| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৮৮৪.
884.
সকংসকংদিট্ঠিপরিব্বসানা, ৰিগ্গয্হ নানা কুসলা ৰদন্তি।
Sakaṃsakaṃdiṭṭhiparibbasānā, viggayha nānā kusalā vadanti;
যো এৰং জানাতি স ৰেদি ধম্মং, ইদং পটিক্কোসমকেৰলী সো॥
Yo evaṃ jānāti sa vedi dhammaṃ, idaṃ paṭikkosamakevalī so.
৮৮৫.
885.
এৰম্পি ৰিগ্গয্হ ৰিৰাদযন্তি, বালো পরো অক্কুসলোতি 3 চাহু।
Evampi viggayha vivādayanti, bālo paro akkusaloti 4 cāhu;
সচ্চো নু ৰাদো কতমো ইমেসং, সব্বেৰ হীমে কুসলা ৰদানা॥
Sacco nu vādo katamo imesaṃ, sabbeva hīme kusalā vadānā.
৮৮৬.
886.
পরস্স চে ধম্মমনানুজানং, বালোমকো 5 হোতি নিহীনপঞ্ঞো।
Parassa ce dhammamanānujānaṃ, bālomako 6 hoti nihīnapañño;
সব্বেৰ বালা সুনিহীনপঞ্ঞা, সব্বেৰিমে দিট্ঠিপরিব্বসানা॥
Sabbeva bālā sunihīnapaññā, sabbevime diṭṭhiparibbasānā.
৮৮৭.
887.
সন্দিট্ঠিযা চেৰ ন ৰীৰদাতা, সংসুদ্ধপঞ্ঞা কুসলা মুতীমা।
Sandiṭṭhiyā ceva na vīvadātā, saṃsuddhapaññā kusalā mutīmā;
ন তেসং কোচি পরিহীনপঞ্ঞো 7, দিট্ঠী হি তেসম্পি তথা সমত্তা॥
Na tesaṃ koci parihīnapañño 8, diṭṭhī hi tesampi tathā samattā.
৮৮৮.
888.
ন ৰাহমেতং তথিযন্তি 9 ব্রূমি, যমাহু বালা মিথু অঞ্ঞমঞ্ঞং।
Na vāhametaṃ tathiyanti 10 brūmi, yamāhu bālā mithu aññamaññaṃ;
সকংসকংদিট্ঠিমকংসু সচ্চং, তস্মা হি বালোতি পরং দহন্তি॥
Sakaṃsakaṃdiṭṭhimakaṃsu saccaṃ, tasmā hi bāloti paraṃ dahanti.
৮৮৯.
889.
যমাহু সচ্চং তথিযন্তি একে, তমাহু অঞ্ঞে 11 তুচ্ছং মুসাতি।
Yamāhu saccaṃ tathiyanti eke, tamāhu aññe 12 tucchaṃ musāti;
এৰম্পি ৰিগয্হ ৰিৰাদযন্তি, কস্মা ন একং সমণা ৰদন্তি॥
Evampi vigayha vivādayanti, kasmā na ekaṃ samaṇā vadanti.
৮৯০.
890.
একঞ্হি সচ্চং ন দুতীযমত্থি, যস্মিং পজা নো ৰিৰদে পজানং।
Ekañhi saccaṃ na dutīyamatthi, yasmiṃ pajā no vivade pajānaṃ;
নানা তে 13 সচ্চানি সযং থুনন্তি, তস্মা ন একং সমণা ৰদন্তি॥
Nānā te 14 saccāni sayaṃ thunanti, tasmā na ekaṃ samaṇā vadanti.
৮৯১.
891.
কস্মা নু সচ্চানি ৰদন্তি নানা, পৰাদিযাসে কুসলা ৰদানা।
Kasmā nu saccāni vadanti nānā, pavādiyāse kusalā vadānā;
সচ্চানি সুতানি বহূনি নানা, উদাহু তে তক্কমনুস্সরন্তি॥
Saccāni sutāni bahūni nānā, udāhu te takkamanussaranti.
৮৯২.
892.
ন হেৰ সচ্চানি বহূনি নানা, অঞ্ঞত্র সঞ্ঞায নিচ্চানি লোকে।
Na heva saccāni bahūni nānā, aññatra saññāya niccāni loke;
তক্কঞ্চ দিট্ঠীসু পকপ্পযিত্ৰা, সচ্চং মুসাতি দ্ৰযধম্মমাহু॥
Takkañca diṭṭhīsu pakappayitvā, saccaṃ musāti dvayadhammamāhu.
৮৯৩.
893.
দিট্ঠে সুতে সীলৰতে মুতে ৰা, এতে চ নিস্সায ৰিমানদস্সী।
Diṭṭhe sute sīlavate mute vā, ete ca nissāya vimānadassī;
ৰিনিচ্ছযে ঠত্ৰা পহস্সমানো, বালো পরো অক্কুসলোতি চাহ॥
Vinicchaye ṭhatvā pahassamāno, bālo paro akkusaloti cāha.
৮৯৪.
894.
যেনেৰ বালোতি পরং দহাতি, তেনাতুমানং কুসলোতি চাহ।
Yeneva bāloti paraṃ dahāti, tenātumānaṃ kusaloti cāha;
সযমত্তনা সো কুসলো ৰদানো, অঞ্ঞং ৰিমানেতি তদেৰ পাৰ॥
Sayamattanā so kusalo vadāno, aññaṃ vimāneti tadeva pāva.
৮৯৫.
895.
অতিসারদিট্ঠিযাৰ সো সমত্তো, মানেন মত্তো পরিপুণ্ণমানী।
Atisāradiṭṭhiyāva so samatto, mānena matto paripuṇṇamānī;
সযমেৰ সামং মনসাভিসিত্তো, দিট্ঠী হি সা তস্স তথা সমত্তা॥
Sayameva sāmaṃ manasābhisitto, diṭṭhī hi sā tassa tathā samattā.
৮৯৬.
896.
পরস্স চে হি ৰচসা নিহীনো, তুমো সহা হোতি নিহীনপঞ্ঞো।
Parassa ce hi vacasā nihīno, tumo sahā hoti nihīnapañño;
অথ চে সযং ৰেদগূ হোতি ধীরো, ন কোচি বালো সমণেসু অত্থি॥
Atha ce sayaṃ vedagū hoti dhīro, na koci bālo samaṇesu atthi.
৮৯৭.
897.
অঞ্ঞং ইতো যাভিৰদন্তি ধম্মং, অপরদ্ধা সুদ্ধিমকেৰলী তে 15।
Aññaṃ ito yābhivadanti dhammaṃ, aparaddhā suddhimakevalī te 16;
এৰম্পি তিত্থ্যা পুথুসো ৰদন্তি, সন্দিট্ঠিরাগেন হি তেভিরত্তা 17॥
Evampi titthyā puthuso vadanti, sandiṭṭhirāgena hi tebhirattā 18.
৮৯৮.
898.
ইধেৰ সুদ্ধি ইতি ৰাদযন্তি, নাঞ্ঞেসু ধম্মেসু ৰিসুদ্ধিমাহু।
Idheva suddhi iti vādayanti, nāññesu dhammesu visuddhimāhu;
এৰম্পি তিত্থ্যা পুথুসো নিৰিট্ঠা, সকাযনে তত্থ দল়্হং ৰদানা॥
Evampi titthyā puthuso niviṭṭhā, sakāyane tattha daḷhaṃ vadānā.
৮৯৯.
899.
সকাযনে ৰাপি দল়্হং ৰদানো, কমেত্থ বালোতি পরং দহেয্য।
Sakāyane vāpi daḷhaṃ vadāno, kamettha bāloti paraṃ daheyya;
সযমেৰ সো মেধগমাৰহেয্য 19, পরং ৰদং বালমসুদ্ধিধম্মং॥
Sayameva so medhagamāvaheyya 20, paraṃ vadaṃ bālamasuddhidhammaṃ.
৯০০.
900.
ৰিনিচ্ছযে ঠত্ৰা সযং পমায, উদ্ধং স 21 লোকস্মিং ৰিৰাদমেতি।
Vinicchaye ṭhatvā sayaṃ pamāya, uddhaṃ sa 22 lokasmiṃ vivādameti;
হিত্ৰান সব্বানি ৰিনিচ্ছযানি, ন মেধগং কুব্বতি জন্তু লোকেতি॥
Hitvāna sabbāni vinicchayāni, na medhagaṃ kubbati jantu loketi.
চূল়ব্যূহসুত্তং দ্ৰাদসমং নিট্ঠিতং।
Cūḷabyūhasuttaṃ dvādasamaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ১২. চূল়ব্যূহসুত্তৰণ্ণনা • 12. Cūḷabyūhasuttavaṇṇanā
