| Library / Tipiṭaka / តិបិដក • Tipiṭaka / មហាវិភង្គ-អដ្ឋកថា • Mahāvibhaṅga-aṭṭhakathā |
៣. ហសធម្មសិក្ខាបទវណ្ណនា
3. Hasadhammasikkhāpadavaṇṇanā
៣៣៥. តតិយេ – អប្បកតញ្ញុនោតិ យំ ភគវតា បកតំ បញ្ញត្តំ, តំ ន ជានន្តីតិ អត្ថោ។
335. Tatiye – appakataññunoti yaṃ bhagavatā pakataṃ paññattaṃ, taṃ na jānantīti attho.
៣៣៦. ឧទកេ ហសធម្មេតិ ឧទកកីឡិកា វុច្ចតិ។ ឧបរិគោប្ផកេតិ គោប្ផកានំ ឧបរិភាគប្បមាណេ។ ហសាធិប្បាយោតិ កីឡាធិប្បាយោ។ និមុជ្ជតិ វាតិអាទីសុ និមុជ្ជនត្ថាយ ឱរោហន្តស្ស បទវារេ បទវារេ ទុក្កដំ។ និមុជ្ជនុម្មុជ្ជនេសុ បយោគេ បយោគេ បាចិត្តិយំ។ និមុជ្ជិត្វា អន្តោឧទកេយេវ គច្ឆន្តស្ស ហត្ថវារបទវារេសុ សព្ពត្ថ បាចិត្តិយំ។ បលវតីតិ តរតិ។ ហត្ថេហិ តរន្តស្ស ហត្ថវារេ ហត្ថវារេ បាចិត្តិយំ។ បាទេសុបិ ឯសេវ នយោ។ យេន យេន អង្គេន តរតិ, តស្ស តស្ស បយោគេ បយោគេ បាចិត្តិយំ។ តីរតោ វា រុក្ខតោ វា ឧទកេ បតតិ, បាចិត្តិយមេវ។ នាវាយ កីឡតីតិ ផិយារិត្តាទីហិ នាវំ បាជេន្តោ វា តីរេ ឧស្សារេន្តោ វា នាវាយ កីឡតិ, ទុក្កដំ។
336.Udake hasadhammeti udakakīḷikā vuccati. Uparigopphaketi gopphakānaṃ uparibhāgappamāṇe. Hasādhippāyoti kīḷādhippāyo. Nimujjati vātiādīsu nimujjanatthāya orohantassa padavāre padavāre dukkaṭaṃ. Nimujjanummujjanesu payoge payoge pācittiyaṃ. Nimujjitvā antoudakeyeva gacchantassa hatthavārapadavāresu sabbattha pācittiyaṃ. Palavatīti tarati. Hatthehi tarantassa hatthavāre hatthavāre pācittiyaṃ. Pādesupi eseva nayo. Yena yena aṅgena tarati, tassa tassa payoge payoge pācittiyaṃ. Tīrato vā rukkhato vā udake patati, pācittiyameva. Nāvāya kīḷatīti phiyārittādīhi nāvaṃ pājento vā tīre ussārento vā nāvāya kīḷati, dukkaṭaṃ.
ហត្ថេន វាតិអាទីសុបិ បយោគេ បយោគេ ទុក្កដំ។ កេចិ ហត្ថេន ឧទកេ ខិត្តាយ កថលាយ បតនុប្បតនវារេសុ ទុក្កដំ វទន្តិ, តំ ន គហេតព្ពំ។ តត្ថ ហិ ឯកបយោគត្តា ឯកមេវ ទុក្កដំ, អបិច ឧបរិគោប្ផកេ វុត្តានិ ឧម្មុជ្ជនាទីនិ ឋបេត្វា អញ្ញេន យេន កេនចិ អាការេន ឧទកំ ឱតរិត្វា វា អនោតរិត្វា វា យត្ថ កត្ថចិ ឋិតំ ឧទកំ អន្តមសោ ពិន្ទុំ គហេត្វា ខិបនកីឡាយបិ កីឡន្តស្ស ទុក្កដមេវ, អត្ថជោតកំ បន អក្ខរំ លិខិតុំ វដ្ដតិ, អយមេត្ថ វិនិច្ឆយោ។ សេសមេត្ថ ឧត្តានមេវ។
Hatthena vātiādīsupi payoge payoge dukkaṭaṃ. Keci hatthena udake khittāya kathalāya patanuppatanavāresu dukkaṭaṃ vadanti, taṃ na gahetabbaṃ. Tattha hi ekapayogattā ekameva dukkaṭaṃ, apica uparigopphake vuttāni ummujjanādīni ṭhapetvā aññena yena kenaci ākārena udakaṃ otaritvā vā anotaritvā vā yattha katthaci ṭhitaṃ udakaṃ antamaso binduṃ gahetvā khipanakīḷāyapi kīḷantassa dukkaṭameva, atthajotakaṃ pana akkharaṃ likhituṃ vaṭṭati, ayamettha vinicchayo. Sesamettha uttānameva.
បឋមបារាជិកសមុដ្ឋានំ – កិរិយំ, សញ្ញាវិមោក្ខំ, សចិត្តកំ, លោកវជ្ជំ, កាយកម្មំ, អកុសលចិត្តំ, តិវេទនន្តិ។
Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, tivedananti.
ហសធម្មសិក្ខាបទំ តតិយំ។
Hasadhammasikkhāpadaṃ tatiyaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុរាបានវគ្គោ • 6. Surāpānavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៣. ហសធម្មសិក្ខាបទវណ្ណនា • 3. Hasadhammasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៣. ហសធម្មសិក្ខាបទវណ្ណនា • 3. Hasadhammasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៣. ហសធម្មសិក្ខាបទំ • 3. Hasadhammasikkhāpadaṃ
