| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៨. ទុស្សទាយកត្ថេរអបទានវណ្ណនា
8. Dussadāyakattheraapadānavaṇṇanā
តិវរាយំ បុរេ រម្មេតិអាទិកំ អាយស្មតោ ទុស្សទាយកត្ថេរស្ស អបទានំ។ អយម្បាយស្មា បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិទ្ធត្ថស្ស ភគវតោ កាលេ រាជកុលេ និព្ពត្តោ វុទ្ធិប្បត្តកាលេ យុវរាជភាវំ បត្វា បាកដោ ឯកំ ជនបទំ លភិត្វា តត្រាធិបតិភូតោ សកលជនបទវាសិនោ ទានបិយវចនអត្ថចរិយាសមានត្ថតាសង្ខាតេហិ ចតូហិ សង្គហវត្ថូហិ សង្គណ្ហាតិ។ តស្មិំ សមយេ សិទ្ធត្ថោ ភគវា តំ ជនបទំ សម្បាបុណិ។ អថ សោ យុវរាជា បណ្ណាការំ លភិត្វា តត្ថ សុខុមវត្ថេន ភគវន្តំ បូជេសិ។ ភគវា តំ វត្ថំ ហត្ថេន បរាមសិត្វា អាកាសំ បក្ខន្ទិ។ តម្បិ វត្ថំ ភគវន្តមេវ អនុពន្ធិ។ អថ សោ យុវរាជា តំ អច្ឆរិយំ ទិស្វា អតីវ បសន្នោ អញ្ជលិំ បគ្គយ្ហ អដ្ឋាសិ។ ភគវតោ សម្បត្តសម្បត្តដ្ឋានេ សព្ពេ ជនា តំ អច្ឆរិយំ ទិស្វា អច្ឆរិយព្ភុតចិត្តា អញ្ជលិំ បគ្គយ្ហ អដ្ឋំសុ។ ភគវា វិហារមេវ អគមាសិ។ យុវរាជា តេនេវ កុសលកម្មេន តតោ ចុតោ ទេវលោកេ ឧប្បន្នោ តត្ថ ទិព្ពសម្បត្តិំ អនុភវិត្វា មនុស្សេសុ ចក្កវត្តិអាទិសម្បត្តិយោ អនុភវិត្វា ឥមស្មិំ ពុទ្ធុប្បាទេ វិភវសម្បន្នេ ឯកស្មិំ កុលេ និព្ពត្តោ វិញ្ញុតំ បត្តោ ឃរាវាសំ សណ្ឋបេត្វា រតនត្តយេ បសន្នោ ភគវតោ ធម្មទេសនំ សុត្វា បដិលទ្ធសទ្ធោ បព្ពជិត្វា វាយមន្តោ នចិរស្សេវ អរហា អហោសិ។
Tivarāyaṃpure rammetiādikaṃ āyasmato dussadāyakattherassa apadānaṃ. Ayampāyasmā purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle rājakule nibbatto vuddhippattakāle yuvarājabhāvaṃ patvā pākaṭo ekaṃ janapadaṃ labhitvā tatrādhipatibhūto sakalajanapadavāsino dānapiyavacanaatthacariyāsamānatthatāsaṅkhātehi catūhi saṅgahavatthūhi saṅgaṇhāti. Tasmiṃ samaye siddhattho bhagavā taṃ janapadaṃ sampāpuṇi. Atha so yuvarājā paṇṇākāraṃ labhitvā tattha sukhumavatthena bhagavantaṃ pūjesi. Bhagavā taṃ vatthaṃ hatthena parāmasitvā ākāsaṃ pakkhandi. Tampi vatthaṃ bhagavantameva anubandhi. Atha so yuvarājā taṃ acchariyaṃ disvā atīva pasanno añjaliṃ paggayha aṭṭhāsi. Bhagavato sampattasampattaṭṭhāne sabbe janā taṃ acchariyaṃ disvā acchariyabbhutacittā añjaliṃ paggayha aṭṭhaṃsu. Bhagavā vihārameva agamāsi. Yuvarājā teneva kusalakammena tato cuto devaloke uppanno tattha dibbasampattiṃ anubhavitvā manussesu cakkavattiādisampattiyo anubhavitvā imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā ratanattaye pasanno bhagavato dhammadesanaṃ sutvā paṭiladdhasaddho pabbajitvā vāyamanto nacirasseva arahā ahosi.
៣៨. សោ ឯកទិវសំ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ តិវរាយំ បុរេ រម្មេតិអាទិមាហ។ តត្ថ តិវរនាមកេ នគរេ រមណីយេ អហំ រាជបុត្តោ ហុត្វា សិទ្ធត្ថំ ភគវន្តំ វត្ថេន បូជេសិន្តិ អត្ថោ។ សេសំ សុវិញ្ញេយ្យមេវាតិ។
38. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento tivarāyaṃ pure rammetiādimāha. Tattha tivaranāmake nagare ramaṇīye ahaṃ rājaputto hutvā siddhatthaṃ bhagavantaṃ vatthena pūjesinti attho. Sesaṃ suviññeyyamevāti.
ទុស្សទាយកត្ថេរអបទានវណ្ណនា សមត្តា។
Dussadāyakattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៨. ទុស្សទាយកត្ថេរអបទានំ • 8. Dussadāyakattheraapadānaṃ
