| Library / Tipiṭaka / ติปิฎก • Tipiṭaka / จูฬนิเทฺทสปาฬิ • Cūḷaniddesapāḷi |
๕. โธตกมาณวปุจฺฉา
5. Dhotakamāṇavapucchā
๘๖.
86.
‘‘ปุจฺฉามิ ตํ ภควา พฺรูหิ เมตํ, [อิจฺจายสฺมา โธตโก]
‘‘Pucchāmi taṃ bhagavā brūhi metaṃ, [iccāyasmā dhotako]
วาจาภิกงฺขามิ มเหสิ ตุยฺหํ;
Vācābhikaṅkhāmi mahesi tuyhaṃ;
ตว สุตฺวาน นิโคฺฆสํ, สิเกฺข นิพฺพานมตฺตโน’’ฯ
Tava sutvāna nigghosaṃ, sikkhe nibbānamattano’’.
๘๗.
87.
‘‘เตนหาตปฺปํ กโรหิ, [โธตกาติ ภควา]
‘‘Tenahātappaṃ karohi, [dhotakāti bhagavā]
อิเธว นิปโก สโต;
Idheva nipako sato;
อิโต สุตฺวาน นิโคฺฆสํ, สิเกฺข นิพฺพานมตฺตโน’’ฯ
Ito sutvāna nigghosaṃ, sikkhe nibbānamattano’’.
๘๘.
88.
‘‘ปสฺสามหํ เทวมนุสฺสโลเก, อกิญฺจนํ พฺราหฺมณมิริยมานํ;
‘‘Passāmahaṃ devamanussaloke, akiñcanaṃ brāhmaṇamiriyamānaṃ;
ตํ ตํ นมสฺสามิ สมนฺตจกฺขุ, ปมุญฺจ มํ สกฺก กถํกถาหิ’’ฯ
Taṃ taṃ namassāmi samantacakkhu, pamuñca maṃ sakka kathaṃkathāhi’’.
๘๙.
89.
‘‘นาหํ สหิสฺสามิ ปโมจนาย, กถํกถิํ โธตก กญฺจิ โลเก;
‘‘Nāhaṃ sahissāmi pamocanāya, kathaṃkathiṃ dhotaka kañci loke;
ธมฺมญฺจ เสฎฺฐํ อภิชานมาโน 1, เอวํ ตุวํ โอฆมิมํ ตเรสิ’’ฯ
Dhammañca seṭṭhaṃ abhijānamāno 2, evaṃ tuvaṃ oghamimaṃ taresi’’.
๙๐.
90.
‘‘อนุสาส พฺรเหฺม กรุณายมาโน, วิเวกธมฺมํ ยมหํ วิชญฺญํ;
‘‘Anusāsa brahme karuṇāyamāno, vivekadhammaṃ yamahaṃ vijaññaṃ;
ยถาหํ อากาโสว อพฺยาปชฺชมาโน, อิเธว สโนฺต อสิโต จเรยฺยํ’’ฯ
Yathāhaṃ ākāsova abyāpajjamāno, idheva santo asito careyyaṃ’’.
๙๑.
91.
‘‘กิตฺตยิสฺสามิ เต สนฺติํ, [โธตกาติ ภควา]
‘‘Kittayissāmi te santiṃ, [dhotakāti bhagavā]
ทิเฎฺฐ ธเมฺม อนีติหํ;
Diṭṭhe dhamme anītihaṃ;
ยํ วิทิตฺวา สโต จรํ, ตเร โลเก วิสตฺติกํ’’ฯ
Yaṃ viditvā sato caraṃ, tare loke visattikaṃ’’.
๙๒.
92.
‘‘ตญฺจาหํ อภินนฺทามิ, มเหสิ สนฺติมุตฺตมํ;
‘‘Tañcāhaṃ abhinandāmi, mahesi santimuttamaṃ;
ยํ วิทิตฺวา สโต จรํ, ตเร โลเก วิสตฺติกํ’’ฯ
Yaṃ viditvā sato caraṃ, tare loke visattikaṃ’’.
๙๓.
93.
‘‘ยํ กิญฺจิ สมฺปชานาสิ, [โธตกาติ ภควา]
‘‘Yaṃ kiñci sampajānāsi, [dhotakāti bhagavā]
อุทฺธํ อโธ ติริยญฺจาปิ มเชฺฌ;
Uddhaṃ adho tiriyañcāpi majjhe;
เอตํ วิทิตฺวา สโงฺคติ โลเก, ภวาภวาย มากาสิ ตณฺห’’นฺติฯ
Etaṃ viditvā saṅgoti loke, bhavābhavāya mākāsi taṇha’’nti.
โธตกมาณวปุจฺฉา ปญฺจมีฯ
Dhotakamāṇavapucchā pañcamī.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จูฬนิเทฺทส-อฎฺฐกถา • Cūḷaniddesa-aṭṭhakathā / ๕. โธตกมาณวสุตฺตนิเทฺทสวณฺณนา • 5. Dhotakamāṇavasuttaniddesavaṇṇanā
