| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៦. ទុតិយរំសិសញ្ញកត្ថេរអបទានវណ្ណនា
6. Dutiyaraṃsisaññakattheraapadānavaṇṇanā
បព្ពតេ ហិមវន្តម្ហីតិអាទិកំ អាយស្មតោ ទុតិយរំសិសញ្ញកត្ថេរស្ស អបទានំ។ អយម្បិ បុរិមពុទ្ធេសុ កតកុសលោ ឧប្បន្នុប្បន្នភវេ វិវដ្ដូបនិស្សយានិ បុញ្ញានិ ឧបចិនន្តោ ផុស្សស្ស ភគវតោ កាលេ កុលគេហេ និព្ពត្តោ វុទ្ធិប្បត្តោ ឃរាវាសំ សណ្ឋបេត្វា តត្ថ ទោសំ ទិស្វា តំ បហាយ តាបសបព្ពជ្ជំ បព្ពជិត្វា ហិមវន្តបព្ពតេ វសន្តោ វាកចីរនិវសនោ វិវេកសុខេន វិហរតិ។ តស្មិំ សមយេ សោ ផុស្សំ ភគវន្តំ តំ បទេសំ សម្បត្តំ ទិស្វា តស្ស សរីរតោ និក្ខន្តឆព្ពណ្ណពុទ្ធរំសិយោ ឥតោ ចិតោ វិធាវន្តិយោ ទណ្ឌទីបិកានិក្ខន្តវិប្ផុរន្តមិវ ទិស្វា តស្មិំ បសន្នោ អញ្ជលិំ បគ្គហេត្វា វន្ទិត្វា ចិត្តំ បសាទេត្វា តេនេវ បីតិសោមនស្សេន កាលំ កត្វា តុសិតាទីសុ និព្ពត្តោ តត្ថ ឆ កាមាវចរសម្បត្តិយោ ច អនុភវិត្វា អបរភាគេ មនុស្សសម្បត្តិយោ ច អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិប្បត្តោ បុព្ពវាសនាវសេន បព្ពជិត្វា នចិរស្សេវ អរហា អហោសិ។
Pabbatehimavantamhītiādikaṃ āyasmato dutiyaraṃsisaññakattherassa apadānaṃ. Ayampi purimabuddhesu katakusalo uppannuppannabhave vivaṭṭūpanissayāni puññāni upacinanto phussassa bhagavato kāle kulagehe nibbatto vuddhippatto gharāvāsaṃ saṇṭhapetvā tattha dosaṃ disvā taṃ pahāya tāpasapabbajjaṃ pabbajitvā himavantapabbate vasanto vākacīranivasano vivekasukhena viharati. Tasmiṃ samaye so phussaṃ bhagavantaṃ taṃ padesaṃ sampattaṃ disvā tassa sarīrato nikkhantachabbaṇṇabuddharaṃsiyo ito cito vidhāvantiyo daṇḍadīpikānikkhantavipphurantamiva disvā tasmiṃ pasanno añjaliṃ paggahetvā vanditvā cittaṃ pasādetvā teneva pītisomanassena kālaṃ katvā tusitādīsu nibbatto tattha cha kāmāvacarasampattiyo ca anubhavitvā aparabhāge manussasampattiyo ca anubhavitvā imasmiṃ buddhuppāde kulagehe nibbatto vuddhippatto pubbavāsanāvasena pabbajitvā nacirasseva arahā ahosi.
៣៥. សោ អបរភាគេ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បព្ពតេ ហិមវន្តម្ហីតិអាទិមាហ។ តំ សព្ពំ ឧត្តានត្ថមេវាតិ។
35. So aparabhāge pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Taṃ sabbaṃ uttānatthamevāti.
ទុតិយរំសិសញ្ញកត្ថេរអបទានវណ្ណនា សមត្តា។
Dutiyaraṃsisaññakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៦. ទុតិយរំសិសញ្ញកត្ថេរអបទានំ • 6. Dutiyaraṃsisaññakattheraapadānaṃ
