| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៨. ចង្កមនទាយកត្ថេរអបទានំ
8. Caṅkamanadāyakattheraapadānaṃ
៩៣.
93.
‘‘អត្ថទស្សិស្ស មុនិនោ, លោកជេដ្ឋស្ស តាទិនោ;
‘‘Atthadassissa munino, lokajeṭṭhassa tādino;
ឥដ្ឋកាហិ ចិនិត្វាន, ចង្កមំ ការយិំ អហំ។
Iṭṭhakāhi cinitvāna, caṅkamaṃ kārayiṃ ahaṃ.
៩៤.
94.
‘‘ឧច្ចតោ បញ្ចរតនំ, ចង្កមំ សាធុមាបិតំ;
‘‘Uccato pañcaratanaṃ, caṅkamaṃ sādhumāpitaṃ;
អាយាមតោ ហត្ថសតំ, ភាវនីយ្យំ មនោរមំ។
Āyāmato hatthasataṃ, bhāvanīyyaṃ manoramaṃ.
៩៥.
95.
‘‘បដិគ្គហេសិ ភគវា, អត្ថទស្សី នរុត្តមោ;
‘‘Paṭiggahesi bhagavā, atthadassī naruttamo;
ហត្ថេន បុលិនំ គយ្ហ, ឥមា គាថា អភាសថ។
Hatthena pulinaṃ gayha, imā gāthā abhāsatha.
៩៦.
96.
‘‘‘ឥមិនា បុលិនទានេន, ចង្កមំ សុកតេន ច;
‘‘‘Iminā pulinadānena, caṅkamaṃ sukatena ca;
សត្តរតនសម្បន្នំ, បុលិនំ អនុភោស្សតិ។
Sattaratanasampannaṃ, pulinaṃ anubhossati.
៩៧.
97.
‘‘‘តីណិ កប្បានិ ទេវេសុ, ទេវរជ្ជំ ករិស្សតិ;
‘‘‘Tīṇi kappāni devesu, devarajjaṃ karissati;
អនុភោស្សតិ សម្បត្តិំ, អច្ឆរាហិ បុរក្ខតោ។
Anubhossati sampattiṃ, accharāhi purakkhato.
៩៨.
98.
‘‘‘មនុស្សលោកមាគន្ត្វា , រាជា រដ្ឋេ ភវិស្សតិ;
‘‘‘Manussalokamāgantvā , rājā raṭṭhe bhavissati;
តិក្ខត្តុំ ចក្កវត្តី ច, មហិយា សោ ភវិស្សតិ’។
Tikkhattuṃ cakkavattī ca, mahiyā so bhavissati’.
៩៩.
99.
‘‘អដ្ឋារសេ កប្បសតេ, យំ កម្មមករិំ តទា;
‘‘Aṭṭhārase kappasate, yaṃ kammamakariṃ tadā;
ទុគ្គតិំ នាភិជានាមិ, ចង្កមស្ស ឥទំ ផលំ។
Duggatiṃ nābhijānāmi, caṅkamassa idaṃ phalaṃ.
១០០.
100.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា ចង្កមនទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā caṅkamanadāyako thero imā gāthāyo abhāsitthāti.
ចង្កមនទាយកត្ថេរស្សាបទានំ អដ្ឋមំ។
Caṅkamanadāyakattherassāpadānaṃ aṭṭhamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៨. ចង្កមនទាយកត្ថេរអបទានវណ្ណនា • 8. Caṅkamanadāyakattheraapadānavaṇṇanā
