| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
១៦៣. គុឡាទិអនុជាននា
163. Guḷādianujānanā
២៧២. អថ ខោ ភគវា សាវត្ថិយំ យថាភិរន្តំ វិហរិត្វា យេន រាជគហំ តេន ចារិកំ បក្កាមិ។ អទ្ទសា ខោ អាយស្មា កង្ខារេវតោ អន្តរាមគ្គេ គុឡករណំ, ឱក្កមិត្វា គុឡេ បិដ្ឋម្បិ ឆារិកម្បិ បក្ខិបន្តេ, ទិស្វាន ‘‘អកប្បិយោ គុឡោ សាមិសោ, ន កប្បតិ គុឡោ វិកាលេ បរិភុញ្ជិតុ’’ន្តិ កុក្កុច្ចាយន្តោ សបរិសោ គុឡំ ន បរិភុញ្ជតិ។ យេបិស្ស សោតព្ពំ មញ្ញន្តិ, តេបិ គុឡំ ន បរិភុញ្ជន្តិ។ ភគវតោ ឯតមត្ថំ អារោចេសុំ។ កិមត្ថាយ 1, ភិក្ខវេ, គុឡេ បិដ្ឋម្បិ ឆារិកម្បិ បក្ខិបន្តីតិ? ថទ្ធត្ថាយ 2 ភគវាតិ។ សចេ, ភិក្ខវេ, ថទ្ធត្ថាយ គុឡេ បិដ្ឋម្បិ ឆារិកម្បិ បក្ខិបន្តិ, សោ ច គុឡោត្វេវ សង្ខំ គច្ឆតិ។ អនុជានាមិ, ភិក្ខវេ, យថាសុខំ គុឡំ បរិភុញ្ជិតុន្តិ។
272. Atha kho bhagavā sāvatthiyaṃ yathābhirantaṃ viharitvā yena rājagahaṃ tena cārikaṃ pakkāmi. Addasā kho āyasmā kaṅkhārevato antarāmagge guḷakaraṇaṃ, okkamitvā guḷe piṭṭhampi chārikampi pakkhipante, disvāna ‘‘akappiyo guḷo sāmiso, na kappati guḷo vikāle paribhuñjitu’’nti kukkuccāyanto sapariso guḷaṃ na paribhuñjati. Yepissa sotabbaṃ maññanti, tepi guḷaṃ na paribhuñjanti. Bhagavato etamatthaṃ ārocesuṃ. Kimatthāya 3, bhikkhave, guḷe piṭṭhampi chārikampi pakkhipantīti? Thaddhatthāya 4 bhagavāti. Sace, bhikkhave, thaddhatthāya guḷe piṭṭhampi chārikampi pakkhipanti, so ca guḷotveva saṅkhaṃ gacchati. Anujānāmi, bhikkhave, yathāsukhaṃ guḷaṃ paribhuñjitunti.
អទ្ទសា ខោ អាយស្មា កង្ខារេវតោ អន្តរាមគ្គេ វច្ចេ មុគ្គំ ជាតំ, បស្សិត្វា ‘‘អកប្បិយា មុគ្គា; បក្កាបិ មុគ្គា ជាយន្តីតិ’’ កុក្កុច្ចាយន្តោ សបរិសោ មុគ្គំ ន បរិភុញ្ជតិ។ យេបិស្ស សោតព្ពំ មញ្ញន្តិ, តេបិ មុគ្គំ ន បរិភុញ្ជន្តិ។ ភគវតោ ឯតមត្ថំ អារោចេសុំ។ សចេ 5, ភិក្ខវេ, បក្កាបិ មុគ្គា ជាយន្តិ , អនុជានាមិ, ភិក្ខវេ, យថាសុខំ មុគ្គំ បរិភុញ្ជិតុន្តិ។
Addasā kho āyasmā kaṅkhārevato antarāmagge vacce muggaṃ jātaṃ, passitvā ‘‘akappiyā muggā; pakkāpi muggā jāyantīti’’ kukkuccāyanto sapariso muggaṃ na paribhuñjati. Yepissa sotabbaṃ maññanti, tepi muggaṃ na paribhuñjanti. Bhagavato etamatthaṃ ārocesuṃ. Sace 6, bhikkhave, pakkāpi muggā jāyanti , anujānāmi, bhikkhave, yathāsukhaṃ muggaṃ paribhuñjitunti.
២៧៣. តេន ខោ បន សមយេន អញ្ញតរស្ស ភិក្ខុនោ ឧទរវាតាពាធោ ហោតិ។ សោ លោណសោវីរកំ អបាយិ។ តស្ស សោ ឧទរវាតាពាធោ បដិប្បស្សម្ភិ។ ភគវតោ ឯតមត្ថំ អារោចេសុំ ។ អនុជានាមិ, ភិក្ខវេ, គិលានស្ស លោណសោវីរកំ; អគិលានស្ស ឧទកសម្ភិន្នំ បានបរិភោគេន បរិភុញ្ជិតុន្តិ។
273. Tena kho pana samayena aññatarassa bhikkhuno udaravātābādho hoti. So loṇasovīrakaṃ apāyi. Tassa so udaravātābādho paṭippassambhi. Bhagavato etamatthaṃ ārocesuṃ . Anujānāmi, bhikkhave, gilānassa loṇasovīrakaṃ; agilānassa udakasambhinnaṃ pānaparibhogena paribhuñjitunti.
គុឡាទិអនុជាននា និដ្ឋិតា។
Guḷādianujānanā niṭṭhitā.
Footnotes:
Related texts:
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / គុឡាទិអនុជាននកថា • Guḷādianujānanakathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / គុឡាទិអនុជាននកថាវណ្ណនា • Guḷādianujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / គុឡាទិអនុជាននកថាវណ្ណនា • Guḷādianujānanakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១៦៣. គុឡាទិអនុជាននកថា • 163. Guḷādianujānanakathā
