහතාති මෙ සුතං –
62. Vuttañhetaṃ bhagavatā, vuttamarahatāti me sutaṃ –
‘‘තීණිමානි, භික්ඛවෙ, ඉන්ද්රියානි. කතමානි තීණි? අනඤ්ඤාතඤ්ඤස්සාමීතින්ද්රියං, අඤ්ඤින්ද්රියං, අඤ්ඤාතාවින්ද්රියං – ඉමානි ඛො, භික්ඛවෙ, තීණි ඉන්ද්රියානී’’ති. එතමත්ථං භගවා අවොච. තත්ථෙතං ඉති වුච්චති –
‘‘Tīṇimāni, bhikkhave, indriyāni. Katamāni tīṇi? Anaññātaññassāmītindriyaṃ, aññindriyaṃ, aññātāvindriyaṃ – imāni kho, bhikkhave, tīṇi indriyānī’’ti. Etamatthaṃ bhagavā avoca. Tatthetaṃ iti vuccati –
‘‘සෙඛස්ස සික්ඛමානස්ස, උජුමග්ගානුසාරිනො;
‘‘Sekhassa sikkhamānassa, ujumaggānusārino;
ඛයස්මිං පඨමං ඤාණං, තතො අඤ්ඤා අනන්තරා.
Khayasmiṃ paṭhamaṃ ñāṇaṃ, tato aññā anantarā.
‘‘තතො අඤ්ඤා විමුත්තස්ස, ඤාණං වෙ හොති තාදිනො;
‘‘Tato aññā vimuttassa, ñāṇaṃ ve hoti tādino;
අකුප්පා මෙ විමුත්තීති, භවසංයොජනක්ඛයා.
Akuppā me vimuttīti, bhavasaṃyojanakkhayā.
‘‘ස වෙ 1 ඉන්ද්රියසම්පන්නො, සන්තො සන්තිපදෙ රතො;
‘‘Sa ve 2 indriyasampanno, santo santipade rato;
ධාරෙති අන්තිමං දෙහං, ජෙත්වා මාරං සවාහිනි’’න්ති.
Dhāreti antimaṃ dehaṃ, jetvā māraṃ savāhini’’nti.
අයම්පි අත්ථො වුත්තො භගවතා, ඉති මෙ සුතන්ති. තතියං.
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ඉතිවුත්තක-අට්ඨකථා • Itivuttaka-aṭṭhakathā / 3. ඉන්ද්රියසුත්තවණ්ණනා • 3. Indriyasuttavaṇṇanā
