| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
ហរណកកថាវណ្ណនា
Haraṇakakathāvaṇṇanā
១១១. ហរណកកថាយំ ហរណកន្តិ ហរិយមានំ។ អភិមុខំ កត្វា កឌ្ឍនំ អាកឌ្ឍនំ, សេសទិសាកឌ្ឍនំ វិកឌ្ឍនំ។ បាទំ អគ្ឃតិ, បារាជិកមេវាតិ ឯត្ថ អន្តំ ន គណ្ហាមីតិ អសល្លក្ខិតត្តា អន្តស្ស ច គណ្ហិស្សាមីតិ សល្លក្ខិតស្សេវ បដស្ស ឯកទេសត្តា បារាជិកំ វុត្តំ។ សហភណ្ឌហារកន្តិ ភណ្ឌហារកេន សទ្ធិំ។ សន្តជ្ជេត្វាតិ ធនុអាទីហិ សន្តជ្ជេត្វា។
111. Haraṇakakathāyaṃ haraṇakanti hariyamānaṃ. Abhimukhaṃ katvā kaḍḍhanaṃ ākaḍḍhanaṃ, sesadisākaḍḍhanaṃ vikaḍḍhanaṃ. Pādaṃ agghati, pārājikamevāti ettha antaṃ na gaṇhāmīti asallakkhitattā antassa ca gaṇhissāmīti sallakkhitasseva paṭassa ekadesattā pārājikaṃ vuttaṃ. Sahabhaṇḍahārakanti bhaṇḍahārakena saddhiṃ. Santajjetvāti dhanuādīhi santajjetvā.
សោតិ ភណ្ឌហារកោ។ អនជ្ឈាវុត្ថកន្តិ អបរិគ្គហិតកំ, អសាមិកន្តិ អត្ថោ។
Soti bhaṇḍahārako. Anajjhāvutthakanti apariggahitakaṃ, asāmikanti attho.
អាហរាបេន្តេ ទាតព្ពន្តិ ឯត្ថ ‘‘ឆឌ្ឌេត្វា ធុរំ និក្ខិបិត្វា គតានម្បិ និរាលយានំ បុន អាហរាបនស្ស វុត្តត្តា ភិក្ខូនម្បិ អត្តនោ សន្តកេ បរិក្ខារេ អច្ឆិន្ទិត្វា បរេហិ គហិតេ តត្ថ ធុរនិក្ខេបំ កត្វាបិ បុន តំ ពលក្ការេនបិ អាហរាបេតុំ វដ្ដតី’’តិ ទេសវាសិនោ អាចរិយា វទន្តិ, សីហឡទីបវាសិនោ បន តំ កេចិ អាចរិយា ន ឥច្ឆន្តិ។ តេនេវ មហាគណ្ឋិបទេ មជ្ឈិមគណ្ឋិបទេ ច វុត្តំ ‘‘អម្ហាកំ បន តំ ន រុច្ចតី’’តិ។ អញ្ញេសូតិ មហាបច្ចរិអាទីសុ។ វិចារណា ឯវ នត្ថីតិ តត្ថាបិ បដិក្ខេបាភាវតោ អយមេវត្ថោតិ វុត្តំ ហោតិ។
Āharāpente dātabbanti ettha ‘‘chaḍḍetvā dhuraṃ nikkhipitvā gatānampi nirālayānaṃ puna āharāpanassa vuttattā bhikkhūnampi attano santake parikkhāre acchinditvā parehi gahite tattha dhuranikkhepaṃ katvāpi puna taṃ balakkārenapi āharāpetuṃ vaṭṭatī’’ti desavāsino ācariyā vadanti, sīhaḷadīpavāsino pana taṃ keci ācariyā na icchanti. Teneva mahāgaṇṭhipade majjhimagaṇṭhipade ca vuttaṃ ‘‘amhākaṃ pana taṃ na ruccatī’’ti. Aññesūti mahāpaccariādīsu. Vicāraṇā eva natthīti tatthāpi paṭikkhepābhāvato ayamevatthoti vuttaṃ hoti.
ហរណកកថាវណ្ណនា និដ្ឋិតា។
Haraṇakakathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ២. ទុតិយបារាជិកំ • 2. Dutiyapārājikaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ២. ទុតិយបារាជិកំ • 2. Dutiyapārājikaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ភូមដ្ឋកថាទិវណ្ណនា • Bhūmaṭṭhakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ហរណកកថាវណ្ណនា • Haraṇakakathāvaṇṇanā
