| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៨. ទុព្ពណ្ណករណសិក្ខាបទំ
8. Dubbaṇṇakaraṇasikkhāpadaṃ
៣៦៨. អដ្ឋមេ អលភីតិ លភោតិ វចនត្ថេ អបច្ចយំ កត្វា ណបច្ចយស្ស ស្វត្ថភាវំ ទស្សេតុំ វុត្តំ ‘‘លភោយេវ លាភោ’’តិ។ អបច្ចយមកត្វា បកតិយា ណបច្ចយោបិ យុត្តោយេវាតិ ទដ្ឋព្ពំ។ សទ្ទន្តរោបិ អត្ថន្តរាភាវា សមាសោ ហោតីតិ អាហ ‘‘នវចីវរលាភេនាតិ វត្តព្ពេ’’តិ។ អនុនាសិកលោបន្តិ ‘‘នវ’’ន្តិ ឯត្ថ និគ្គហីតស្ស វិនាសំ។ និគ្គហីតញ្ហិ នាសំ អនុគតត្តា ‘‘អនុនាសិក’’ន្តិ វុច្ចតិ, តស្ស អទស្សន, មកត្វាតិ អត្ថោ។ មជ្ឈេ ឋិតបទទ្វយេតិ ‘‘នវ’’ន្តិ ច ‘‘ចីវរលាភេនា’’តិ ច ទ្វិន្នំ បទានមន្តរេ ‘‘ឋិតេ បនា’’តិ ច ‘‘ភិក្ខុនា’’តិ ច បទទ្វយេ។ និទ្ធារណេ ចេតំ ភុម្មវចនំ។ និបាតោតិ និបាតមត្តំ។ អលភីតិ លភោតិ វចនត្ថស្ស អភិធេយ្យត្ថំ ទស្សេតុំ ‘‘ភិក្ខុនា’’តិ វុត្តន្តិ អាហ ‘‘ភិក្ខុនា’’តិអាទិ។ បទភាជនេ បន វុត្តន្តិ សម្ពន្ធោ។ យន្តិ យំ ចីវរំ។ ‘‘ចីវរ’’ន្តិ ឯត្ថ ចីវរសរូបំ ទស្សេន្តោ អាហ ‘‘យំ និវាសេតុំ វា’’តិអាទិ។ ចម្មការនីលន្តិ ចម្មការានំ តិផលេ បក្ខិត្តស្ស អយគូថស្ស នីលំ។ មហាបច្ចរិយំ វុត្តន្តិ សម្ពន្ធោ។ ទុព្ពណ្ណោ ករីយតិ អនេនាតិ ទុព្ពណ្ណករណំ, កប្បពិន្ទុន្តិ អាហ ‘‘កប្បពិន្ទុំ សន្ធាយា’’តិ។ អាទិយន្តេន ភិក្ខុនា អាទាតព្ពន្តិ សម្ពន្ធោ។ កោណេសូតិ អន្តេសុ។ វាសទ្ទោ អនិយមវិកប្បត្ថោ។ អក្ខិមណ្ឌលមត្តំ វាតិ អក្ខិមណ្ឌលស្ស បមាណំ វា កប្បពិន្ទូតិ សម្ពន្ធោ។ បដ្ដេ វាតិ អនុវាតបដ្ដេ វា។ គណ្ឋិយំ វាតិ គណ្ឋិកបដ្ដេ វា។ បាឡិកប្បោតិ ទ្វេ វា តិស្សោ វា តតោ អធិកា វា ពិន្ទុអាវលី កត្វា កតោ កប្បោ។ កណ្ណិកកប្បោតិ កណ្ណិកំ វិយ ពិន្ទុគោច្ឆកំ កត្វា កតោ កប្បោ។ អាទិសទ្ទេន អគ្ឃិយកប្បាទយោ សង្គណ្ហាតិ។ សព្ពត្ថាតិ សព្ពាសុ អដ្ឋកថាសុ។ ឯកោបិ ពិន្ទុ វដ្ដោយេវ វដ្ដតីតិ អាហ ‘‘ឯកំ វដ្ដពិន្ទុ’’ន្តិ។
368. Aṭṭhame alabhīti labhoti vacanatthe apaccayaṃ katvā ṇapaccayassa svatthabhāvaṃ dassetuṃ vuttaṃ ‘‘labhoyeva lābho’’ti. Apaccayamakatvā pakatiyā ṇapaccayopi yuttoyevāti daṭṭhabbaṃ. Saddantaropi atthantarābhāvā samāso hotīti āha ‘‘navacīvaralābhenāti vattabbe’’ti. Anunāsikalopanti ‘‘nava’’nti ettha niggahītassa vināsaṃ. Niggahītañhi nāsaṃ anugatattā ‘‘anunāsika’’nti vuccati, tassa adassana, makatvāti attho. Majjhe ṭhitapadadvayeti ‘‘nava’’nti ca ‘‘cīvaralābhenā’’ti ca dvinnaṃ padānamantare ‘‘ṭhite panā’’ti ca ‘‘bhikkhunā’’ti ca padadvaye. Niddhāraṇe cetaṃ bhummavacanaṃ. Nipātoti nipātamattaṃ. Alabhīti labhoti vacanatthassa abhidheyyatthaṃ dassetuṃ ‘‘bhikkhunā’’ti vuttanti āha ‘‘bhikkhunā’’tiādi. Padabhājane pana vuttanti sambandho. Yanti yaṃ cīvaraṃ. ‘‘Cīvara’’nti ettha cīvarasarūpaṃ dassento āha ‘‘yaṃ nivāsetuṃ vā’’tiādi. Cammakāranīlanti cammakārānaṃ tiphale pakkhittassa ayagūthassa nīlaṃ. Mahāpaccariyaṃ vuttanti sambandho. Dubbaṇṇo karīyati anenāti dubbaṇṇakaraṇaṃ, kappabindunti āha ‘‘kappabinduṃ sandhāyā’’ti. Ādiyantena bhikkhunā ādātabbanti sambandho. Koṇesūti antesu. Vāsaddo aniyamavikappattho. Akkhimaṇḍalamattaṃ vāti akkhimaṇḍalassa pamāṇaṃ vā kappabindūti sambandho. Paṭṭe vāti anuvātapaṭṭe vā. Gaṇṭhiyaṃ vāti gaṇṭhikapaṭṭe vā. Pāḷikappoti dve vā tisso vā tato adhikā vā binduāvalī katvā kato kappo. Kaṇṇikakappoti kaṇṇikaṃ viya bindugocchakaṃ katvā kato kappo. Ādisaddena agghiyakappādayo saṅgaṇhāti. Sabbatthāti sabbāsu aṭṭhakathāsu. Ekopi bindu vaṭṭoyeva vaṭṭatīti āha ‘‘ekaṃ vaṭṭabindu’’nti.
៣៧១. អគ្គឡាទីនីតិ អាទិសទ្ទេន អនុវាតបរិភណ្ឌេ សង្គណ្ហាតីតិ។ អដ្ឋមំ។
371.Aggaḷādīnīti ādisaddena anuvātaparibhaṇḍe saṅgaṇhātīti. Aṭṭhamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុរាបានវគ្គោ • 6. Surāpānavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៨. ទុព្ពណ្ណករណសិក្ខាបទវណ្ណនា • 8. Dubbaṇṇakaraṇasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៨. ទុព្ពណ្ណករណសិក្ខាបទវណ្ណនា • 8. Dubbaṇṇakaraṇasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៨. ទុព្ពណ្ណករណសិក្ខាបទវណ្ណនា • 8. Dubbaṇṇakaraṇasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៨. ទុព្ពណ្ណករណសិក្ខាបទវណ្ណនា • 8. Dubbaṇṇakaraṇasikkhāpadavaṇṇanā
