| Library / Tipiṭaka / ติปิฎก • Tipiṭaka / จูฬนิเทฺทสปาฬิ • Cūḷaniddesapāḷi |
๖. อุปสีวมาณวปุจฺฉา
6. Upasīvamāṇavapucchā
๙๔.
94.
‘‘เอโก อหํ สกฺก มหนฺตโมฆํ, [อิจฺจายสฺมา อุปสีโว]
‘‘Eko ahaṃ sakka mahantamoghaṃ, [iccāyasmā upasīvo]
อนิสฺสิโต โน วิสหามิ ตาริตุํ;
Anissito no visahāmi tārituṃ;
อารมฺมณํ พฺรูหิ สมนฺตจกฺขุ, ยํ นิสฺสิโต โอฆมิมํ ตเรยฺยํ’’ฯ
Ārammaṇaṃ brūhi samantacakkhu, yaṃ nissito oghamimaṃ tareyyaṃ’’.
๙๕.
95.
‘‘อากิญฺจญฺญํ เปกฺขมาโน สติมา, [อุปสีวาติ ภควา]
‘‘Ākiñcaññaṃ pekkhamāno satimā, [upasīvāti bhagavā]
นตฺถีติ นิสฺสาย ตรสฺสุ โอฆํ;
Natthīti nissāya tarassu oghaṃ;
กาเม ปหาย วิรโต กถาหิ, ตณฺหกฺขยํ นตฺตมหาภิปสฺส’’ฯ
Kāme pahāya virato kathāhi, taṇhakkhayaṃ nattamahābhipassa’’.
๙๖.
96.
‘‘สเพฺพสุ กาเมสุ โย วีตราโค, [อิจฺจายสฺมา อุปสีโว]
‘‘Sabbesu kāmesu yo vītarāgo, [iccāyasmā upasīvo]
อากิญฺจญฺญํ นิสฺสิโต หิตฺวา มญฺญํ;
Ākiñcaññaṃ nissito hitvā maññaṃ;
๙๗.
97.
‘‘สเพฺพสุ กาเมสุ โย วีตราโค, [อุปสีวาติ ภควา]
‘‘Sabbesu kāmesu yo vītarāgo, [upasīvāti bhagavā]
อากิญฺจญฺญํ นิสฺสิโต หิตฺวา มญฺญํ;
Ākiñcaññaṃ nissito hitvā maññaṃ;
สญฺญาวิโมเกฺข ปรเม วิมุโตฺต, ติเฎฺฐยฺย โส ตตฺถ อนานุยายี’’ฯ
Saññāvimokkhe parame vimutto, tiṭṭheyya so tattha anānuyāyī’’.
๙๘.
98.
‘‘ติเฎฺฐ เจ โส ตตฺถ อนานุยายี, ปูคมฺปิ วสฺสานํ สมนฺตจกฺขุ;
‘‘Tiṭṭhe ce so tattha anānuyāyī, pūgampi vassānaṃ samantacakkhu;
ตเตฺถว โส สีติสิยา วิมุโตฺต, จเวถ วิญฺญาณํ ตถาวิธสฺส’’ฯ
Tattheva so sītisiyā vimutto, cavetha viññāṇaṃ tathāvidhassa’’.
๙๙.
99.
‘‘อจฺจิ ยถา วาตเวเคน ขิตฺตา, [อุปสีวาติ ภควา]
‘‘Acci yathā vātavegena khittā, [upasīvāti bhagavā]
อตฺถํ ปเลติ น อุเปติ สงฺขํ;
Atthaṃ paleti na upeti saṅkhaṃ;
เอวํ มุนี นามกายา วิมุโตฺต, อตฺถํ ปเลติ น อุเปติ สงฺขํ’’ฯ
Evaṃ munī nāmakāyā vimutto, atthaṃ paleti na upeti saṅkhaṃ’’.
๑๐๐.
100.
‘‘อตฺถงฺคโต โส อุท วา โส นตฺถิ, อุทาหุ เว สสฺสติยา อโรโค;
‘‘Atthaṅgato so uda vā so natthi, udāhu ve sassatiyā arogo;
ตํ เม มุนี สาธุ วิยากโรหิ, ตถา หิ เต วิทิโต เอส ธโมฺม’’ฯ
Taṃ me munī sādhu viyākarohi, tathā hi te vidito esa dhammo’’.
๑๐๑.
101.
‘‘อตฺถงฺคตสฺส น ปมาณมตฺถิ, [อุปสีวาติ ภควา]
‘‘Atthaṅgatassa na pamāṇamatthi, [upasīvāti bhagavā]
เยน นํ วชฺชุํ ตํ ตสฺส นตฺถิ;
Yena naṃ vajjuṃ taṃ tassa natthi;
สเพฺพสุ ธเมฺมสุ สมูหเตสุ, สมูหตา วาทปถาปิ สเพฺพ’’ติฯ
Sabbesu dhammesu samūhatesu, samūhatā vādapathāpi sabbe’’ti.
อุปสีวมาณวปุจฺฉา ฉฎฺฐีฯ
Upasīvamāṇavapucchā chaṭṭhī.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จูฬนิเทฺทส-อฎฺฐกถา • Cūḷaniddesa-aṭṭhakathā / ๖. อุปสีวมาณวสุตฺตนิเทฺทสวณฺณนา • 6. Upasīvamāṇavasuttaniddesavaṇṇanā
