| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៥. គន្ធមាលិយត្ថេរអបទានំ
5. Gandhamāliyattheraapadānaṃ
២៤.
24.
‘‘សិទ្ធត្ថស្ស ភគវតោ, គន្ធថូបំ អកាសហំ;
‘‘Siddhatthassa bhagavato, gandhathūpaṃ akāsahaṃ;
សុមនេហិ បដិច្ឆន្នំ, ពុទ្ធានុច្ឆវិកំ កតំ។
Sumanehi paṭicchannaṃ, buddhānucchavikaṃ kataṃ.
២៥.
25.
‘‘កញ្ចនគ្ឃិយសង្កាសំ, ពុទ្ធំ លោកគ្គនាយកំ;
‘‘Kañcanagghiyasaṅkāsaṃ, buddhaṃ lokagganāyakaṃ;
ឥន្ទីវរំវ ជលិតំ, អាទិត្តំវ ហុតាសនំ។
Indīvaraṃva jalitaṃ, ādittaṃva hutāsanaṃ.
២៦.
26.
‘‘ព្យគ្ឃូសភំវ បវរំ, អភិជាតំវ កេសរិំ;
‘‘Byagghūsabhaṃva pavaraṃ, abhijātaṃva kesariṃ;
និសិន្នំ សមណានគ្គំ, ភិក្ខុសង្ឃបុរក្ខតំ។
Nisinnaṃ samaṇānaggaṃ, bhikkhusaṅghapurakkhataṃ.
២៧.
27.
‘‘វន្ទិត្វា សត្ថុនោ បាទេ, បក្កាមិំ ឧត្តរាមុខោ;
‘‘Vanditvā satthuno pāde, pakkāmiṃ uttarāmukho;
ចតុន្នវុតិតោ កប្បេ, គន្ធមាលំ យតោ អទំ។
Catunnavutito kappe, gandhamālaṃ yato adaṃ.
២៨.
28.
‘‘ពុទ្ធេ កតស្ស ការស្ស, ផលេនាហំ វិសេសតោ;
‘‘Buddhe katassa kārassa, phalenāhaṃ visesato;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
២៩.
29.
‘‘ចត្តារីសម្ហិ ឯកូនេ, កប្បេ អាសិំសុ សោឡស;
‘‘Cattārīsamhi ekūne, kappe āsiṃsu soḷasa;
ទេវគន្ធសនាមា តេ, រាជានោ ចក្កវត្តិនោ។
Devagandhasanāmā te, rājāno cakkavattino.
៣០.
30.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា គន្ធមាលិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā gandhamāliyo thero imā gāthāyo abhāsitthāti.
គន្ធមាលិយត្ថេរស្សាបទានំ បញ្ចមំ។
Gandhamāliyattherassāpadānaṃ pañcamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៥. គន្ធមាលិយត្ថេរអបទានវណ្ណនា • 5. Gandhamāliyattheraapadānavaṇṇanā
